Mulimo Waalubazu Wakutalisya Ziiyo zya Bbaibbele mu September

Mumwezi wa September, tuyoobeleka canguzu kapati kutalisya ziiyo zya Bbaibbele kuŋanda-aŋanda kubelesya broshuwa ya Amupone Kukabe Kutamani! Basikumwaya balakonzya kusala kucita bupainiya bwakugwasyilizya akubeleka kwamawoola aali 30. Ino tuyoowubeleka buti mulimo waalubazu ooyu?

• Mulweendo Lwakusaanguna: Amubelesye makani aali kunze kwa broshuwa ikugwasya bantu kuba aluyandisisyo, mpoonya akubatondezya mbocicitwa ciiyo ca Bbaibbele. Kunze lyaboobo, tamweelede kubaluba aabo bakatondezyede luyandisisyo ciindi camana, kubikkilizya anyendo zyakupilukila. Nokuba kuti musyule tiibakazumina kwiiya Bbaibbele, ambweni lino balakonzya kuzumina akaambo kanzila mpya njotubelesya kuyiisya alimwi abroshuwa. Tamweelede kusiya mabroshuwa mumaanda mutako bantu naa kwaabikkilizya mumagwalo ngomutumina bantu ibatakatondezyede luyandisisyo musyule. Mumwezi ooyu, Kkomiti Yamulimo Yambungano ilakonzya kupanga bubambe abumbi buyungizyidwe bwakuswaangana kulibambila kuunka mumulimo wamumuunda.

• Zyoolwe Zimbi: Ikuti naa mbungano yanu kaijisi twakubikkila mabbuku twakukuba, amutubelesye kutondezya mabroshuwa aa Amupone Kukabe Kutamani! Amubaambile aabo ibatondezya luyandisisyo akutambula broshuwa kuti balakonzya kuba alwiiyo lwamu Bbaibbele lutabbadelelwi. Mubufwaafwi ciindi nomubandika amubatondezye mbocicitwa ciiyo, naa kupanga bubambe bwakuyoocita oobo aciindi cimbi. Mulangizi wamulimo ulakonzya kupanga bubambe bwakuti basikumwaya beelela baunke mumasena mucitilwa makwebo mucilawo akuyootalisya ziiyo zya Bbaibbele. Kuyungizya waawo, mulakonzya kutalisya ziiyo zya Bbaibbele kubantu mbomubeleka limwi, naa aabo mbomuswaanganya nomucita bukambausi bwamukwiizya.

Jesu wakatulailila ‘kuyiisya bantu’ kutegwa babe ‘basikwiiya.’ (Mt. 28:19, 20) Tulangila kuti mulimo waalubazu ooyu uyootugwasya kwaazuzikizya malailile aaya, kwiinda mukubelesya broshuwa ya Amupone Kukabe Kutamani!