Sik AIDS na Ol Man i Gat Nem

OL MAN i save kaunim ol toksave bilong ol man i dai pinis i save kirap nogut long planti man i gat nem ol i bin dai long sik AIDS. Nius Newsweek bilong Janueri 18, 1993, i stori long planti bilong ol dispela kain man i wok long i dai, olsem: ‘Sik AIDS i wok long bagarapim ol man insait long ol lain bilong danis, musik, televisen, ol piksa wokabaut, na sampela lain moa.’

Nius Newsweek i tok: ‘Paris i olsem Nu Yok o Los Enjeles. Wanpela ripot i tok, sik AIDS i bin kilim i dai inap 60 pesen bilong ol man i dai pinis long Paris (25 i go 44 krismas) na ol i bin wok olsem niusman o man bilong mekim ol pilai o singsing samting.’

Nius People bilong Janueri 23, 1993, i stori olsem, sik AIDS i bin bagarapim tru ol man i wok mani long danis long ais. Nius i tok: ‘Winim 40 man insait long dispela spot i dai pinis long sik AIDS, na nau ol man bilong danis long ais long Not Amerika i bel hevi tru long ol pren bilong ol i lusim ol.’

Na dispela nius i stori long wanpela man bilong Briten i bin winim medal gol long spot Olimpik, em John Curry, na i tok: ‘I no gat narapela man i gat biknem olsem em long danis long ais na em i gat sik AIDS.’ Nius i kolim tok bilong em olsem: ‘Sik AIDS i bin kilim i dai olgeta pren bilong mi.’ Bilong wanem planti bilong dispela lain i bin kisim sik AIDS?

As bilong dispela em pasin bilong ol. Nius People i tokaut long dispela samting olsem: ‘Maski ol man bilong danis long ais, ol kosa, na ol bikman, ol i bel hevi long indai bilong ol pren bilong ol, tasol ol i sem na pret long tokaut long ai bilong ol man long sik AIDS, na long bikpela tok i kamap long pasin sodom i stap namel long ol man bilong danis long ais.’

Tru tumas, pasin bilong pamuk nabaut​—man wantaim man o man wantaim meri​—em namba wan rot bilong kisim sik AIDS. Long Disemba 1991, tupela dokta long Kanada i tokaut long wanpela meri i bin dai long sik AIDS na meri i bin kolim nem bilong 70 man bilong Nesenel Hoki Lig (N.H.L.), em i bin pamuk wantaim ol. Nius The New York Times bilong Disemba 5, 1991 i tok: ‘Dispela stori i mekim na nau sampela tim bilong lain N.H.L. i tingting planti. Long dispela as, nau ol man bilong pilai na ol kosa i bin bung wantaim bilong toktok long dispela samting.’

Ol i mas mekim wanem? Wanpela man bilong pilai hoki long Kanada i tok: ‘Mobeta yumi tokim ol yangpela ol i no ken mekim maritpasin inap long taim ol i marit. Maski long tokim ol, ol i ken mekim sapos ol i putim kondom.’ Dispela tok i no nupela tok, long wanem, Baibel i tok: ‘Stap longwe long pasin pamuk.’​—1 Korin 6:18.

[Piksa Kredit Lain long pes 31]

Focus On Sports