Mulimo Waalubazu Wakumwaya Broshuwa Mpya
1 Bantu banji sunu balapenzyegwa abukkale bwamunyika, pele mbasyoonto bazyi zintu ncozyili boobo, mbokuyooba kumbele alimwi ancobeelede kucita kutegwa bakafwutulwe kulubeta luboola. (Ezk. 9:4) Kubagwasya kuzyiba ciindi ncotubede cino, mulimo waalubazu wakumwaya broshuwa mpya yakuti Amulangile Lyoonse! iyooyiigwa kuzwa mu Muhulo October 18 kusikila mu Nsondo ya November 14.
2 Ibroshuwa ilakonzya kumwaigwa nokucitwa mulimo wakuŋanda aŋanda, notucita nyendo zyakupilukila anotukambauka mukwiizya naa mumasena aamakwebo. Nokuba boobo, ibroshuwa ya Amulangile Lyoonse! tayeelede kumwaigwa cimwaigwe-mwaigwe pe. Muciindi caboobo, ibroshuwa eeyi ipegwa buyo baabo batondezya luyandisyisyo kuli zyeezyo ncolyaamba Bbaibbele kujatikizya zintu zicitika munyika. Aboobo aabo batondezya kuti tabaliyandi balakonzya kwaabilwa tulakiti.
3 Mulakonzya kupa kuti muntu abikkile maano kwiinda mukwaamba kuti:
◼ “Bantu banji balalibilika amapenzi aatalikomeneni alimwi azintu zigambya zyavwula mazubaano. [Amupe cikozyanyo cizyibidwe mucilawo.] Sena mulizyi kuti zintu zili boobo zyakasinsimwa mu Bbaibbele? [Amulindile bwiinguzi. Mpoonya amubale lugwalo luli mucibalo mbuli lwa Matayo 24:3, 7, 8; Luka 21:7, 10, 11; naa 2 Timoteo 3:1-5.] Ibbaibbele ilayubununa ncaamba mazuba eesu alimwi azili kumbele. Sena mulayanda kuzyiba zinji? [Amulindile bwiinguzi. Amwaabile broshuwa ikuti kwatondezyegwa luyandisyisyo lwini-lwini.] Ibroshuwa eeyi tayuuzyigwi. Ikuti kamukonzya kusanga kugwasyilizya mulimo wesu wanyika yoonse, inga twamulumba kapati.”
4 Ambweni mulakonzya kujana kuti nzila eeyi ilagwasya:
◼ “Banji mazubaano balinyongene azintu zicitika zigambya naa zibacitikila zibyaabi. Bamwi balagambwa Leza ncatabwezeli ntaamu kulesya zintu zyili boobu. Ibbaibbele litusyomezya kuti Leza ino-ino uyoomana mapenzi aakatazya bantu. Amubone zilongezyo Leza nzyayooletela bantu. [Amubale Intembauzyo 37:10, 11.] Sena mulayanda kuzyiba zinji?” Amumanizye mbuli mbokwaambwa musyule.
5 Amulembe zina akkeyala yamuntu aumwi wazumina ibroshuwa alimwi akucita bubambe bwakuti mukapiluke kutegwa mukayungizye luyandisyisyo lwakatondezyegwa. Nzila zyambotukonzya kucita zyeezyi ziyootondezyegwa mu Mulimo Wesu Wabwami wa November 2004. Ikuti muntu watondezya luyandisyisyo mulweendo lwakusaanguna, mulakonzya kutalisya ciiyo ca Bbaibbele mpoonya aawo kwiinda mukubelesya ibroshuwa ya Amulangile Lyoonse! naa bbuku limbi mbuli ibroshuwa ya Ncayanda.
6 Mabroshuwa mapya anooliko a Muswaangano Wamulimo kabutanasika buzuba bwakwiiya cibalo eeci. Basikumwaya alimwi abapainiya bakulwaizyigwa kubweza mabroshuwa ngobayanda kuyoomwaya mumazuba masyoonto aakusaanguna aamulimo. Jehova alongezye mulimo ooyu waalubazu kutegwa atembaulwe alimwi akugwasya babombe myoyo kuli koonse nkobabede.—Int. 90:17.