Amulizibye Izina lya Jehova Amilimo Yakwe
1 “Amulumbe Jehova! Amukwiilile izina lyakwe! Amuluule milimo yakwe akati kabamasi! . . . Isekelele myoyo yabaabo bayandaula Jehova!” (Int. 105:1, 3) Sintembauzyo wakalemba majwi aayo, wakali kkomene kapati ikwaambila bamwi makani aajatikizya Jehova alimwi a “milimo” yakwe. Ino milimo nzi? Cakutadooneka njeeyo iijatikizya bwami bwa Leza bukondelezya alimwi a “makani aalufutuko lwakwe.”—Int. 96:2, 3; 145:11, 12.
2 Mbotuyaabuswena kuciindi ca Ciibalusyo camumwaka wa 2001, tulijisi twaambo tunji ncotweelede kwiikkomanina milimo ya Jehova njaatucitila. Nkaambo nzi ncotwaambila boobo? Nkaambo ka Mulalilo wa Mwami, cakutadooneka eci nceciindi cipati ncobalangila Banakristo bakasimpe boonse amwaka. Taakwe ciindi cimbi ciyandika kapati mbuli ceeci, icijisi makanze alimwi cicitwa munzila eeyi. Eeci nceciindi toonse ncotweelede kwiibaluka zintu Jehova alimwi a Jesu nzyobatucitila mukubamba nzila yalufwutuko lwesu. Anu nkakaambo kaako ncotulangila kuyaambele mumulimo wesu wamumuunda lyaciindi ca Ciibalusyo, eelyo notuluula “makani aalufutuko”!
3 Sena Muyoocita Mulimo Wabupainiya Bwakugwasilizya? Mwaka wakamana mu April, imweelwe uusika ku 10,724 bakalilembya mumulimo wabupainiya bwakugwasilizya. Mwaka uuno, sena mwezi wa March alimwi a April iyooba myezi yaalubazu yakuyooyungizya mulimo wesu? Mwezi wa March ujisi mazubaa Mujibelo aali osanwe alimwi awa April ujisi mazuba aamu Nsondo aali osanwe. Kwiinda mukubaa bubambe bwakubeleka kumamanino aamvwiki kwabuzuba boonse, basikumwaya banji ibabeleka mulimo wakumubili lyoonse bajana kuti inga bacikonzya kubeleka mulimo wabupainiya bwakugwasilizya. Ikutegwa asisye mawoola 50 ayandikaa mwezi, imupainiya uugwasilizya uyandika kuti kabeleka mawoola aasika ku 12 amvwiki. Amulange-lange kabotu milongo yaciindi yacitondezyo iili mukabbokesi apeeji 4. Sena nkwiili imwi akati kayeeyi yeendelanaa bukkale bwanu? Ikuti kakunyina, ambweni inga mwalibambila mulongo wanu nobeni wakuyoobeleka mulimo wabupainiya mumwezi wa March alimwi a April eeyi iboola.
4 Ibaalu beelede kutalika lino ikukulwaizya alimwi akugwasilizya kutolaambele mulimo. Mbungano imwi mwaka wakamana mwalo ibaalu alimwi abakutausi boonse mobakatola lubazu mumulimo wabupainiya bwakugwasilizya, ibali 64 akati kabasikumwaya bali 121, bakatola lubazu mumulimo wabupaniya mu April! Alimwi mbungano yakakkomana ikubona basikumwaya batana bbapatizigwa ibali cisambomwi kabatalika kupa malipooti mumyezi ya March alimwi a April. Masimpe, eeco nceciindi cibotu kubana alimwi abapya ikubuzya baalu naa balasisya zyeelelo ikutegwa batalike kutola lubazu mumulimo wakukambauka kubuleya.
5 Ikubeleka Cabunkutwe Kuletela Zilongezyo: Mbungano eezyo zijisi mbaakani zyaalubazu alimwi izibeleka cabunkutwe zilalongezyegwa munzila zinji kapati. Imbungano zimwi zilakonzya kukankaizya ikubelekela mucilawo mutabelekwi-belekwi, akucinca-cinca nzila zibelesyegwa mukukambauka naa ikukankaizya bukamboni bwaaluwaile—inzila ibeleka kabotu caboola mukubandikaa bantu batajaniki aŋanda alimwi abaabo ibakkala mumaanda aacingilidwe mutasikwi-sikwi.
6 Ikuti umwi kapona buumi bwakuciswa-ciswa antela kacembeede, sena eeci ceelede kumulesya kutola lubazu mbuli mbwakonzya mumulimo? Talili lyoonse nocili boobo. Mucikozyanyo, kuli mucizi ulaamyaka yakuzyalwa iili 86 uuciswa bulwazi bwakkansa wakatola lubazu mumulimo wabupainiya bwakugwasilizya mu April nokuba kuti maulu akwe akalizimbide. Wakacikonzya kutola lubazu lyoonse mumulimo kwiinda mubukambausi bwaaluwaile, eelyo wakayaambele mukutembaula Jehova. Eeci cakamukulwaizya lwakwe mwini kubikkilizyaa mbungano.
7 Amulibambile Kabotu Kujatikizya Ciibalusyo: Mwaka uuno Ciibalusyo cinooli mu April 8. Akaambo kakuti buzuba oobu bunooli mu Nsondo, ibanji ciyoobaubila-ubila kuyoojanika. Tulakonzya kubaa mweelwe mupati uutanabwenwe ikuti naa twazuzikizya mbazu zyesu kwiinda (1) mukujanika swebo lwesu alimwi (2) amukutamba bamwi kuzootusangana ku Ciibalusyo. Ino mbaani mbotweelede kutamba?
8 Amulange-lange momulembela zyamumulimo wamumuunda akulangaula mazina aabantu bakatondezya luyandisisyo mukasimpe, nokuba kuti tamucibaswayi bunji bwaziindi. Kakucili mvwiki zyobile naa zyotatwe kuti kube Ciibalusyo, amubikkile maanu kukuswaya bantu aaba akubatamba kuti bakaboole ku Ciibalusyo. Ikuti naa kamucikonzya, amubaambile kuti muyoobagwasya cakweendela ikuti naa kabayanda kuyoojanika.
9 Amubayeeye Abaabo Ibatacisungweede: Ncintu cikkomanisya ikubona sikwiiya Bbaibbele nalyaaba mwini kuli Jehova alimwi anaatondezya kulyaaba kwakwe kwiinda mukubbizigwa mumeenda. Nokuba boobo, mwakaa mwaka kuli bamwi akati kesu ibacileka kusangana andiswe alimwi balacileka akwaambila bamwi makani aajatikizya izina lya Jehova amilimo yakwe. Tulijisi kaambo kabotu ncotweelede kubabikkila maanu bantu aaba. Nokuba kuti bunji bwabantu aaba batacisungweede inga tabalekeli limwi buya kasimpe pe, balakonzya kuti bakacileka kukambauka akaambo kakutyompokelwa kumwi, mapenzi ngobajisi antela akaambo kamapakasyo abuumi oobu. (Mt. 13:20-22) Aabo ibakompeme munzila yakumuuya bayandika lugwasyo kuti bapilukile mumbungano kabatana lumwa a Saatani uyabweendeenda. (1 Pet. 5:8) Kuciindi eecino ca Ciibalusyo tuyanda kuti tusoleke kapati kubagwasya boonse aabo ibeelela pesi batacisungweede kutegwa abalo batalike alimwi ikutola lubazu mukukambauka makani mabotu.
10 Mulembi wambungano weelede kubazibya beendelezi baziiyo zyabbuku kujatikizya baabo ibatacisungweede ibali munkamu zyabo. Kkomitii Yamulimo Yambungano iyooba kumbele mukubaa bubambe bwakuswaya kwabweembezi kuli baabo boonse batacisungweede. Ikuti naa cabonwa kuti muntu ulakonzya kugwasigwa kwiinda muciiyo ca Bbaibbele, mulangizi wamulimo uyoocita bubambe bwakugwasya muntu ooyo aakumana kumvwanaa bamukkomitii yamulimo kujatikizya muntu weelela kabotu alimwi uukonzya kweendelezya ciiyo eeco. Nokuba kuti inga takuyandiki kucitya ciiyo kwaciindi cilamfwu buya, ooyo unoopedwe mukuli wakweendelezya ciiyo eeco ulakonzya kulemba ciindi, nyendo zyakupilukila alimwi aciiyo ca Bbaibbele.
11 Mwaka wakamana mu April, mucizi umwi iwakali kubeleka mumulimo waŋandaa ŋanda wakaabila mamagazini kumulombwana umwi wakali kweenda mumugwagwa. Wakamwaambila kuti mukaintu wakwe ngu Kamboni pele uutacisungweede. Mpoonya wakabuzya ikwakali Ŋanda ya Bwami akutamba mucizi kuti akabaswaye amukaintu wakwe. Cakatobela ncakuti, ibanabubili aabo bakajanika kumuswaangano nsondo yakatobela alimwi bakazumina ciiyo ca Bbaibbele.
12 Amulibambile Kuyootola Lubazu Mumulimo Uuyungizidwe! Sintembauzyo ooyo wakaamba kuti tweelede kulizibya izina lya Jehova alimwi amilimo yakwe, aboobo wakayungizya kuti: “Amumwiimbile! Amumutembaule! Amwaambe milimo yakwe yoonse iigambya! Amulikankaizizye izina lyakwe lisalala.” (Int. 105:2, 3) Atukaambe izina lya Jehova litalikomeneni alimwi ‘amilimo yakwe iigambya’ kwiinda mukuyungizya mulimo wesu, ikucita kuti ciindi eeci ca Ciibalusyo cibe ciindi ciyandika kapati!
Kabbokesi kali apeeji 5]
Nzila Ziindene-indene Zyakubamba Mulongo Wamawoola aali 12 Amvwiki Kutegwa Mubeleke Mulimo Wabupainiya
Buzuba Mawoola
Muhhulo 1 2 − −
Bwabili 1 − 3 −
Bwatatu 1 2 − 5
Bwane 1 − 3 −
Bwasanu 1 2 − −
Mujibelo 5 4 3 5
Nsondo 2 2 3 2
Oonse: 12 12 12 12
Sena kuli mulongo umwi akati kayeeyi ngomukonzya kubelesya? Ikuti naa taakwe, sena tamukonzyi kulibambila mulongo wanu nobeni?