Pas Bilong Ol Man

Bilong Wanem Bikpela Sik i Painim Mi?  Mi pilim pinis ol hevi Jason i kamapim long stori “Ol Yangpela i Laik Save . . . Bilong Wanem Bikpela Sik i Painim Mi?” (Me 8, 1997) Taim mi kaunim dispela stori, long olgeta taim mi pilim olsem mi stori wantaim wanpela man em i save long hevi bilong mi na i tingim sik bilong mi. Tenkyu tru long yupela i helpim mi long daunim bel hevi bilong mi. Mi save olsem Jehova i tingim yumi na long taim em i makim pinis bai em i pinisim tru olgeta sik.

O. A., long Gana

Tupela wik paslain long dispela stori i kamap, dokta i tok mi gat sik kain olsem epilepsi. Nau tasol mi kisim 18 krismas, tasol dispela sik i daunim tru olgeta amamas mi bin kisim taim mi winim dispela krismas. I gat planti samting mi mas was gut long en, na planti marasin mi mas kisim long taim stret. Na tu, dispela i givim bikpela hevi long papamama bilong mi, long wanem, 2-pela pikinini bilong ol i dai pinis. Mi pilim tru ol tok bilong dispela stori na mi krai. Em i kamapim stret ol tingting bilong bel mi bin daunim, na nau mi pilim orait liklik. Nau mi save olsem i gat ol narapela tu em ol i gat ol wankain hevi olsem mi. Long rot bilong oganaisesen bilong em, Jehova i kamapim ol dispela stori mi mas save long en bilong i stap strong.

D. S., long Amerika

Taim mi kaunim dispela stori, mi luksave olsem sik bilong mi i givim bikpela hevi moa long papamama bilong mi. Ol i tokim mi olsem sik bilong mi i kamap long rot bilong papamama na i stap insait long famili, na dispela i mekim ol i bel hevi tru. Taim mi lukim ol i bel hevi olsem, mi pilim sori nogut tru long ol.

Y. H., long Japan

Taim mi stap manki yet mi no gat sik. Tasol taim mi kamap yangpela, olgeta taim mi kisim kain kain sik. Mi kirap mekim wok bilong God long olgeta de, na long namba wan na namba tu mun mi no winim ol mak bilong mi, long wanem, mi gat sik. Man! Mi bel hevi nogut tru, mi gat tingting (kranki) olsem mi mekim samting i no stret long ai bilong Jehova na em i givim sik long mi olsem strafe. Dispela stori i helpim mi gut na i strongim bel bilong mi.

C. K., long Gana

Pikinini meri bilong mi i gat 9-pela krismas na em i gat hevi long lain gut na wanpela kain sik long kru (cerebral palsy). Em inap lain hariap long ol samting na em i save olsem sik bilong em i pasim em long mekim ol kain kain wok bilong olgeta de. Maski em i meri bilong lap na amamas, sampela taim sik bilong em i mekim na em i bel hevi. Dispela stori i strongim tru em. Na long olgeta nait papa i save stori wantaim em long Paradais bai kamap bihain na long dispela taim bai em i kamap wankain olsem ol narapela pikinini, na dispela tu i strongim em.

Y. P., long Amerika

Inap 10-pela yia mi wok strong long winim wanpela sik i no stap ples klia​—⁠mi gat sik long bel. Dispela sik i mekim na mi mas lusim wok bilong God long olgeta de. Taim mi kaunim dispela stori, em namba wan taim mi pilim olsem wanpela man i save tru long dispela hevi bilong mi. Bel bilong mi i stap isi taim mi save olsem i no mi wanpela tasol i gat dispela hevi. I olsem ol i rausim traipela hevi i stap long sol bilong mi. Mi tok tenkyu tru long yupela. Ol dispela stori i kamap long taim stret bilong strongim yumi long wok strong yet long dispela taim nogut bilong nau.

L. C., long Kanada

Gutpela Amamas  Mi wok long stadi long Baibel bilong kamap wanpela Witnes Bilong Jehova, na mi laik tok tenkyu long yupela i kamapim ol dispela stori “Painim Gutpela Amamas.” (Jun 8, 1997) Tru tumas, i gat wan wan program tasol long televisen i gutpela bilong lukim, na yupela i givim gutpela tok tru long mipela olgeta​—⁠ol yangpela na ol lapun. Mi laik bai yupela i wok yet long givim ol stori olsem dispela long mipela.

D. W., long Amerika