Em i Pilim Tru Long Bel
Gloria Adame i raitim pas olsem: “Mipela 13-pela pikinini insait long famili, 4-pela pikinini man na 9-pela pikinini meri. Long 1984 Papa i kam bek long ples, em long Meksiko, na em i kisim save olsem taim em i bin stap long Yunaitet Stets bilong mekim wok mani, famili bilong mipela i kirap stadi long Baibel wantaim ol Witnes Bilong Jehova. Papa i no amamas, na em i kirap long birua long mipela. I luk olsem long olgeta wan wan de belhat bilong em i go nogut moa.
“Mipela i laikim tru Papa, na mipela i laik bai em i ken kisim gutpela samting long dispela save bilong laip em mipela i kisim. Long olgeta de mipela i save beten strong long Jehova na askim em long opim rot bambai mipela inap toktok wantaim Papa long laik bilong Jehova. Jehova i harim beten bilong mipela, long wanem, em i givim strong long mipela long bung long olgeta nait long rum bilong sindaun, em rum Papa i save sindaun long en long olgeta nait bilong lukim televisen. Long dispela rum mipela ol pikinini meri i save bung wantaim Mama na kaunim teks bilong de bilong Baibel.
“Mama i go pas long mekim teks, na taim mipela kaunim pinis stori bilong teks, wanpela bilong mipela i beten. Taim liklik susa Marie i beten—long dispela taim em i gat 5-pela krismas tasol—em i save beten strong olsem: ‘Plis Jehova, mekim isi bel bilong Papa na bai em tu i kamap Witnes bilong yu.’ I luk olsem Papa i no harim mipela, long wanem, em i save mekim televisen i krai bikpela moa. Tasol bihain em i kirap long mekim krai bilong televisen i go daun liklik, na long wanpela nait em i pasim televisen olgeta.
“Long dispela nait—olsem mipela i save mekim long olgeta nait Mama i askim mipela, em taim bilong husat long kaunim teks. Man! Mipela i kirap nogut tru long Papa i tok: ‘Em taim bilong mi.’ Mipela i kirap nogut, tasol mipela i no toktok. Mama i no sakim em o givim sampela askim long em, tasol em i givim buklet, Skelim Sampela Tok Bilong Baibel Long Olgeta De long Papa. Taim em i go pas long lukautim teks, Mama i askim, em taim bilong husat long mekim beten. Papa i tok: ‘Em taim bilong mi.’
“Mipela i kirap nogut tru. Namel long beten, mipela i no inap pasim moa aiwara bilong mipela. Papa tu i kirap long krai, na em i askim Jehova long lusim tingting long ol tok bilas em i bin mekim long Em. Papa i askim Mama tu long lusim tingting long pasin birua em i bin mekim long mipela.
“Olsem na long 1986, Papa i no birua moa long mipela. Long 1990 famili bilong mipela i go sindaun long Teksas, long Yunaitet Stets. Long dispela taim, Papa i dediket long Jehova na i kisim baptais long wara bilong makim dediket bilong em, na 7-pela bilong mipela ol susa tu i kisim baptais. Long Epril 1997, ol i makim Papa long kamap wanpela elda Kristen. Inap long nau, pasin bilong skelim teks bilong de wantaim olsem famili em i bikpela samting tru long mipela, na pasin bilong beten long Jehova i strongim tru famili bilong mipela.”
[Piksa long pes 31]
1. Fopela pikinini meri, em ol i mekim wok painia long Meksiko. Marie i sanap long poret
2. Juanita na Isaac Adame, wantaim sampela pikinini bilong ol. Gloria i stap long han sut