Amubagwasye Kuzumanana Kwiiya Kasimpe
1 Notutola lubazu mukukambauka makani mabotu, kanji-kanji tulaswaanganya bantu ibatakkali mucilawo cesu naa baambaula mwaambo umbi, kubikkilizya amwaambo wakutambaika. Ibamwi mbotwaakkomana kubandika ambabo mibandi mibotu yamu Bbaibbele inga balongela kucilawo cimwi. Mbuti mbotukonzya kubikka bubambe bwakuti bantu bali boobo bazumanane kwiiya kasimpe? Kwiinda mukubelesya foomu ya Amuzumanane a Muntu Ooyu (S-43).
2 Bunji bwaziindi bantu balabikkila maano kapati kuswiilila kumakani mabotu ciindi naambwa mumwaambo wabo. (Inc. 22:1, 2) Aboobo, muziindi zinji, ikuti twaswaanganya muntu waambaula mwaambo umbi, tweelede kwiilemba foomu nokuba kuti muntu ooyo tanaatondezya luyandisyo kumulumbe wa Bwami. Nokuba boobo, ikuti kakuli nkamu yabantu baambaula mwaambo wakunze aacisi yalo iikambaukilwa lyoonse mumwaambo wabo, inga tiicayandika kwiilemba foomu ccita kuti luyandisyo lwatondezyegwa.
3 Kulemba Foomu: Cabusongo, amumubuzye zina lyakwe, nkwakkala, alimwi anamba yakwe yaluwaile. Amutondezye mbolubede luyandisyo lwakwe, iciindi ncaanga wajanwa muntu ooyo, ibbuku ndyomwakamwaabila antela ndyaakalomba, alimwi amwaambo ngwamvwisya kabotu. Mwamana kwiilemba foomu, amufwaambane kwiipa mulembi wambungano, walo uyooyitumina kumbungano naa kunkamu yeelede.
4 Kutumina Foomu: Ikuti mulembi kataizyi mbungano naa nkamu yeelede kutambula foomu antela katajisi kkeyala yakutumina mpasya yambungano eeyo naa nkamu, inga watumina luwaile kuofesi yamutabi ikutegwa ajane makani ayeelede naa kutumina foomu kuofesi yamutabi kutegwa ikalanganizyigwe nkuko. Taciciyandiki limbi kumuzyibya mulangizi wadolopo ciindi nomutumina foomu.
5 Imbungano naa nkamu mboyatambwida buyo foomu ya Amuzumanane a Muntu Ooyu, yeelede kucita bubambe bwakuswaya muntu ooyo cakufwambaana. Eelyo notubeleka canguzu kucita lubazu lwesu, tulakonzya kuba alusyomo lwakuti Jehova uyoojula myoyo yabaabo “abasalidwe buumi butamani.”—Inc. 13:48.