Ipulogilamu Mpya ya Muswaangano Waalubazu
1 Nokuba kuti izyaambwa muli sikapepele alimwi azyaambwaa bamayi bamunyika zisumpula buvwubi bwakumubili, Ijwi lya Leza litukulwaizya kuti: ‘Amube Bavwubi Mukucita Milimo Mibotu.’ (1 Tim. 6:18) Ooyu ngomutwe wapulogilamu yamuswaangano waalubazu kutalikila mu September 2002. Ino nkukulwaizya kuli buti nkotukonzya kuyootambula kumuswaangano ooyu?
2 Mulangizi wabbazu uyoobandika ncocipandulula kwaamba kuti, “Amube Bavwubi Kuli Leza,” alimwi uyoobuzya-buzya bamwi babaabo ibali mukusolekesya kuba bavwubi munzila yakumuuya. Mumakani aakwe aakusaanguna mubuzuba oobu, mwaambi mweenzu uyootondezya mbuli bantu ba Leza mbobali mukubeleka “Milimo Mibotu Muciindi Cino Cakutebula.” Umwi aumwi wesu uyookulwaizigwa kulanga-langa mbwakonzya kutola lubazu kapati mumulimo wakutebula Leza ngwapede uuli mukucitwa sunu.
3 Elo kaka tulakkomana kapati notubona Banakristo bakubusi kabayandaula buvwubi bwakumuuya! Kucita boobu nkumulemeka Jehova alimwi kugwasya bakubusi kulibambila ntalisyo mbotu yakubaa coolwe kumbele cakubaa mulimo. Icibeela caamba kuti “Ikulumbaizya Bakubusi Kumilimo Yabo Mibotu Yakutembaula Jehova” ciyootondezya milimo mibotu njobali mukucita Banakristo bakubusi banyenzi.
4 Ino mbubotu nzi bujanika akaambo kakucita milimo mibotu? Imwaambi mweenzu uyookabandika kaambo aaka mumakani aakwe aamamanino aakuti “Amuzumanane Kucita Milimo Mibotu Akuyootebula Zilongezyo zya Jehova.” Uyoolanga-langa mbazu zili zyone oomo motukonzya kujana zilongezyo zitaliboteli: (1) umwi aumwi wesu, (2) mumukwasyi, (3) mumbungano alimwi (4) amumbunga yanyika yoonse mbwiizulwa.
5 Aabo bakalyaaba kuli Jehova bayooba acoolwe cakubbapatizyigwa. Ikuti naa mulilibambilide kubweza ntaamu eeyi, amumuzibye cakufwambaana mulangizi weendelezya.
6 Yaakwaambilizyigwa deeti eelyo muswaangano nouya kuba kubusena nkomubede, amukafwambaane kucita bubambe bweelede kutegwa mukajanike. Amukasolekesye kusika kakucili ciindi kutegwa mukatole lubazu mukwiimba lwiimbo lwakujula alimwi amupailo. Ikujanika alimwi akuswiililisya kupulogilamu yoonse yamuswaangano waalubazu kuyootuyumya kuzumanana kutobela nzila iikonzya kutupa kuvwuba kuli Leza wesu, Jehova.