Kamucibelesya Kabotu Ciindi Nomuli Mumulimo
1 Zinji ziciyandika kucitwa mumulimo wesu alimwi ciindi ciceede ncisyoonto. (Joh. 4:35; 1 Kor. 7:29) Ikuti naa twalibambila kabotu alimwi twalibambila kakucili ciindi tulakonzya kucibelesya kabotu ciindi kweelana aabubambe mbutwakabikka bwamumulimo.
2 Kamulibambila: Kamutanaunka kumuswaangano wamulimo wamumuunda, mweelede kubona kuti mulijisi mabbuku ngomuyandika kubelesya alimwi kamulibambide anzila njomuya kubelesya. Imuswaangano ooyu mbowamanina buyo amupailo, mweelede kuunka mumulimo. Kucita boobo, kuya kupa kuti nywebo abaabo mbomubeleka limwi mucibelesye kabotu ciindi ncomwabikka cakuya mumulimo wamumuunda.
3 Ikuti naa mwapegwa coolwe cakweendelezya muswaangano wamulimo wamumuunda, mweelede kutalika mbocakkwanina buyo ciindi. Muswaangano weelede kufwiimpa—taweelede kwiinda amaminiti aali 15. Kamutana mwaika, amubone kuti boonse balikuzi nkobatiibelekele angobatiibeleke limwi.
4 Nomuli Mumulimo: Wamana muswaangano wakuya mumulimo wamumuunda, mutawayi-wayi pe, pele mweelede kutalika kweenda kuya kucilawo nkomubelekela. Ziindi zinji inga kakuli kaambo kabotu kapa kuti basikumwaya bobilo babelekele aantoomwe. Eeci cipa coolwe cakukulwaizyanya akwiiya kuli umwi aumwi. Nokuba boobo, muzilawo zinji zimwi, muntu omwe ulakonzya kubeleka alikke kaali bamwi kabakambauka munsi-munsi. Ikubeleka oolike mumulimo wamumuunda ikuti bukkale kabuzumizya, kupa kuti tubandike abantu banji alimwi eeci cilakonzya kutuyiisya mbotukonzya kubeleka kumbele ikuti mulimo wesu wakukambauka wakasyigwa cakutayeeyelwa. (Amubone Ngazi Yamulindizi yamu Novermber 15, 1985, apeeji 13, muncali 11.) Kuzibamba kabotu zintu akuyanda kuucita mulimo kusikila mpotugolela kweelede kulibonya mububambe bwesu.—km 5/99 apeeji 7.—Kabbokesi Kamubuzyo.
5 Nomupilukila, muciindi cakuti kamuzemba buyo, mulakonzya kubaswaya aabo bali mucibeela comwe kamutanaunka kucibeela cimbi. Inga mwabatumina luwaile bamwi kutegwa muzibe naa banooliko aŋanda. (Tus. 21:5) Ikuti naa mwabona kuti mulakkala ciindi cilamfwu, mulakonzya kubalomba mbomubeleka limwi kuti kabakambauka munsi-munsi naa bakaswaye muntu uumwi wali kumulangila.
6 Tupona kuciindi camulimo mupati wakutebula kwakumuuya. (Mt. 9:37, 38) Ino-ino imulimo ooyu uyakumana. Aboobo, makanze eesu ngakucibelesya kabotu ciindi cesu notuli mumulimo.