Stretim Gut Ol Wok na Stap Amamas
SAPOS yumi stretim gut ol wok ol samting i kamap gut. Sapos yumi mekim gut ol wok, taim na ol samting bilong yumi i no lus nating. (Galesia 6:16; Filipai 3:16; 1 Timoti 3:2) Tasol wanpela samting i winim pasin bilong stretim gut na mekim gut ol wok. Man bilong raitim Song i tok: “Ol manmeri i putim [Jehova] i stap God bilong ol, ol tu i ken amamas.” (Song 144:15) Tasol i hatwok long stap amamas na stretim gut ol wok.
Stretim Gut Ol Wok na Stap Amamas
God Jehova i nambawan long soim yumi pasin bilong stretim gut ol wok. Olgeta samting em i bin wokim i soim yumi em i wokim gut ol samting na i stret olgeta. Olsem: Ol liklik hap bilong skin na bodi olgeta na ol liklik atom, na ol traipela samting olsem sta i stap long antap. Ol lo em i putim i helpim yumi na yumi ken sindaun gut. Yumi save san bai kam antap long olgeta moning, na taim bilong san i kamap bihain long taim bilong kol.—Stat 8:22; Aisaia 40:26.
Jehova i God bilong stretim gut ol samting, em i God bilong amamas tu. (1 Timoti 1:11; 1 Korin 14:33) Pasin amamas bilong em i kamap ples klia long ol samting em i bin wokim. Ol liklik pusi i pilai, na naispela skai taim san i go daun na gutpela kaikai na planti ol narapela samting i soim yumi em i laik yumi stap amamas. Ol lo bilong em i no pasim yumi nating, nogat, ol i lukautim yumi na bai yumi stap amamas.
Krais Jisas i wankain olsem Papa bilong em. Jisas “em i as bilong pasin tru bilong amamas” na em i mekim wankain pasin olsem papa bilong em. (1 Timoti 6:15; Jon 5:19) Taim em i wok wantaim papa bilong em long wokim ol samting, em i “olsem saveman i bosim wok.” Na em i amamas long mekim wok. “Olgeta de . . . [em i] amamas tumas . . . long lukim dispela graun na ol manmeri i stap long en.”—Sindaun 8:30, 31.
Yumi laik bihainim wankain gutpela pasin na amamas long olgeta samting yumi mekim, na mekim gut long olgeta manmeri. Tasol sampela taim yumi tingting strong long mekim gut na pinisim kwik wok na yumi lusim tingting long “larim Holi Spirit i stiaim olgeta wokabaut bilong yumi” na kamapim ol gutpela pasin bilong spirit bilong God. (Galesia 5:22-25) Olsem na gutpela yumi askim yumi yet: Olsem wanem yumi ken stretim gut ol wok na stap amamas long ol samting yumi mekim, na ol wok yumi bosim?
No Ken Nogutim Yu Yet
Skelim tok bilong Sindaun 11:17. Pastaim em i tok, “Sapos yu sori long narapela man . . . long dispela pasin yu mekim gut long yu yet,” na bihain em i tok moa: “Tasol sapos yu mekim nogut long arapela man, em i olsem yu mekim nogut long yu yet.” Baibel New International Version i raitim dispela tok olsem: “Gutpela man i helpim em yet, tasol man nogut i nogutim em yet.”
Olsem wanem yumi inap nogutim yumi yet? Maski yu gat laik long mekim gutpela samting, sapos ol samting bilong yu i paul nabaut, bai yu nogutim yu yet. Wanem samting bai kamap? Wanpela saveman i tok: “Yumi lusim tingting o wanpela pepa i lus o yumi no harim gut wanpela tok o yumi no raitim stret ol tok yumi kisim long telefon—ol dispela liklik samting i bagarapim wok, na i daunim pasin bilong mekim gut ol wok na laik bilong yumi long stretim gut ol wok.”—Buk Teach Yourself Personal Efficiency.
Dispela tok i stret wantaim tok bilong Baibel: “Lesman i wankain olsem man i save bagarapim ol samting.” (Sindaun 18:9) Yes, ol man i no stretim na mekim gut ol wok, ol inap givim hevi na bagarapim wok bilong ol yet na bilong ol narapela tu. Olsem na ol narapela i abrusim ol. Pasin les bilong ol i mekim na ol i putim hevi long ol yet.
Dok i Gat Laip o Laion i Dai Pinis?
Tasol yumi inap nogutim yumi yet sapos yumi putim mak i antap tumas na yumi hatwok long winim. Dispela saveman i tok moa: “Yumi ken putim mak long kamap gutpela olgeta na dispela mak i antap tru, tasol sapos yumi mekim olsem, bihain bai yumi bel hevi na tingting bai bagarap.” Man i laik mekim ol samting i kamap stret olgeta na i no popaia liklik ating em inap stretim na mekim gut ol wok, tasol i no gat wanpela taim em i amamas tru. Bel hevi bai painim em.
Sapos yumi gat dispela pasin olsem yumi laik mekim ol samting i kamap stret olgeta, yumi mas tingim dispela tok: “Dok i gat laip i winim laion i dai pinis.” (Saveman 9:4) Tru, ating bai yumi no kilim yumi yet sapos yumi taitim bun long mekim ol samting i kamap stret olgeta, tasol yumi inap nogutim yumi yet, long wanem yumi pinisim nating strong bilong yumi. Wanpela saveman i tok: “Dispela i pinisim strong bilong skin, bel, tingting na pasin bilong stap gut wantaim ol narapela.” (Job Stress and Burnout) Sapos yumi pinisim strong bilong yumi long winim wanpela mak i antap tumas, yumi nogutim yumi yet na mekim i dai amamas bilong yumi.
Mekim Gut Long Yu Yet
Tingim: “Sapos yu sori long narapela man . . . long dispela pasin yu mekim gut long yu yet.” (Sindaun 11:17) Yumi mekim gutpela pasin long yumi yet sapos yumi putim ol mak i stret long yumi na i no antap tumas. Yumi save, Jehova em God bilong amamas na em i save wanem mak i stret long yumi. (Song 103:8-14) Bai yumi stap amamas sapos yumi tingim mak bilong strong na save bilong yumi yet na yumi “wok strong” long mekim wok long dispela samting bilong mekim gut ol wok bilong yumi.—Hibru 4:11; 2 Timoti 2:15; 2 Pita 1:10.
Tasol yumi mas was gut, nogut yumi kamap lesman o yumi wok isi isi tasol. No ken lusim tingting long bekim bilong Jisas taim aposel Pita i tok: “Bikpela, . . . dispela samting i no inap kamap long yu.” Dispela tingting bilong Pita i kranki tru, long wanem, Jisas i mas pinisim wok bilong em, olsem na em i tok: “Satan, yu go baksait long mi. . . . Yu no bihainim tingting bilong God. Nogat. Yu bihainim tingting bilong ol man tasol.” (Matyu 16:22, 23) Sapos yumi laik mekim gut long yumi yet, yumi no ken tingim laik bilong yumi yet tasol na mekim nating ol wok. Sapos yumi mekim olsem bai yumi no amamas. Yumi mas tingting stret, nogut yumi strong tumas long mekim ol samting i winim skel bilong yumi.—Filipai 4:5.
Mekim Gutpela Pasin Long Ol Narapela
Ol saveman na Farisi long taim bilong Jisas i ting ol i stretim na mekim gut ol wok. Wanpela buk (A Dictionary of the Bible) i toktok long lotu bilong ol olsem: “Ol i putim planti ol liklik liklik lo antap long ol lo bilong Baibel. Ol i no tingim ol senis long sindaun bilong ol manmeri o narapela narapela sindaun bilong ol; ol i strong long olgeta Juda i mas bihainim Lo na ol liklik liklik hap bilong en . . . Ol lo i kamap planti tru inap long lotu bilong ol i kamap olsem bisnis na ol i kisim bikpela hevi long sindaun bilong ol. Ol man i mekim pasin olsem wanpela masin tasol. Maus bilong bel bilong ol i no gat tok moa; strong bilong tok bilong God i no kamap klia moa, ol i karamapim long lo bilong ol yet.”
Olsem na Jisas i sutim tok long ol olsem: “I olsem ol i save pasim karamap i hevi tumas na putim antap long sol bilong ol man, na ol man i hatwok tru long karim. Tasol ol yet i no laik putim pinga tasol bilong helpim ol man long karim.” (Matyu 23:4) Ol elda i gat pasin sori ol i no putim hevi long ol sipsip bilong God long ol kain kain lo na tambu. Ol i mekim gut long ol sipsip na bihainim gutpela pasin bilong Krais Jisas.—Matyu 11:28-30; Filipai 2:1-5.
Maski ol elda i gat planti wok, ol i no lusim tingting olsem ol i wok wantaim ol manmeri em God i laikim ol. (1 Pita 5:2, 3, 7; 1 Jon 4:8-10) Ol i no tingim wok tasol na ol lo bilong wok. Nogat. Ol i tingim namba wan bikpela wok bilong ol em wok wasman, na wok bilong lukautim ol sipsip bilong God.—Sindaun 3:3; 19:22; 21:21; Aisaia 32:1, 2; Jeremaia 23:3, 4.
Sapos yumi tingim tumas ol namba na sedyul, ating bai yumi no tingim gut ol narapela. Yu ken tingim wanpela draiva bilong bas, em i tingim taim na sedyul tasol. Em i tingting tasol long pinisim raun bilong em long taim em i makim. Tarangu, long tingting bilong em, em i ting ol pasindia i pasim rot bilong em. Ol i isi isi tumas na ol i no stretim gut ol samting na oltaim ol i kamap taim bas i laik go. Em i no tingim gut as bilong dispela wok bilong em long helpim ol pasindia. Em i tingim ol olsem samting i pasim rot bilong em long pinisim kwik wok bilong em na em i no laikim ol.
Tingim Ol Wan Wan
Sapos yumi tingting tasol long mekim gut na pinisim kwik ol wok, planti taim bai yumi no tingim ol narapela. Ating yumi ting, ol dispela man i no strong tumas o ol i no save wok hariap na ol i no inap helpim wok bilong yumi. Sapos yumi ting olsem, samting nogut inap kamap. Olsem: Bipo long taun Sparta long Grik ol pikinini i sik o i no strong, ol i larim ol i dai, long wanem ol i no inap kamap strongpela soldia bilong mekim gut wok. Wanpela saveman (Bertrand Russell) i tok, “Taim mama i karim pikinini, papa i bringim dispela pikinini long ol bikman bilong famili na bai ol i ken skelim dispela pikinini. Sapos em i no sik ol i givim em bek bilong papamama i ken mekim bikpela long em, tasol sapos em i sik ol i tromoi em long wanpela hul i gat wara.”—Buk History of Western Philosophy.
Hatpela pasin i stap long dispela provins nogut. (Lukim Saveman 8:9.) Ating gavman bilong ol Sparta i ting, dispela pasin bilong ol i gutpela, long wanem, ol i stretim gut na kwik planti samting, tasol ol i sot tru long gutpela pasin na pasin sori. Ol i no bihainim pasin bilong God. (Song 41:1; Sindaun 14:21) Ol wasman bilong kongrigesen Kristen i narapela kain, ol i tingim olgeta sipsip bilong God i olsem samting i gutpela tumas long ai bilong God na ol i mekim gut long olgeta wan wan. Ol i no tingim tasol ol 99 sipsip i stap gut, nogat, ol i tingim tu dispela wanpela sipsip i no gat strong o bel bilong em i no stap isi.—Matyu 18:12-14; Aposel 20:28; 1 Tesalonaika 5:14, 15; 1 Pita 5:7.
Pas Gut Wantaim Ol Sipsip
Ol elda i lukautim ol sipsip na ol i pas gut wantaim ol. Tasol sampela saveman i skelim wok bisnis i tok sapos ol bos i laik bai ol wokman bilong ol i mekim bikpela wok, ol i no ken poroman wantaim ol. Wanpela bilong ol dispela saveman i stori long wanpela kepten bilong ol ami i pait long balus. Dispela saveman i tok olsem: “Taim em i poroman gut wantaim ol wokman bilong em ol i no pret na ol i no tingting planti long mekim gut wok bilong ol. Tasol taim em i surik long ol na em i kamapim namba bilong em olsem em i bos bilong ol, ol wokman bilong em i tingting planti, wok bilong ol i kamap gutpela o nogat, na ol i givim bel long mekim wok. Dispela pasin i mekim na ol i luksave olsem wok long kem bilong ami hia i bin kamap gutpela moa.”—Buk Understanding Organizations.
Tasol kongrigesen Kristen i no wanpela lain ami. Ol elda Kristen i bosim wok ol i bihainim pasin bilong Krais Jisas. Oltaim em i bin pren gut wantaim ol disaipel bilong em. (Matyu 12:49, 50; Jon 13:34, 35) Em i no pretim ol bilong hariapim ol long mekim gut wok bilong ol. Em i mekim ol samting na bai narapela i ken bilip na tingim narapela. Dispela pasin i stap namel long Jisas na ol disaipel bilong em, na pasin bilong givim bel i pasim ol wantaim. (1 Tesalonaika 2:7, 8) Sapos gutpela pasin pren olsem i stap insait long lain bilong God, na sapos pasin sori bilong God i kirapim ol, bai ol i amamas na givim bel tru long mekim wok bilong God. Na i no gat wanpela man i mas subim ol.—Lukim Kisim Bek 35:21.
Planti ves long Baibel i kamapim ol pasin Kristen olsem amamas na pasin bilong givim bel long ol brata sista. (Matyu 5:3-12; 1 Korin 13:1-13) I no planti ves i toktok long pasin bilong pinisim kwik na mekim gut ol bikpela wok. Tru, yumi mas stretim gut ol wok. Long olgeta taim ol manmeri bilong God i bin stretim gut ol wok. Tasol tingim ol man bilong raitim Buk Song, planti taim tru ol i tok, lain bilong God i amamas. Song 119 i mekim planti tok long ol kain kain lo bilong Jehova na i kirap olsem: “Ol man i wokabaut stret . . . na i save bihainim lo bilong [Jehova], ol i ken amamas. Ol man i bihainim tru olgeta tok bilong God, ol i ken amamas.” (Song 119:1, 2) Olsem wanem? Yu inap long mekim tupela samting wantaim—stretim gut ol wok na stap amamas?
[Piksa long pes 28]
Wanpela samting ol i wokim bipo olsem piksa i makim rot bilong ol samting long antap na ol i kolim amileri sfia
[Piksa long pes 31]
Gutpela Wasman Jehova, i no God bilong stretim gut ol wok tasol, nogat, em i God bilong amamas tu
[Kredit Lain]
Garo Nalbandian