Ibanamukwasyi Mbobabelekela Antoomwe Kutola Lubazu Munzila Iizwide—Muciiyo ca Bbaibbele
1 Ikasimpe kagwasya kuti bukkale bwamukwasyi kabuli aampindu, pele kuzwidilila mukubelekela Jehova takulibooleli buyo. Citola ciindi alimwi ciyanda kubeleka canguzu kuyaka ŋanda iisuka busi munzila yakumuuya. Banamukwasyi bayandika kubelekela antoomwe. Eeci cibalo cakusaanguna muzibalo zyotatwe zinootobelene cilakanana mikwasyi mboinga yabelekela antoomwe mukubaa zilengwa zibotu zyakwiiya.
2 Ikwiinda Mukubala Bbaibbele Buzuba Abuzuba: Ibbuku lya Tusimpi 24:5 lyaamba kuti “muntu musongo ulaa nguzu.” [BT] Iluzibo ndwajana muntu kuzwa mukubala Jwi lya Leza lyoonse lumupa kuti abe anguzu zyakulwana Saatani nasola kumuwisya munzila yakumuuya. (Int. 1:1, 2) Sena mulakkala antoomwe mumukwasyi kubala Bbaibbele buzuba abuzuba? “Mulongo Wacikolo ca Teokrasi ujisi “Mulongo Wakuyungizya Wakubala Bbaibbele” nsondo ansondo mumwaka. Ikuutobela cijatikizya buyo ciindi camaminiti aali kkumi buzuba abuzuba. Amusale ciindi ceelede cakubala Bbaibbele akubala lugwalo lwabuzuba kuzwa mu Kulingaula Magwalo, eci inga mwacicita nomulya cakulya cacifwumofwumo, mwamana kulya cilalilo naa kamutanaya kukoona. Oobu bube mbobukkale bwamukwasyi wanu bwabuzuba abuzuba.
3 Ikwiinda Mukwiiya Antoomwe Nsondo Ansondo: Iciiyo ca Bbaibbele camukwasyi ceelede kacili cintu cipati icicitwa amukwasyi mukati kansondo. Umwi aumwi mumukwasyi weelede kugwasilizya kwiinda mukuyandisisya kutola lubazu muciiyo. Silutwe wamukwasyi weelede kubona ziyandika kumukwasyi nasala makani aakwiiya, ibuzuba bwakwiiya alimwi aciindi, kubikkilizya abulamfwu bwaciiyo. Ciiyo acibe cintu cipati kwiinda zyoonse nzyomucita mukati kansondo. Mutazumizyi zintu zitayandiki kapati kunyonganya ciiyo.—Flp. 1:10, 11.
4 Umwi wisi bana iwakali kutambula mafooni kanjikanji aajatikizya makwebo wakali kunga wiigwisya ntambo yafooni ciindi ncobacita ciiyo camukwasyi. Ikuti naa basimakwebonyina basikilaa ciindi ncobacita ciiyo muŋanda, wakali kubatamba kuciiyo naa kubaambila kulindila kusikila camana. Wisi bana oyu taakali kuyanda kuzumizya cintu cili coonse kunyonganya ciiyo camukwasyi. Eeci cakabagwasya kapati bana bakwe. Makwebo aakwe akazwidilila.
5 Tacilikkomanisizyi banamukwasyi nobabelekela antoomwe mumilimo yakumuuya! Ikusoleka lyoonse kutola lubazu munzila iizwide muciiyo ca Bbaibbele ciyakupa kuti Jehova atuleleke.—Int. 1:3.