Mi Lusim Pasin Bilong Pait

Stori bilong Jose Antonio Nebrera

WANEM samting i kirapim man long kamap man bilong pait na bagarapim man? Mi kisim bikpela save long dispela pasin taim mi pikinini yet. Papa bilong mi i insait long lain polis bilong Spen, em ol i strong long ol man i mas bihainim lo. Bubu man i bin paitim em planti taim, na Papa i kisim pasin bilong em. Planti taim Papa i yusim strongpela let bilong em long paitim mi. Na samting i mekim hevi i bikpela moa, em oltaim em i kolim mi longlong, tasol em i save laikim tru yangpela susa bilong mi. Mama bilong mi i pret long belhat bilong Papa, na em i no mekim wanpela samting bilong mekim gut bel bilong mi o soim pasin laikim long mi.

Taim mi stap long skul wantaim ol narapela pikinini, mi save piksaim long tingting olsem mi stap long wanpela gutpela hap i gat amamas long en. Ating long ai bilong ol narapela, mi wanpela pikinini i stap amamas. Tasol tru tru mi no amamas. Mi haitim tasol pret na kros mi pilim long bel. Na long pinis bilong olgeta wan wan de taim mi wokabaut isi isi i go long haus, mi tingim na pret long ol tok nogut Papa bai mekim long mi​—⁠o paitim mi.

Taim mi gat 13 krismas, mi ranawe long dispela haus i no gat pasin laikim long en, na mi go long wanpela boding skul bilong Misin Katolik. Inap sotpela taim mi tingting long kamap pris. Tasol skul i no mekim na laip bilong mi i gat as bilong en. Mipela i mas kirap long 5 klok long moning na waswas long kolwara. Bihain long en, de olgeta mipela i stadi, beten, na mekim ol wok lotu, na mipela malolo inap sotpela taim tasol.

Mipela ol sumatin i mas ritim stori bilong ol lain ol i kolim santu, mipela i no stadi long Baibel. I gat wanpela Baibel tasol i stap insait long wanpela glas kabot, na bilong ritim dispela Baibel mipela i mas kisim tok orait pastaim.

Long namba 3 yia bilong mi long boding skul, ol i makim taim we mipela i mas paitim mipela yet​—⁠ol i kolim dispela olsem pasin bilong lotu​—⁠mipela i mas mekim dispela samting planti taim. Mi traim long daunim bikpela kaikai bilong mekim mi sik na bai mi ken abrusim dispela samting. Tasol dispela i no wok. Bihain long 3-pela yia, mi no inap tru long karim moa dispela hevi. Mi ranawe long dispela skul na go bek long haus. Mi gat 16 krismas.

Painim Samting Bilong Kisim Amamas

Taim mi stap gen long ples, mi kirap boksen na resling. Mi mekim gut ol dispela spot, na dispela i mekim na mi ting mi man tru. Tasol save bilong mi long pait i kirapim mi long yusim strong bilong mi long kisim samting mi laikim, wankain olsem Papa i bin mekim.

Tasol taim mi gat 19 krismas, samting i kamap we i kirapim mi long mekim gut long narapela. Mi bungim Encarnita, na 9-pela mun bihainim mipela i marit. Em i lukim tasol pasin bilong mi long amamas na mekim gut long narapela, tasol em i no save liklik olsem mi save bel nogut long ol samting. Bihain liklik, dispela bel nogut i kamap ples klia taim ol i singautim mi long insait long ami bihain liklik long namba wan pikinini bilong mipela i bon.

Mi les long kisim stail gras bilong ami, na tu, mi laik painim ol samting i givim amamas long mi, olsem na mi volantia nating long insait long narapela lain ami (Spanish Foreign Legion). Mi piksaim long tingting olsem mi stap fri long ples nating bilong Moroko, na insait long ol spesel wok bilong ami we mipela i mas soim strong bilong mipela. Na tu, mi ting dispela i opim rot long mi ken ranawe long wok bilong mi long lukautim famili. Tasol dispela i mekim na pasin bilong mi i go nogut moa.

I no longtaim na mi gat hevi wantaim wanpela traipela sajen husat i amamas long mekim nogut long ol nupela soldia. Mi heitim tru pasin i no stret, na mi redi long pait long samting mi ting i stret long pait long en. Taim ol i kolim nem bilong ol soldia long wanpela moning, mi mekim wanpela tok pilai em dispela sajen i kisim tingting kranki long en. Taim em i apim han bilong paitim mi, kwiktaim mi tanim han bilong em na subim em i go daun long plua. Mi no lusim han bilong em, mi pret nogut em bai sutim mi long gan bilong em.

Dispela samting i mekim na inap 3-pela mun mi stap insait long wanpela grup soldia i kisim strafe. Mi stap wantaim 30 narapela man insait long wanpela liklik rum i no gat wanpela samting long en. Insait long dispela haptaim, mi no inap senisim klos bilong mi. Sajen bilong dispela grup soldia i kisim amamas long paitim nating ol dispela soldia. Tasol wanpela taim mi tokim em olsem bai mi kilim em i dai sapos em i tatsim mi, olsem na em i no wipim mi 30 taim, em i wipim mi 3-pela taim. Mi lain pinis long mekim wankain hatpela pasin olsem ol man husat i mekim nogut long mi.

Ol Wok Hait

Taim mi kisim trening insait long dispela lain ami, mi volantia nating long mekim sampela wok moa we mi ting mi bai kisim amamas long en. Long dispela taim tu, mi no save mi bai insait long wanem samting. Mi kisim sampela ami trening moa we mi lain long yusim olgeta kain gan na bom samting. Bilong pinisim trening, ol i salim mi i go long Langley, Virginia, Amerika, we mi kisim trening wantaim lain CIA.

I no longtaim na mi insait long wanpela kain grup ami i mekim wok hait. Namel long 1960 i go 1969 samting, mi insait long planti wok hait. Mi helpim wok bilong painim ol lain i mekim wok bisnis long ol drak na ol gan long Sentral na Saut Amerika. Ol bikman i tokim mipela olsem taim mipela i painim ol dispela lain, mipela i mas kilim ol i dai. Mi sem long tokaut olsem mi yet i bin insait long dispela wok. Mipela i kilim i dai olgeta dispela kain man, tasol mipela i no kilim ol man em ol bikman i laik sutim ol askim long ol bilong kisim save long wok bilong ol.

Bihain ol i makim mi long spai long ol bikman bilong ami bilong Spen, bilong painim ol man i no sapotim wok bos bilong Jeneral Franco. Mipela i spai tu long ol man i stap long Frans em ol i birua long gavman bilong Frans. Mipela i mas kidnepim ol man i go pas long birua long gavman na kisim ol i go long Spen, ating bilong kilim i dai ol dispela man.

Laspela wok bilong mi, em mi mas bungim lain soldia bilong daunim gavman bilong wanpela liklik kantri long Afrika. Ol i tokim mipela long i go pait long ami bareks long nambawan taun bilong kantri na kirap bosim haus bilong presiden. Olsem mipela i bin plen, mipela i go insait long kantri long biknait na pinisim wok insait long 4-pela aua tasol. Inap 3-pela wansoldia bilong mi i dai long dispela pait, wantaim planti soldia bilong lain “birua.” Mi yet i insait long dispela wok bilong kilim ol man.

Dispela samting nogut i mekim na bel i kotim mi. Mi no inap slip, long wanem, oltaim mi kisim ol driman nogut we mi pait na kilim i dai ol birua bilong mi. Long ol dispela driman nogut, mi inap lukim pret long ai bilong ol man em mi bai kilim ol i dai.

Mi pasim tok long bel olsem mi no inap insait gen long narapela pait. Olsem na mi givim bek olgeta pepa samting bilong mi long ami na lusim wok ami. Tasol 3-pela mun bihain ol bikman bilong ami i singautim mi gen long insait long wanpela wok spai. Mi ranawe i go long Swiselan, na sampela mun bihain, meri bilong mi, Encarnita, i kam stap wantaim mi long Basel​—⁠em i no save liklik long wok mi save mekim olsem wanpela spai.

Hatwok Long Lusim Pasin Nogut

Insait long 3-pela yia mi mekim wok ami, Encarnita i bin kirap stadi long Baibel long Spen wantaim ol Witnes Bilong Jehova. Em i tokim mi olsem em i painim pinis stretpela save long God, na amamas bilong em i kirapim tingting bilong mi. Olsem na kwiktaim mipela i painim ol Witnes long Swiselan na mitupela wantaim i kirap stadi long Baibel.

Mi amamas tru long kisim save long samting God i tingting pinis long mekim. Maski mi laik kirap bihainim ol stiatok bilong Baibel, mi hatwok long senisim pasin bilong mi, na moa yet pasin bilong mi long belhat na kros. Tasol mi laikim tru nupela bilip bilong mi. Taim mi bin stadi inap sampela mun tasol, mi strong olsem mi redi long autim tok long ol haus wantaim ol Witnes Bilong Jehova.

Long helpim mi kisim long Jehova, mi lain long bosim gut bel, na bihain mi na Encarnita i kisim baptais. Taim mi gat 29 krismas, ol i makim mi long kamap wanpela wasman bilong kongrigesen.

Long 1975, mipela i go bek long Spen. Tasol ami i no lusim tingting long mi, ol i singautim mi long insait long wanpela spesel wok. Bilong abrusim ol hevi, mi ranawe gen i go long Swiselan. Famili bilong mipela i stap long hap i go inap 1996, na long dispela yia mipela i go bek gen long Spen.

Long nau pikinini man na pikinini meri bilong mi ol i marit na mi gat 2-pela bubu, olgeta i mekim wok bilong Jehova. Na tu, insait long ol dispela yia, mi bin helpim 16 man long kisim save long Jehova, em wanpela bilong ol i wanpela yangpela man em bipo i bikhet na insait long ol protest mats long noten Spen. Dispela wok i bin givim bikpela amamas tru long mi.

Planti taim mi beten askim God long helpim mi long lusim pasin bilong mi long pait, na long mi no ken kisim ol driman nogut. Taim mi hatwok long mekim pasin i stret, mi bihainim tok bilong Song 37:​5, em i tok: “Yu mas putim laip bilong yu long han bilong Bikpela. Bilip strong long em, na em bai i helpim yu.” Jehova i bihainim dispela tok promis bilong em. Em i bin helpim mi long lusim pasin bilong mi long pait. Dispela em i bikpela blesing tru long mi na famili bilong mi.

[Piksa long pes 29]

Taim mi gat 13 krismas, mi go long boding skul bilong Misin Katolik

[Piksa long pes 31]

Taim mi lusim wok ami long 1968

[Piksa long pes 31]

Mi wantaim meri bilong mi, Encarnita, long nau