Wanpela Animal Ol i Kolim Tepa
Wanpela man bilong raitim stori bilong Kirap! em i stap long Brasil em i raitim dispela stori
ATING yu no bin bungim wanpela tepa, long wanem em i save stap tasol long hap bilong Sentral na Saut Amerika na long Esia long hap bilong saut. Dispela animal tepa i gat pasin isi, na em i bikpela olsem donki, tasol lek bilong en i sotpela, olsem na sapos yu lukim em bai yu ting em i kain olsem pik. Wanpela saveman bilong ol animal i save stap long ol zu em i tok, ol pikinini bilong dispela tepa ol i kain olsem “ol melen i gat makmak.”
Longpela bilong tepa em inap olsem 1.8 mita i go inap 2.4 mita, na ol i go antap inap olsem 1 mita, na hevi bilong ol long skel em inap olsem 230 kilogram i go inap 290 kilogram. Skin bilong ol i patpela na nek bilong ol i bikpela na ol i gat sotpela tel. Ai bilong ol i liklik, na ol i no inap lukluk gut. Nus bilong en i longpela liklik na em i save mekim wok long en bilong painim kaikai olsem pik i save mekim. Wanpela buk (The International Wildlife Encyclopedia) i stori long tepa na i tok, dispela animal tepa i no olsem ol narapela bikpela animal—em i no gat wanpela samting bilong helpim em long pait na sakim ol birua.
Ol tepa i save stap insait tru long ol bikbus na bai ol i ken abrusim ol birua, olsem ol animal ol i kolim jagua o taiga samting. Taim taiga i kalap antap long wanpela tepa, orait tepa i save ran i go insait long bikbus na bai ol han bilong diwai samting i brumim taiga i go pundaun. Skin bilong tepa i strong, na taim wanpela samting i katim skin bilong en, skin i save orait hariap, olsem na em i no save kisim bikpela bagarap tumas.
Ol tepa i save stap klostu long wanpela wara o raunwara, na planti taim ol i save waswas long wara, na ol i save tantanim long graun malumalum o tais. Dispela i save kolim skin bilong ol long taim bilong bikpela san, na dispela i save lukautim ol na bai ol kain kain binatang bilong ples hat i no ken mekim nogut skin bilong ol. Skin bilong ol i bikpela na i hevi, tasol sapos birua samting i raunim ol, ol inap spit tru. Strongpela skin na sotpela nek bilong ol i stret tru long ples ol i stap long en—ol inap i go insait kwik long bikbus tru.
I gat 3-pela kain tepa i stap long hap bilong Sentral na Saut Amerika, na narapela ol i kolim tepa bilong Malaya em i save stap long Esia long hap bilong Saut-is. Ol i painim pinis sampela bun bilong ol tepa long hap bilong Yurop na Saina na Not Amerika, na dispela i kamapim klia olsem bipo yet ol dispela animal tepa i save stap long planti hap bilong graun.
Ol tepa i save laik long i stap wanpis tasol, o sampela taim ol i raun tupela tupela. Long ol zu tasol, sampela taim 3-pela i save stap wantaim, tasol narapela i no save tingim narapela. Kaikai bilong ol, em ol i save kaikai ol liklik sayor samting i kamap insait long bus, o ol sayor bilong wara o tais. Ol i save laikim tru sol, na sapos ol i save i gat ston sol i stap long wanpela hap, ol i save wokabaut longwe tru long painim. Ol i no raun tumas long san—ol i save raun long nait na painim kaikai. Ol i save winim planti krismas, inap olsem 30 samting.
Ol tepa i no gat taim stret bilong karim pikinini—ol i save karim long kain kain taim nabaut. Ol i save karim wanpela pikinini tasol; pikinini i save stap insait long bel bilong mama inap 13 mun. Gras long baksait bilong ol pikinini tepa em braunpela, na i gat yelopela na waitpela makmak long en, na ol inap hait gut insait long hap tudak bilong bikbus. Tasol ol dispela makmak i pinis taim ol i gat olsem wanpela krismas samting. Tepa bilong Malaya, taim em i gat wanpela krismas pinis, gras bilong en i kamap blakpela, na antap long lek bilong en bilong baksait em i waitpela; tasol ol tepa bilong Saut Amerika ol i blakpela liklik o braunpela.
Ol i Laik Pinis
Tepa em i gutpela abus na ol man i save raunim ol long nait, taim ol i raun na painim kaikai. Sampela taim ol man i save tromoi sol long graun na taim ol tepa i painim dispela sol ol i save kaikai. Bihain ol i mas i go painim wara bilong dring, na ol man i wetim ol long wara. Ol i save sutim strongpela lait long ai bilong tepa na em i no inap lukim ol, na nau ol i sutim em.
Mit bilong tepa i no gat bikpela gris, na planti man i save kukim long hap ain o waia samting antap long paia; ol i tok em i gutpela abus. Na strongpela skin bilong en tu i gat planti wok bilong en—ol i save wokim ol rop long en bilong wipim hos samting o bilong tromoi long nek bilong ol hos o bulmakau samting na holimpas ol, na ol i wokim baklain bilong pasim long kopstik o hap ain i stap long maus bilong hos bilong stiaim hos. Sampela taim ol Indian bilong Brasil i save kisim tepa na putim long ples na lukautim em.
Bipo i gat planti tepa i stap, tasol ol man bilong painim abus ol i save raunim ol dispela tepa, na long nau ol man i wok long katim ol bikbus ol dispela animal i save stap long en, olsem na nau i no gat planti tepa i stap.
Tru yu no inap bungim wanpela tepa long bikbus, tasol i gat sampela i stap long ol zu nabaut long graun. Sapos bihain yu raun long wanpela hap i gat bikpela zu i stap, ating bai yu gat rot bilong bungim wanpela tepa.