Yu Mas Kisim Tit Giaman?

PLANTI man i save tok pilai long man i gat tit giaman, tasol long dispela man yet em i no samting bilong pilai. Sapos yu gat gutpela tit bilong yu yet, ating stori long tit giaman i no bikpela samting long yu, a? Tasol maski yu gat gutpela tit, ol tok i kamap long dispela stori inap helpim yu long tingim gut tit bilong yu na mekim ol samting bilong lukautim tit.

Planti man i bin ting ol i save lukautim gut tit bilong ol, tasol olsem wanem na tit bilong ol i wok long lus? Olgeta dokta bilong stretim tit i tok, man i winim 30 krismas na tit bilong em i bagarap, planti taim as bilong dispela samting em skin klostu long tit i kisim wanpela kain sik (periodontal disease). Tasol tit bilong sampela man i bagarap, long wanem, birua i painim em olsem em i pundaun na paitim maus samting, o hul i kamap long tit na em i bagarap.

Olsem wanem? Tru yu mas kisim tit giaman sapos sampela tit o olgeta tit bilong yu i bagarap?a Bilong wanem sampela man i no gat tit ol i no laik putim tit giaman? Olsem wanem? Ol man i laik pulim mani, na ol i strong long man i mas kisim tit giaman?

Wok Bilong Tit

Bilong bekim ol dispela askim yumi ken tingim wok bilong tit bilong yumi. Wok bilong ol i no olsem bilong mekim maus i luk naispela na em tasol. Taim yumi kaikai, tit i mekim na brukbrukim kaikai, olsem na wara i stap long bel bilong yumi inap tanim wantaim dispela kaikai na skin bilong yumi inap kisim ol gutpela marasin samting i stap long kaikai. Tasol sapos yumi gat sampela tit tasol o yumi no gat tit, orait taim yumi kaikai, maus i no inap memeim. Na sapos yumi no gat tit, maski yumi gat strongpela bun insait long maus, dispela tu i no inap brukbrukim kaikai. Ol man i no gat tit na ol i dring kopi o ti o wara samting bilong helpim ol long daunim kaikai, ating bihain bel bilong ol i pen. Na maski sampela tit tasol i lus, ating man i no inap kaikai planti strongpela kaikai, o kaikai i gat planti rop, long wanem, em bai hatwok long kaikai.

Tit i save helpim yumi long toktok na sampela taim yumi no tingim dispela samting inap long taim sampela tit bilong yumi i raus. Ol i save helpim tang na maus long kamapim gut ol toktok. Sapos man i no gat tit o planti tit bilong em i lus, em i no inap kamapim gut toktok, a? Olsem na man i gat tit giaman, maus bilong em i mas lain gen long kamapim gut tok. Em bai hatwok long mekim olsem, tasol toktok bilong em bai winim toktok em i mekim taim em i no gat tit.

Olsem wanem? Man i gat tit giaman em inap singsing o winim wanpela musik samting? Em inap sapos dokta bilong stretim tit i wokim tit inap long dispela man yet. Ol man bilong singsing, na sampela man bilong piksa wokabaut samting, na ol man bilong winim musik, na sampela man moa, ol bai hatwok tru long mekim gut wok bilong ol sapos ol i no gat tit.

Na skin bilong man i no gutpela sapos em i no gat tit. Na skin klostu long maus bai slek, olsem na maski em yangpela, em i kamap olsem lapun. Sapos dispela samting i kamap, ating man i no inap amamas long em yet​—em bai bel hevi.

Sapos wanpela tit bilong yumi i lus, banis bilong maus i no strong moa. Olgeta wan wan tit bilong yumi i gat wok, olsem ol wan wan ston long banis ston. Sapos wanpela tit i lus, tit klostu long en bai surik liklik. Taim tit i mekim olsem, kaikai inap pas namel long ol tit na dispela inap mekim skin klostu long tit i kamap retpela na pen. Na sapos tit i surik liklik ol tit i no sindaun gut o lain gut, orait, taim man i wokim wokim maus bilong brukim kaikai em bai hatwok.

Wok Bilong Tupela Kain Tit

Tit tru bilong yumi na tit giaman i no wankain. Rop bilong tit bilong yumi yet i stap insait tru long ol bun bilong wasket. Ol i stap olsem na taim yumi kaikai yumi no hatwok long pulim o brukbrukim o memeim kaikai bilong yumi. Tit i stap daunbilo long maus i save holim tit antap na wok long memeim ol kaikai.

Tasol tit giaman i save sindaun insait long maus antap long skin na bun bilong maus tasol. Tang na wasket na strong bilong maus tasol i holim ol na ol i sindaun insait long maus. Tit giaman i no gat rop bambai tit i ken pas gut insait long ol bun bilong maus, nogat. Olsem na sampela taim tit i no stap gut long ples bilong en.

Olsem na gutpela wok o wok nogut bilong tit giaman long olgeta man i narapela narapela kain. Tit giaman i no inap mekim wok tru olsem tit bilong yumi yet. Na maus na wasket na skin na tingting bilong olgeta man i gat tit giaman i no wankain. Na save bilong ol long mekim wok long tit giaman, em tu i narapela kain. Ol dispela samting i mekim na tit giaman inap mekim gutpela wok o wok nogut. Tasol wanpela hevi bilong tit giaman em ol i no inap pas gut insait long maus olsem tit bilong yumi yet. Tasol ol dokta inap wokim tit giaman na yumi no save em giaman o tit tru bilong man yet.

Sori tru, sampela taim man i mas kisim tit giaman bilong pilim tru olsem tit bilong em yet i winim tit giaman. Ol man inap wokim tit giaman na yumi ting em tit bilong man yet, tasol tit giaman i no inap mekim gut wok olsem tit tru bilong man.

Olsem na yu mas tingting gut​—yu mas kisim tit giaman o nogat. Yu tasol inap tok bai yu kisim o nogat. Tasol yu mas tingting gut long ol gutpela samting na ol samting nogut tit giaman inap mekim. Sapos yu no gat tit o sampela tit i lus, na yu gat sampela hevi olsem taim yu kaikai pinis bel bilong yu i pen, long wanem, yu no memeim kaikai, o yu no inap toktok gut, o skin klostu long maus i slek, orait, tit giaman inap helpim yu.

Tru tumas, ating ol man i gat tit giaman bai bel hevi liklik, long wanem, ol i no gat tit bilong ol yet, tasol pasin bilong ol dokta long wokim gut tit giaman long nau inap helpim planti milion man long amamas na stap isi.

[Ol Futnot]

[Blok long pes 19]

No Ken Tromoi Mani Long Dokta Bilong Stretim Tit

MAN i go long dokta bilong stretim tit inap tromoi bikpela mani. Tasol ating bai yu amamas long save long sampela samting bilong helpim ol pikinini bilong yu.

Wanpela nius (The New York Times) i tok: ‘Ating planti manmeri bilong Amerika i gat hevi long tit na wasket samting, long wanem, ol i kaikai planti kaikai em ol kampani i kamapim na ol dispela kaikai i gat kain kain marasin long en.’ Ol saveman i ting taim yumi wokim wokim maus long brukbrukim ol strongpela kaikai, dispela i save ‘helpim wasket long go bikpela na ol tit i kamap ol i no pas pas, ol inap sindaun gut insait long maus. Na em i helpim namba 2 tit long bruk na kamap gut.’

Ol saveman i laik truim dispela tingting bilong ol, olsem na ol i givim strongpela kaikai na kaikai i no strong long ol monki. Wanem samting i kamap? Ol monki i kaikai strongpela kaikai, tit bilong ol i no bagarap tumas. Olsem na sapos yu givim kaikai long pikinini na em i mas wokim wokim maus bilong em bilong kaikai, dispela inap helpim em na yu no ken tromoi bikpela mani long go lukim dokta bilong stretim tit. Narapela rot em long lainim pikinini long klinim gut tit olgeta taim.

[Piksa long pes 20]

Olgeta tit bilong yumi i gat wok​—narapela i helpim narapela. Sapos wanpela i lus ol narapela tit klostu long en bai surik liklik na nogutim ol narapela tit