Pas Bilong Ol Man
No Gat Wok Mani Tenkyu tru long ol dispela stori long wok mani long Kirap! (Julai 8, 1996) Dispela Kirap! i kamap long taim mi raun na painim wok, tasol mi no bin painim wok. Mi traim kirapim wanpela wok bilong mekim long haus olsem yupela i stori long pes 17, na em i kamap gutpela. Mi tenkyu long Jehova long ol gutpela tok bilong yupela!
J. M., long Frens Giana
Ol dispela stori i kamapim ol hevi i bin painim mi i no longtaim i go pinis. Inap sampela mun, mi mas lain long “mekim kain kain wok” olsem wanpela bilong ol dispela stori i tok. Tasol mi no bel hevi long dispela. Mi bin traim long kisim stretpela tingting long dispela, na bihain mi painim wanpela wok mi inap mekim long olgeta taim. Long dispela taim bilong hevi, meri bilong mi i helpim mi na em i bin lukautim gut mani taim em i baim ol samting. Tenkyu gen long ol tok i helpim mipela long bihainim ol lo bilong Baibel long ol taim bilong hevi.
U. C., long Itali
Mi laikim tru ol tok bilong yupela long blok “Wok Bilong Mekim Long Haus.” Mi wanpela painia oltaim i save mekim wok autim tok long olgeta de, na inap tupela yia mi gat laisens bilong wok bisnis long lukautim ol pikinini long haus bilong mi. Mi bin lukautim ol pikinini paslain na bihain long skul, na mi bin kisim bikpela pe liklik. Dispela i opim rot na mi inap autim tok namel long de, na mekim wok mani inap 4-pela aua tasol long olgeta de. Planti papamama i bin amamas tru long wok mi bin mekim, long wanem, i hatwok long painim ol man em ol inap mekim gutpela wok olsem. Mi laik bai ol narapela tu i ken painim wok em bai helpim ol na ol i ken mekim wok bilong Jehova.
T. K. L., long Amerika
Yupela i bin tok olsem, ol man i no gat wok mani, ol inap kirapim bisnis bilong ol yet bilong samapim ol samting olsem skin pilo bilong ka o sia, katim gras bilong ol man, lukautim ol purpur long ol ofis, haus beng, hotel na ol kain wok olsem. Na tu yupela i bin tok, ol inap putim toksave bilong wok long niuspepa i no gat pe o liklik pe tasol. Ating dispela i tambu long Jemani, a?
R. T., long Jemani
I no olgeta kantri i gat wankain lo, olsem na ating long sampela kantri, i tambu long mekim ol dispela samting mipela i bin kamapim. Olsem na long pes 15 mipela i tok i bikpela samting long save na bihainim ol lo bilong gavman na dipatmen bilong takis paslain long man i laik kirap na mekim ol kain wok olsem. Ol Kristen i mas bihainim ol lo bilong kantri ol i stap long en. (Rom 13:1)—Edita.
Sik i Kamap Long Kaikai Mi bin amamas tru long kaunim stori “Lukautim Yu Yet Long Sik Bilong Kaikai i Nogut Pinis.” (Mas 8, 1996) Mi wanpela kukboi na mi laik kamapim wanpela tingting. Man i amamas long kaikai mit i no tan gut, em i no inap kaikai kain mit olsem sapos em i laik abrusim sik bilong kaikai i nogut pinis. Tru, taim ol i kukim mit long aven i hat tumas, dispela inap mekim na bai mit i drai na givim hatwok long bel. Wanpela gutpela rot bilong kukim mit na em i ken tan gut na em i no ken drai, em long boilim isi long sospen long paia o kukim isi isi long wara insait long aven.
J. P. K., long Amerika
Tenkyu long gutpela tingting bilong yu.—Edita.
Ol i Daunim Ol Kantri i Stap Rabis Mi gat 14 krismas na mi amamas tru long yupela i bin kamapim ol stori “Ol Kantri i Gat Planti Mani Ol Bai Wok Oltaim Long Daunim Ol Kantri i Stap Rabis?” (Mas 8, 1996) Tisa i bin tokim mipela long raitim stori i gat het tok “Bikpela Bel Hevi.” Mi bin lukluk long ol niuspepa na ol magasin bilong painim ol tok, tasol mi no painim wanpela gutpela tok mi inap mekim wok long en. Na long dispela taim stret, dispela stori bilong Kirap! i kamap na mi mekim wok long en bilong raitim stori bilong mi. Mi kisim gutpela mak long klas, winim ol narapela na mi tenkyu long ol dispela stori.
A. O., long Brasil