Ncinzi Ncomunga Mwamwaambila mu Mozilemu?
1 Sena kuli nomwakakambaukide kumu Mozilemu? Naa mboobo, mwakaziba kuti ba Mozilemu balamusyoma kapati Leza. Nokuba boobo, nzisyoonto nzyobazi kujatikizya Paradaiso iiboola anyika yalo yakaambilizigwa abasinsimi ba Jehova, elyo tulayandisya kubaambila bulangizi bwesu. (1 Tim. 2:3, 4) Imakani aatobela ayelede kumugwasya kupa bumboni bubotu.
2 Iba Mozilemu basyoma Allah naa Leza alimwi basyoma kuti Muhammad musinsimi wa Leza. Ibbuku lyabo lisalala liitwa kuti Koran, elyo bukombi bwabo bwiitwa kuti Izilamu icipandulula kuti “kulibombya.” Koran yaamba kuti ikubeja alimwi akukomba mituni taziluzi pe akuti Leza ngumwi buyo alimwi tali cibeela ca Butatu. Alimwi liyiisya kutafwika kwabuumi, mulilo wahelo alimwi aparadaiso yakujulu. Iba Mozilemu balazumina kuti Bbaibbele ndi Jwi lya Leza pele basyoma kuti lyakacincwa-cincwa kakuli Koran icili mumwaambo nguwenya wakusaanguna alimwi yazumanana kusalala.
3 Amube Basibulongwe, Ibasongo Alimwi Ibabelesya Bupampu: Nomubandika amu Mozilemu amube basibulongwe alimwi ibasongo. (Tus. 25:15) Kamuyeeya kwaamba kuti nzyobasyoma ba Mozilemu zilisindamide kapati alimwi bunji bwazyo zyakayiigwa kwiinda mukupeta. Aboobo ikubandika njiisyo zyabukombi alimwi akumvwisisya kuyanda kwa Leza tiilwali lubazu lwakuyaambele kwabo munzila yakumuuya. (Rom. 12:2) Ikutegwa tukonzye kubagwasya ba Mozilemu, kuyandika kubaa camba akuteelelesya.—1 Kor. 9:19-23.
4 Mutabelesyi twaambo itunga twapa kuti mu Mozilemu amwaambe kuti muli ba Kristendomu. Amucisalazye kwaamba kuti mulaandeene, tamuli cibeela cacikombelo caba Katolika naa ba Pulotestanti. Ibbaibbele amulyaambe kuti ndi Bbuku lya Leza. Mbwaanga ba Mozilemu tabakayandi kaambo kakuti “Mwana aa-Leza,” ncibotu ikutakabelesya naa ikutabandika mutwe wamakani oyu mane kusikila muntu oyo wayaambele munzila yakumuuya. Nokuba boobo, mulakonzya kubandika kujatikizya Jesu kamumwaamba kuti musinsimi naa mutumwa. Mutakazyanyi pe. Ikuti naa mwabona kuti muntu watalika kukalala, amufwambaane kuzwaawo cabulemu.
5 Ncibotu kubandika buyo amuntu omwe ikuleka nkamu yabantu. Ikanjikanji tukulwaizigwa kuti banakazi kabakambaukila banakazinyina abalo baalumi kubaaluminyina. Ee, kuli ziindi nocinga tacibeleki kucita boobu, pele bupampu bulayandika kumakani aya. Alimwi ibunji bwaba Mozilemu tabalimvwi kabotu pe kumakani aansamino alimwi akulibamba kwabanakazi nkobabona kuti takuluzi. Ibacizi beelede kwaaziba makani aya.—1 Kor. 10:31-33.
6 Nzyomunga Mwabandika: Amubandike cakutalisenda kujatikizya bupati bwa Leza alimwi aluyando lwakwe. Muteenkeli pe kwaamba kuti muli basyomi beni-beni, ikuti Leza ngumwi buyo (tali Wabutatu) alimwi akuti taciluzi pe ikukomba mituni. Amubandike kujatikizya bubi buli munyika sunu—inkondo, manyongwe, ilusulano akaambo kakwiimpana mubala alimwi akuupaupa ameso kwalo kulibonya akati kabasizikombelo banji.
7 Ibroshuwa yakuti The Guidance of God—Our Way to Paradise iyoomupa mitwe yamakani iimbi yalo iikonzya kubelesyegwa ikutalika mibandi aba Mozilemu. Yakabambilwa kuti ikkomanisye ba Mozilemu ibakkala mumasena mobanga kabaangulukide kwiiya Bbaibbele.
8 Mulakonzya kubelesya nzila eyi akwaamba kuti:
◼ “Ndiyaabubandika aba Mozilemu. Ndali kwaabala makani aajatikizya cikombelo canu elyo ndisyoma kuti ndililuzi ikwaamba kuti ba Mozilemu basyoma Leza wakasimpe omwe buyo alimwi abasinsimi boonse. [Amulindile bwiinguzi.] Ndiyanda kuti ndibandike andinywe kujatikizya businsimi bumwi bwansiku ibwakasinsima kusandulwa kwanyika eyi kuti ibe paradaiso. Sena inga ndamubalila ncaakalemba musinsimi? [Amubale Isaya 11:6-9.] Ibusinsimi obu bundiyeezya kuzubululwa kumwi ikuli mu Koran ikujanwa mubroshuwa eyi.” Amujule kupeeji 9 mubroshuwa ya Guidance of God, elyo amubale kuzubululwa ikulembedwe mumabala aasiya kapati alo aamba kuti balulami bayookona nyika. Ikuti naa muntu oyo watondezya luyandisisyo amuzumanane kubandika kwiinda mukulanga-langa muncali 7 kusikila ku 9 apeeji imbi. Amwiisiye broshuwa elyo amumvwane nomuyoopilukila.—Ikutegwa mujane inzila imbi yakubelesya, amubone Mulimo Wesu Wabwami wa February 1998, peeji 6 muncali 20.
9 Nomulomba muntu kuti mulange-lange broshuwa ya Guidance of God, ncibotu ikwaamba kuti mujisi mubandi ikutali ciiyo ca Bbaibbele. Mwamanizya kwiiya broshuwa eyi, sikwiiya weelede kuti kali muciimo cakukonzya kwiiya broshuwa ya Ncayanda naa bbuku lya Luzibo. Ayalo tulakiti ya How to Find the Road to Paradise alimwi akabbuku kakuti The Time for True Submission to God zyakabambilwa kuti zigwasye ba Mozilemu.
10 Akaambo kaluzibo olu lwazintu nzyobasyoma ba Mozilemu alimwi azyeezyo izibanyonganya mizeezo bazimvwa, tulakonzya kubelesya bupampu notusala mabbuku aakumwaya kuba Mozilemu alimwi amunzila njotunga twabakambaukila. Jehova aazumanane kutulongezya mukusoleka nkotucita ikugwasya bantu bamisyobo yoonse kuti kabakomba munzina lya Leza akufwutuka.—Inc. 2:21.