Icikolo Citugwasya Kucita Nzyotwiiya
1 Notulanga-langa makani aalembedwe mu Mulongo Wamakani Wamu 2006 mu Cikolo Camulimo Weendelezyegwa a Leza, tulasoleka kugwasyigwa anjiisyo zyamu Magwalo kwiinda mukuzibelesya mumulimo wesu uusetekene amubukkale bwaabuzuba. Tulasoleka kucita zintu nzyotwiiya.—Joh. 13:17; Flp. 4:9.
2 Kupa Bwiinguzi: Mulongo wamwaka uuno upa miniti yomwe iiyungizyidwe kubaswiilizi kuti batole lubazu mukunomoona twaambo tupati-pati twamu Bbaibbele. Eeci cipandulula kuti mukwesu uupedwe cibeela cakunomoona twaambo tupati-pati weelede kuzyiba mbociyandika kumanizya cibeela cakwe mumaminiti aali osanwe ikutali aali cisambomwe pe. Aabo bapa bwiinguzi kuzwa aawo mpobakkede abalo beelede kubikkila maanu kuciindi ncobapedwe. Ikuti wayeeyela limwi kabotu-kabotu, ooyo uupa bwiinguzi ulakonzya kwaamba twaambo tugwasya mutuvwalu-vwalu tuli 30 naa tutasiki aawo. Eeci ceelede kupa ciindi cibotu kubantu bali kkumi kuti bape bwiinguzi mumaminiti aali osanwe aapedwe baswiilizi kuti batole lubazu.
3 Makani Aayiisya: Kunomoona twaambo tupati-pati kuzwa mu Bbaibbele amakani aakulailila, zyeelede kugamika kumpindu yamakani mbuli mbwaakonzya kubelesyegwa mumulimo wesu amumbazu zyabukkale bwesu bwaabuzuba. Mwaambi tayeelede kwiile kwiibalusya buyo bamuswiilila mbociyandika kubweza ntaamu. Weelede kwaamba cintu cini-cini ciyandika kucitwa, kutondezya mbocikonzya kuzuzikizyigwa akwaamba zilongezyo zijanwa mukucita boobo. Ulakonzya kwaamba kuti “Mboobu cibalo eeci mbocipa busolozi kulindiswe,” naa kuti “Mboobu mbotukonzya kutubelesya tupango ootu mumulimo.” Baalu abakutausi bazyi bukkale bwa mbungano yabo beelede kusolekesya kutondezya mbwaagwasya makani cakugaminina mbuli mbocikonzyeka.
4 Kwaamba zikozyanyo zyamu Bbaibbele kulakonzya kugwasya kapati mukwaamba mbwaagwasya makani. Mwaambi wamana kwaamba cikozyanyo camu Magwalo, ulakonzya kwaamba kuti, “Andinywe mulakonzya kuba mubukkale bukozyenye aboobu.” Weelede kubona masimpe kuti bupanduluzi buli boonse bwa cikozyanyo camu Bbaibbele buleendelana acibalo, Bbaibbele lyoonse, azyeezyo zyakamwaigwa a “muzike musyomesi uucenjede.”—Mt. 24:45.
5 Busongo ninguzu zyakubelesya kabotu luzibo akumvwisya. “Busongo ncintu cipati.” (Tus. 4:7) Mbotuyaabuzumanana kuba abusongo bugwasya kwiinda muziiyo zyesu mu Cikolo Camulimo Weendelezyegwa a Leza, aswebo atuye ambele mukuyiisya bamwi.