Bihain Long Bikpela Win na Ren, Pasin Kristen i Win

WANPELA MAN LONG MOSAMBIK I RAITIM DISPELA STORI BILONG KIRAP!

LONG nait bilong Mas 2, 1998, bikpela win na ren i kamap long biktaun Maputo, Mosambik. Long moningtaim long de bihain, ol samting dispela bikpela win na ren i bin bagarapim i stap long olgeta hap. Ol diwai i bin pundaun ol i slip nabaut long nambis, bikpela wara i ran long ol rot na i bagarapim ol rot, win i bin rausim rup bilong sampela haus, na sampela narapela haus ol i bagarap.

Ol haus bilong brens-ofis bilong ol Witnes Bilong Jehova ol i sanap strong. Tasol wanpela haus i stap klostu long brens-ofis em i bagarap. Em wanpela haus nating ol i bin wokim long diwai na rup bilong en ol i wokim long kapa. Haus i no strong, olsem na taim strongpela win i kam, dispela haus i pundaun. Tasol gutpela tru na olgeta man i stap insait long haus, em wanpela meri na 5-pela pikinini bilong em, ol i no kisim bagarap. Tasol long ol samting bilong skin, ol i lus olgeta.

Long moningtaim tru, ol man i mekim wok volantia long brens-ofis bilong Sosaiti Was Taua, ol i go lukim dispela famili na famili hia i wok long painim ol samting bilong ol long dispela haus i bagarap pinis. Ol samting bilong ol i lus o bagarap na dispela i mekim na ol i bel hevi moa yet, long wanem, ol i no gat mani bilong wokim gen haus bilong ol. Ol i no gat papa, na ol i save kisim liklik mani tasol long rot bilong salim kaikai long maket.

Taim ol Witnes Bilong Jehova i skelim hevi bilong ol, wantu ol i redi long helpim dispela famili. Ol i lukim olsem ol samting ol i bin wokim olpela haus long en, ol i no inap mekim wok long en. Olsem na wanpela lain volantia ol i bungim ol samting bilong wokim haus, na ol i kirap wokim wanpela haus i liklik na i strong.

Ol man i stap klostu, pastaim ol i laik kisim save long samting ol i mekim, tasol i no longtaim na ol i kirap nogut long lukim ol Witnes i wokim haus hariap. Haus i redi pinis insait long 5-pela de na famili inap i stap long en. Taim mama bilong haus i go insait long nupela haus bilong em, em i no inap toktok. Tasol em i no gat wok long mekim sampela tok, long wanem, amamas bilong em na bilong ol pikinini i kamap ples klia taim ol wokman i lukim pes na ai bilong ol i lait, na dispela i kamapim klia olsem ol i tenkyu tru long ol.

Ol volantia tu ol i amamas, long wanem, rot i op na ol inap mekim sampela samting bilong kamapim long ples klia pasin bilong ol Kristen tru.​—⁠Galesia 6:⁠10.

[Ol Piksa long pes 31]

Mas 5

Mas 6

Mas 7

Ol Witnes i wokim gen haus bilong dispela famili