Traipela Win i No Bagarapim Ol!

Long olgeta hap ol nius i stori long bikpela bagarap em traipela win na ren ol i kolim Mits em i kamapim long yia i go pinis. Tasol planti ol i no stori long bikpela wok ol Witnes Bilong Jehova i bin mekim bilong helpim ol man i kisim bagarap long dispela traipela win nogut. Stori i kamap nau bai soim olsem wanem pasin Kristen tru na pasin bilong i stap olsem brata brata i win, maski bikpela bagarap i painim ol.

LONG Oktoba 22, 1998, solwara Karibian long hap bilong saut-wes i kamapim wanpela samting i kilim i dai planti man. Em i kirap olsem wanpela win bilong ples hat. Insait long 24 aua, em i kamap strongpela win na ol i givim nem Mits long en, na inap longpela taim ol manmeri bai tingim dispela nem na pret na bel hevi long en. Mits i kamap strong moa na em i go long hap not. Long Oktoba 26, em i kamap traipela win em spit bilong en i olsem 290 kilomita long wanpela aua, na sampela taim spit bilong en i winim 320 kilomita long wanpela aua.

Pastaim i luk olsem Mits bai kamap long Jameka na long ol ailan Keiman. Tasol dispela traipela win i tanim i go long hap wes na em i laik go stret long Belis long nambis bilong Sentral Amerika. Tasol Mits i no bagarapim yet wanpela hap​—⁠em i stap klostu tasol long hap not bilong nambis bilong Honduras. Na nau wantu tasol dispela traipela win i kirap long raun. Long Oktoba 30, Mits i bagarapim Honduras na em i kilim i dai planti man na bagarapim planti samting.

Mits i Bagarapim Honduras

Traipela ren i makim olsem Mits i kamap long ples bilong ol. Víctor Avelar, em i stap long Tegusigalpa na em i save mekim wok bilong God long olgeta de, em i tok: “Long Sarere long Oktoba 31, long wan klok long bikmoning, mipela i harim traipela pairap olsem klaut i save mekim. Wanpela liklik wara i kamap bikpela wara i ran strong! Wara i karim tupela haus i go wantaim ol man i stap insait long en na ol i singaut strong.” Long narapela hap bilong taun 32 manmeri i dai taim maunten i bruk na kam daun, na 8-pela bilong ol, ol i bin stadi long Baibel wantaim ol Witnes. Tasol i no gat wanpela Witnes i baptais pinis em i dai.

Kwiktaim ol bikman bilong Honduras ol i kirap helpim ol man, na ol i sanapim ol haus sel samting bilong ol refyuji. Na 12-pela kantri i salim sampela man na dispela lain man i kirap mekim wok bilong ol long helpim ol man. Ol Witnes Bilong Jehova tu i go pas long helpim ol man, na dispela i kirapim yumi long tingim tok bilong Baibel: “Wanem taim yumi inap mekim gutpela pasin long ol arapela, yumi mas mekim. Na yumi mas strong tru long mekim gutpela pasin long ol arapela manmeri i bilip long Bikpela.” (Galesia 6:10) Em nau, ol i kamapim ol komiti bilong helpim ol man. Taim ol Witnes i kisim save olsem ol taun i stap long nambis i bagarap tru, ol i stretim rot bilong helpim ol.

Wanpela Witnes, nem bilong em Edgardo Acosta, em i tok: “Long Sarere, long Oktoba 31, mipela i kisim wanpela liklik bot na go long hap i gat tait wara long en. Mipela inap helpim tupela brata,a tasol mipela i luksave olsem mipela i mas kisim bikpela bot bambai mipela inap helpim olgeta brata long lusim dispela hap. Olsem na mipela i kisim wanpela bikpela bot, na kirapim namba tu raun bilong mipela long Sande long bikmoning. Mipela i helpim olgeta wan wan brata bilong dispela kongrigesen wantaim sampela man i stap klostu long ol long lusim dispela hap​—⁠em 189 manmeri olgeta.”

Juan Alvarado i insait long wok bilong helpim ol man klostu long taun La Junta. Em i tok: “Mipela inap harim ol manmeri i krai olsem, ‘Helpim mipela!’ Dispela em i samting nogut tru, winim ol narapela samting nogut mi bin lukim bipo. Ol brata i kalabus olgeta long dispela hap. Planti ol i stap long rup bilong haus.” María Bonilla i abrusim dispela bagarap, em i tok: “Wara i raunim mipela i olsem solwara. Mipela olgeta i krai.” Tasol wok bilong helpim ol i karim gutpela kaikai. Humberto Alvarado i abrusim dispela bagarap, em i tok: “Ol brata i helpim mipela na ol i givim haus, kaikai, na klos tu long mipela.” Humberto i tok moa: “Wanpela man i lukim wok ol i mekim bilong helpim mipela, na em i tokim mipela olsem i no gat wanpela man long lotu bilong em i helpim em, ol Witnes Bilong Jehova tasol i bin mekim olsem. Nau em i bilip tru olsem ol Witnes Bilong Jehova i bihainim lotu i tru!”

Long taun La Lima, wanpela lain Witnes i kalabus i stap long wanpela haus. Wara i wok long kam antap, olsem na ol i wokim hul long rup na ol i go antap long sparen bilong haus. Wanpela Witnes, nem bilong em Gabi, em i tok: “Mipela i gat kaikai inap long sampela de. Taim kaikai i pinis, wanpela brata i go long wara bilong kisim ol kokonas, maski em inap i dai taim em i mekim olsem. Bilong mekim gut bel bilong mipela, mipela i mekim ol singsing bilong Kingdom.” Juan, em wanpela wokman bilong kongrigesen, em i tok: “Mipela i no ting mipela bai abrusim bagarap. Olsem na mipela i pasim tok long stadi long Wastaua, em wanpela nius bilong Baibel. Mipela olgeta i kirap na krai​—⁠mipela i ting dispela em i laspela taim mipela bai mekim stadi wantaim. Stadi i strongim mipela long karim dispela hevi.” Inap 8-pela de ol i karim dispela hevi, na bihain lain bilong helpim ol man i kam na kisim ol.

Tru, tait wara i no bagarapim ol, tasol ol narapela hevi i painim planti man i abrusim dispela hevi. Wanpela Witnes, nem bilong em Lilian, em i tok: “Bel bilong mi i bagarap stret taim ol samting bilong mi i lus, olsem ol klos, na ol sia na tebol samting, na ol poto bilong famili. Taim mi lukim haus bilong mi i pulap long graun malumalum, na pipia, na ol snek tu, em samting nogut tru!” Tasol lain brata Kristen i helpim ol gen. Lilian i tok: “Ol brata i kam na helpim mipela. Man bilong mi, em i no wanpela Witnes, em i askim mi olsem, ‘Olsem wanem yumi inap bekim dispela wok ol i bin mekim?’ Wanpela sista i bekim tok long mi olsem, ‘Yu no gat wok long tok tenkyu long mi. Mi sista bilong yu!’ ”

El Salvado i Pilim Strong Bilong Mits

Taim traipela win Mits i go long hap wes klostu long El Salvado, hap strong bilong en i pinis. Tasol em i gat strong yet long kilim i dai ol man. Long dispela taim, ol Witnes Bilong Jehova long El Salvado, ol i wok long stretim ol samting bilong kamapim “Bihainim Rot God i Makim” Kibung Distrik. Ol i ting olsem 40,000 manmeri bai kam long kibung. Taim Mits i wok long kam klostu, ol i ting ol brata bai no inap i kam long kibung. Ol wara i tait na karamapim ol gaden, na ol rot, na ol haus. Ol man i bin katim na rausim bikbus, olsem na ol hap maunten i bruk na i kam daun.

Nelson Flores em i wasman siaman bilong kongrigesen bilong ol Witnes Bilong Jehova long taun Silangera. Long Oktoba 31, long Sarere long moningtaim, em i kirap long slip na lukim narapela hapsait bilong wara em taun Silangera i bin i stap long en, i no gat wanpela samting i stap! Wara i bin rausim inap 500 haus! Nelson i tingting planti long ol brata spirit bilong em, nogut ol i dai, em i no tingim em yet taim em i kalap i go insait long wara i tait. Nelson i tok: “Taim mi kamap long hapsait bilong wara, mi sanap na mi traim long kisim save long wanem hap mi sanap long en. Long olgeta de, mi bin wokabaut long dispela hap taim mi autim tok long ol haus, tasol mi no inap painim wanpela samting mi luksave long en!”

Long dispela nait, inap 150 manmeri i bin dai long Silangera. Sampela bilong ol, em ol manmeri i bin stadi long Baibel wantaim ol Witnes Bilong Jehova. Tasol i no gat wanpela Witnes i baptais pinis em i dai.

I no longtaim na wok bilong helpim ol brata i kirap. Arístedes Estrada i helpim ol brata long stretim wok bilong helpim ol man, em i tok: “Ol i no larim mipela long i go insait long taun Silangera. Wara i wok long i go antap yet! Mi no inap lusim tingting long ol manmeri i singaut long ol i man helpim ol, tasol ol man bilong helpim ol i mas lusim ol, nogut ol yet bai kisim bagarap.” Tasol bihain, olgeta brata inap lusim dispela hap na ol i no kisim bagarap. Ol Haus Kingdom i kamap olsem kem bilong ol refyuji. Na tu, ol i makim sampela Witnes long stap long ol haus sik, na skul, na ol narapela hap bambai ol i ken sekim ol lista i gat nem bilong ol man i bin kisim hap bagarap o ol i nogat ples slip, bilong ol i ken save sampela em ol Witnes o nogat. Ol kongrigesen i stap klostu, kwiktaim ol i givim ol samting ol brata i mas kisim.

Tasol sampela taim i hatwok long kisim kaikai samting i go long ol hap bilong bungim ol samting. Ol brata bilong taun Korinto ol i lusim hap bilong ol na karim planti kaikai bilong gaden bilong ol yet, tasol hap maunten i bruk na kam daun na pasim rot bilong ol. Ol i mekim wanem? Ol i digim na rausim graun na wokim rot bilong ol! Pastaim, ol man i lukim samting ol brata i mekim, ol i ting ol i no inap wokim rot. Tasol bihain, hatwok bilong ol brata i kirapim ol man long helpim ol long klinim rot. Ol brata bilong Korinto ol i kamap long hap ol i laik i go long en na graun malumalum i pas long skin bilong ol, tasol ol i amamas long helpim ol brata.

Brens-ofis bilong Sosaiti Was Taua i kamap wanpela hap bilong bungim kaikai samting. Gilberto, em i wanpela brata i wok long brens-ofis na em i helpim wok bilong kisim kaikai samting i go long ol brata, em i tok: “Mi kirap nogut! Planti trak i kam, olsem na ol i mas makim ol volantia bilong soim ol draiva long hap stret bilong putim trak, na long soim rot long ol trak i ran long rot i stap klostu long brens-ofis.” Ol brata i bin givim inap 25 ton klos na 10-pela ton kaikai. Inap 15 volantia ol i mas wok inap wanpela wik long skelim gut ol klos na salim i go long ol brata.

Mits i Go Klostu Long Nikaragua

Mits i raun klostu long boda bilong Nikaragua, olsem na traipela ren i pundaun long dispela kantri tu. Planti tausen haus i bagarap olgeta, na wara i bagarapim ol haiwe. Klostu long taun Posoltega, hap maunten i bruk i kam daun na graun i karamapim sampela ples olgeta​—⁠winim 2,000 manmeri i dai.

Taim ol Witnes long Nikaragua i kisim save long dispela bikpela bagarap, ol i stretim rot long mekim bikpela wok bilong helpim ol brata. Ol i salim ol volantia long mekim bikpela wok em ol inap kisim bagarap long en​—⁠ol i mas painim ol brata bilong ol! Tupela lain Witnes​—⁠wanpela bilong Leon (em wanpela taun long hap saut bilong Posoltega) na wanpela bilong Sisigalpa (em wanpela taun long hap not)​—⁠ol i lusim Posoltega na olgeta wan wan brata i karim wanpela bek em kaikai samting i pulap long en na i hevi. Lain bilong helpim ol man i tokim ol brata olsem rot i bagarap olgeta, tasol ol brata i strong long i go.

Long Novemba 2, long moningtaim long Mande, ol brata bilong Leon ol i pulimapim kaikai samting long wanpela trak na ol i draivim trak i go long bris em wara i bin bagarapim. Taim ol i rausim pinis ol kago long trak, ol i makim 2-pela lain brata long raun long wilwil: Wanpela lain bilong i go long taun Posoltega, na narapela bilong i go long taun Telika em tait wara i bagarapim. Bilong kirapim wok, ol brata i beten. Wanpela bilong ol i tok: “Taim mipela i beten pinis, mipela i kisim bikpela strong.” Ol i mas kisim strong bilong mekim dispela wok. Ol i mas brukim ol bikpela baret, na bilong mekim olsem sampela taim graun i wel na ol i wokabaut na sampela taim ol i mas karim ol wilwil antap long sol bilong ol. Planti taim ol diwai i bin pundaun i pasim rot bilong ol. Na ol i mas lukim samting i nogut tru​—⁠bodi bilong ol man i dai pinis i trip antap long wara.

Tasol ol brata bilong taun Leon na Sisigalpa em ol i raun long wilwil, ol i kamap long Posoltega long wankain taim! Nerio López, em wanpela bilong lain i helpim ol man, em i tok: “Wilwil bilong mi i gat ol olpela taia. Mi ting olsem mi inap raun long en inap wanpela o 2-pela kilomita.” Tasol ol taia i no bagarap. Taim em i wok long kam bek, tupela taia i bruk. Ol brata ol i namba wan lain i kamap long dispela hap. Ol i amamas tru taim ol i bungim ol brata sista Kristen bilong dispela hap! Wanpela sista i tok: “Mi tenkyu tru long Jehova na long ol brata bilong yumi, long wanem, ol i strongim na helpim mipela. Mipela i no ting ol brata bilong mipela bai kam hariap bilong helpim mipela.”

Dispela em i namba wan raun bilong planti raun ol brata i mekim long wilwil bilong i go long ol taun em tait wara i bagarapim, na planti taim ol brata ol i namba wan lain i kam bilong helpim ol man. Ol manmeri bilong taun Lareinaga ol i lukim 16 brata i kam long wilwil! Aiwara bilong ol brata bilong dispela hap i pundaun taim ol i lukim hatwok bilong ol. Sampela taim hevi bilong kaikai samting ol brata i raun long wilwil ol i karim long baksait bilong ol, em i winim 20 kilo. Tupela brata i karim kaikai samting i go long taun El Gwayabo, na hevi bilong en i winim 100 kilo! Wanpela brata i karim planti kaikai samting long wilwil bilong em, na bilong mekim gut bel bilong em, em i tingting long tok bilong Baibel long Aisaia 40:29: “[Jehova] i save strongim ol man i no gat strong, na taim bun bilong ol i slek pinis, em i save mekim ol i stap strong.”

Ol Witnes long taun Tonala, ol i salim wanpela brata i go lukim ol brata i lukautim wok bilong helpim ol brata, bambai em i ken toksave long ol olsem klostu kaikai bilong ol bai pinis. Taim dispela brata i kamap long ol, em i kirap nogut long kisim save olsem ol i salim pinis kaikai samting i go long ples bilong em! Na taim em i kamap long haus, kaikai i stap pinis long haus bilong em. Marlon Chavarría, em i kisim kaikai samting i go long wanpela hap em tait wara i bagarapim klostu long Sinandega, na em i tok: “Long wanpela taun i gat 44 famili Witnes. Tasol 80 famili i kisim kaikai, long wanem, ol brata i givim hap kaikai bilong ol long ol narapela famili.”

Ol bikman i kisim save long dispela wok ol Witnes i mekim bilong helpim ol man. Bikman bilong taun Wamblan em i raitim wanpela pas i go long ol Witnes, na em i tok: ‘Mipela i rait bilong kisim save olsem, mipela inap kisim sampela helpim long yupela o nogat. Mipela i bin lukim pasin bilong yupela long helpim ol brata sista bilong yupela hia long Wamblan, na mipela i laik save olsem, yupela inap helpim mipela tu o nogat.’ Ol Witnes Bilong Jehova i helpim ol​—⁠ol i salim kaikai, marasin, na klos.

Win i Raun Long Guatemala

Taim Mits i lusim Honduras na El Salvado, wantu em i go long Guatemala. Sara Agustín, em wanpela Witnes i sindaun long hap saut bilong Guatemala Siti na pairap bilong bikpela wara i kirapim em long slip. Ples daun em haus bilong em i stap long en i tanim i kamap wanpela bikpela wara. Planti taim em i bin paitim dua bilong ol man i stap klostu long em bilong autim tok i tru bilong Baibel, tasol nau em i go long ol haus bilong kirapim ol man long slip! Bihain hap maunten i bruk na kam daun, na graun i karamapim haus bilong planti man i stap klostu long em. Sara i kisim wanpela savol, na em i kirap helpim ol man i no bin dai, na em i digim graun malumalum bilong rausim 7-pela liklik pikinini i pas insait long en. Sara em i meri bilong helpim ol mama taim ol i karim pikinini, na em i bin helpim mama bilong wanpela bilong ol dispela pikinini taim mama i karim em. Tasol sori tru, wanpela yangpela meri, nem bilong em Vilma, em i dai. I no longtaim i go pinis, na Sara i bin tilim sampela nius bilong Baibel long em.

Maski bikpela hap strong bilong Mits i pinis, bikpela ren i bagarapim tru ol gaden, na ol bris, na ol haus. Olsem na taim ol i salim planti kaikai samting long brens-ofis bilong ol Witnes Bilong Jehova long Guatemala, ol i ting i gutpela moa long givim dispela kaikai samting long ol brata long Honduras bilong helpim ol. Planti bris i bagarap na tait wara i karamapim ples balus, olsem na ol i mas salim kaikai samting long bot. Frede Bruun i wok long brens-ofis, em i tok: “Mipela i rentim wanpela bot em longpela bilong en inap 8-pela mita, na mipela i kisim wanpela ton marasin na kaikai i go long ol brata. Mipela i raun long solwara i gat biksi, na bihain mipela i kamap long nambis bilong taun Omoa na klos bilong mipela i wet olgeta.”

Ol Samting i Kamap Bihain Long Mits

I olsem Mits i laik pinis long hap saut-is bilong Meksiko. Tasol Mits i strong liklik yet, na i go long hap bilong not-is long sauten Florida, Amerika. Tasol i no longtaim na strong bilong Mits i pinis. Em i go bek long solwara Atlantik na kwiktaim em i pinis olgeta. Long Novemba 5, ol i no mekim moa ol toksave bilong traipela win.

Sampela saveman i tok, Mits em i “wanpela traipela win i bin kilim i dai planti man long hap bilong Wes, winim ol narapela traipela win insait long 200 yia i go pinis!” Ol i ting inap 11,000 manmeri i dai na planti tausen ol i lus yet. Winim 3 milion manmeri i no gat haus o planti samting bilong ol i bagarap. Carlos Flores Facusse, em presiden bilong Honduras, em i tok: “Ol samting mipela i bin wokim isi isi insait long 50 yia i pinis olgeta.”

Mits i bagarapim haus bilong planti Witnes Bilong Jehova. Sori tru, hap graun em haus bilong planti Witnes i bin i stap long en em i no stap moa! Tasol ol Witnes Bilong Jehova i stretim rot bilong helpim planti brata long stretim o wokim gen haus bilong ol.

Ol bikpela bagarap olsem traipela win Mits i kirapim yumi long tingim gen olsem yumi stap long taim “planti hevi nogut tru bai i kamap” long en. (2 Timoti 3:​1-5) Taim Kingdom bilong God i kirap bosim dispela graun, long dispela taim tasol ol bikpela bagarap i no ken painim ol manmeri. (Matyu 6:​9, 10; KTH 21:​3, 4) Tasol Ol Witnes Bilong Jehova i amamas tru Mits i no bin kilim i dai wanpela brata bilong ol.b Ol i bihainim tok long lusim hap bilong ol, na ol kongrigesen i stretim gut ol samting, na dispela i bin helpim planti long abrusim bagarap.

Insait long sampela mun i go pinis, ol Witnes Bilong Jehova long ol dispela kantri, ol i bin wok strong long stretim bek ol samting bambai ol i ken mekim gen ol wok bilong spirit. Olsem: Long El Salvado ol i stretim rot bambai ol brata i bin kisim hevi long dispela traipela win, ol i ken i go long kibung distrik i kamap sampela de bihain long Mits i bin bagarapim ples bilong ol. Ol i rentim ol bas bilong kisim ol dispela brata i go long kibung, na ol i stretim ples slip bilong ol. Na ol i givim marasin samting long ol sikman bambai ol tu inap i go long kibung! Gutpela kibung i bin kamap, na inap 46,855 i bung​—⁠ol i no bin ting bikpela lain olsem bai bung. José Rivera, em wanpela brata bilong El Salvado na Mits i bin bagarapim haus na bisnis bilong em, em i tok: “Dispela traipela win i bin bagarapim tru bel na tingting bilong mipela. Tasol taim mipela i lusim dispela kibung, bel na tingting bilong mipela i kamap gutpela, long wanem, ol brata i bin lukautim gut mipela.” Nau long ol dispela kantri, planti manmeri moa i go long ol miting bilong ol Witnes Bilong Jehova​—⁠dispela i kamap, long wanem, ol man i lukim wok bilong mipela long helpim ol narapela.

Tasol ating dispela gutpela pasin bilong ol brata i bin mekim bikpela samting long bel na tingting bilong ol Witnes yet. Carlos, em i bin abrusim bagarap long tait wara i bin kamap long Honduras, em i tok: “Bipo kain samting olsem i no bin painim mi. Mi pilim tru gutpela pasin sori bilong ol brata bilong mi.” Tru tumas, ol samting nogut traipela win Mits i bin mekim, ol man i no ken tingim moa. Tasol pasin sori ol Witnes Bilong Jehova i bin mekim​—⁠em planti ol i bin redi long i dai bilong helpim ol brata bilong ol​—⁠em samting ol man bai i no ken lusim tingting long en.

[Ol Futnot]

[Blok/Piksa long pes 23]

Ol Witnes i Stap Klostu i Helpim Ol

TAIM ol man bilong tokaut long ol samting bilong san, win, na ren ol i tok olsem traipela win Mits bai bagarapim Belis, ol manmeri bilong dispela kantri ol i redim ol yet long samting nogut win bai kamapim. Gavman i tokim ol man long lusim olgeta ples i stap long nambis na ples daun, olsem na ol Witnes Bilong Jehova i harim tok na ol i go long biktaun Belmopan, em i stap insait inap 80 kilomita, o ol i go long sampela taun i stap long maunten samting.

Tasol gutpela tru, Mits i no bagarapim Belis. Tasol taim ol i harim bikpela bagarap i bin painim ol brata bilong ol long Honduras, Nikaragua, na Guatemala, ol brata long Belis ol i givim kaikai, klos, klinpela wara bilong dring, na mani long ol.

Dispela gutpela samting ol i mekim, em i pasin tru bilong ol brata long ol kantri i stap klostu. Ol Witnes long Kosta Rika, ol i salim 4-pela traipela bokis ain em kaikai, klos, na marasin i pulap long en. Ol brata long Panama, ol i stretim 4-pela ples bilong kisim, na skelim, na putim ol samting long ol bokis em ol brata i bin givim long ol. Insait long sampela de tasol, ol i bungim inap 20,000 kilo kaikai samting. Wanpela man i no Witnes, em i tok: “Mi ting olsem ami em i namba wan lain bilong stretim wok bilong helpim ol man. Tasol nau mi save olsem ol Witnes Bilong Jehova ol i namba wan lain long mekim olsem.” Nau ol Witnes i save go lukim dispela man na toktok wantaim em long tok i tru bilong Baibel.

Wanpela brata i gat ol bikpela trak bilong karim kago, em i givim wanpela semitrela na wanpela draiva (i no Witnes) bilong kisim ol kaikai samting i go long Nikaragua. Lain i wok long boda bilong Panama na Kosta Rika, ol i no sekim kago bilong dispela trak taim ol i larim trak i brukim boda bilong ol. Wanpela sevis-stesin i givim nating disel bilong pulimapim tupela teng bilong trak, na trak inap i go na i kam bek long dispela disel! Lain i wok long boda bilong Nikaragua, ol tu i no sekim kago ol brata i kisim i kam. Ol i tok: “Sapos dispela kago i kam long ol Witnes Bilong Jehova, mipela i no gat wok long sekim kago. I no gat wanpela taim ol Witnes i bin givim hevi long mipela.”

Tasol ol i no inap kisim kago i go long Honduras long trak samting. Tasol wanpela sista Kristen i wok long haus embasi bilong Honduras, em inap stretim ol samting long rot bilong embasi, na ol i putim nating kago long balus i go long Honduras! Long dispela rot ol i salim bikpela hap kago, hevi bilong en inap 10,000 kilo.

Sampela man i no Witnes, ol i pilim tru wok bilong ol Witnes bilong helpim ol man. Sampela kampani i givim nating ol katon, na stiki-tep, na ol strongpela plastik bilong putim ol samting long en. Sampela narapela kampani i givim mani o ol i daunim pe bilong ol samting. Lain i wok long ples balus long Panama, bel bilong ol i kirap tru taim ol i lukim 20 Witnes i helpim wok bilong rausim kago long balus, em ol i laik salim i go long Honduras. Long de bihain, sampela wokman bilong ples balus ol i givim mani samting ol i bin bungim namel long ol yet.

[Blok long pes 24]

Wankain Wok i Kamap Long Meksiko

TRAIPELA win Mits i no bagarapim Meksiko tumas. Tasol inap sampela wik paslain long dispela win i kamap long Sentral Amerika, bikpela tait wara i kamap long provins Siapas. Inap 350 ples i kisim bagarap, na sampela taun i pinis olgeta.

Bikpela tait wara i kamapim planti hevi long ol Witnes Bilong Jehova long dispela hap. Tasol ol elda bilong ol kongrigesen long dispela hap, ol i wok hariap na planti taim dispela i mekim na ol Witnes i no kisim bikpela hevi tumas. Olsem: Long wanpela liklik ples, ol elda i go lukim olgeta wan wan brata na sista, na tokim ol long i go long Haus Kingdom sapos ren i wok long pundaun yet. Ol i ting Haus Kingdom i strongpela haus, winim ol narapela haus long dispela ples. Long bikmoning, tupela wara i tait na i bagarapim dispela taun! Ol Witnes​—⁠na sampela man i stap klostu long ol​—⁠ol i abrusim bagarap taim ol i go long rup bilong Haus Kingdom. I no gat wanpela Witnes i dai.

Tasol inap 1,000 Witnes long Meksiko, ol i mas i go na stap long ol haus em gavman i redim bilong ol man i ken hait long en. Inap 156 haus bilong ol Witnes i bagarap olgeta, na 24 i bagarap liklik. Na 7-pela Haus Kingdom i bagarap olgeta.

Olsem na ol i kamapim 6-pela komiti bilong helpim ol Witnes Bilong Jehova na ol man i stap klostu long ol. Kwiktaim ol i givim kaikai, klos, blanket, na ol narapela samting long ol. Taim ol i tokim ol bikman long wok bilong ol Witnes long helpim ol man, ol bikman i tok: ‘Ami i no bin helpim ol man hariap olsem ol Witnes i bin mekim.’

Inap longpela taim, ol Witnes Bilong Jehova i gat nem olsem lain i gat stretpela pasin, na planti taim dispela i bin helpim ol. Olsem: Lain bilong wanpela ples i askim ol bikman long helpim ol, na ol bikman i askim ol, i gat sampela Witnes i stap long ples bilong ol o nogat. Taim ol i tok yes, ol bikman i tokim ol olsem: “Orait, kisim wanpela i kam long mipela bambai mipela i ken givim ol samting long em long tilim!”

Wanpela elda long kongrigesen bilong dispela hap em i stori gut long dispela samting i bin kamap: “Ol brata i gat gutpela tingting maski dispela bikpela hevi i painim ol. Planti brata bilong ol ples i stap klostu long mipela, ol i givim kaikai na ol nius bilong Baibel long mipela bilong strongim mipela, maski ol inap i dai taim ol i mekim olsem. I gat planti samting mipela i ken tok tenkyu long Jehova long en.”

[Mep/Piksa long pes 18]

Meksiko

Guatemala

Belis

El Salvado

Honduras

Nikaragua

Kosta Rika

[Piksa long pes 19]

HONDURAS

◼ Wara Gwaserike

[Ol Piksa long pes 20]

EL SALVADO

◼ Bikrot bilong Silangera

◼ José Lemus na ol pikinini meri bilong em na Haus Kingdom tu, ol i abrusim bagarap

◼ José Santos Hernandez, long ai bilong haus bilong em i bagarap olgeta

[Ol Piksa long pes 21]

NIKARAGUA

◼ Namba wan lain i raun long wilwil i go long Telika

◼ Ol Witnes long El Gwayabo ol i amamas long kisim bek kaikai

[Ol Piksa long pes 22]

NIKARAGUA

◼ Namba wan haus em ol volantia i wokim gen

◼ Ol Witnes bilong ol kongrigesen i stap klostu ol i putim kaikai long ol paus

[Piksa long pes 22]

GUATEMALA

◼ Sara i helpim 7-pela pikinini long lusim graun malumalum