Ipulogilamu Mpya Yamuswaangano Waalubazu Wabuzuba Bomwe
Ipulogilamu yamuswaangano waalubazu wabuzuba bomwe iitalika mu September 1999 ijisi mutwe wakuti: “Ikugulunganya Makani Aamaseseke aa Leza.” (1 Kor. 2:10) Nzintu nzi zibotu nzyotutikaiye?
Ibantu banji nobasola kuyandaula luzibo izintu nzyobajana tazibakatalusyi pe. Ibbaibbele lilatupa nguzu, eci tuyakucimvwa mumakani ngayakutukananina mulangizi wabbazu aakuti “Ikuvwuntauzya Jwi lya Leza Kulakatalusya.” Mwaambi mweenzu uyooamba kugulunganya makani aamaseseke aa Leza mbokuswaangene akukambauka makani mabotu nabandika mubuzyo wakuti “Ino Kukambauka Makani aa Bwami Mukulanga Buti?”
Mbuti bazyali mbobanga bagwasya bana babo kuvwuntauzya Jwi lya Leza? Malailile aagwasya ayoopegwa mumakani aamutwe wakuti “Amubayiisye Jwi lya Leza Bana Banu.” Ibakubusi Banakristo balayungwa munzila iili kabotu kwiinda mukuyanzana abamumbungano ibasimide munzila yakumuuya. Izikozyanyo zyambuli mbobayungwa kabotu ziyoobandikwa mumakani aakuti “Ibakubusi Ibayiya Kubapati.”
Nkaambo nzi ncotweelede kusungwaala kuyandaula lubono lusisidwe lwakumuuya lino? Jehova ngu Sikuyubununa maseseke. Mwaambi mweenzu uyoopandulula zintu Jehova nzyaakayubununa kuciindi cansiku alimwi asunu mumakani aakuti “Jehova Ulayubununa Bucebuce Makani Aasisidwe.” Eeci ciyootuyumya kuti tuzumanane “Ikugulunganya Makani Aamaseseke aa Leza.”
Amulibambile lino kuyoojanika. Aabo bayanda kuyootondezya kulyaaba kwabo kuli Jehova kwiinda mukubbapatizigwa abazibye mulangizi weendelezya kufwambaana. Iluyando lwesu lwakuvwuntauzya Jwi lya Leza luyoososelwa azintu nzyotuyoomvwa. Aboobo mutakaindwi buzuba obu bwaalubazu bwakuyiisigwa munzila yakumuuya!