Insait Bilong Dispela Tok “Kristen” Em i Wok Long Lus o Olsem Wanem?
WANEM samting i makim olsem man em i wanpela Kristen? Bai yu bekim dispela askim olsem wanem? Ol i bin givim dispela askim long ol manmeri bilong ol narapela narapela kantri na bekim bilong sampela bilong ol i olsem:
“Bihainim Jisas na mekim wankain pasin olsem em.”
“Stap gutpela man na givim samting bilong helpim ol narapela.”
“Bilip long Krais olsem Bikpela bilong yumi na Man bilong kisim bek yumi.”
“Go long Misa, na mekim beten bilong Korona, na kisim Komunio.”
“Mi ting yumi no gat wok long go long lotu bilong i stap wanpela Kristen.”
Ol dikseneri tu i save kamapim kain kain insait bilong dispela tok Kristen. Wanpela dikseneri i kamapim 10-pela narapela narapela insait bilong dispela tok, na tupela i olsem, “bilip long o insait long lotu bilong Krais Jisas” na “wanpela man o meri i save bihainim gutpela pasin.” Olsem na yumi no kirap nogut long save olsem planti manmeri i hatwok long tokaut klia olsem wanpela Kristen em i wanem samting.
Planti i Bihainim Laik Bilong Ol Yet
Long nau, namel long ol manmeri i tok ol i Kristen—maski ol i go long wanpela haus lotu tasol—yu inap painim ol narapela narapela tingting long ol samting olsem: Spirit bilong God i bin kamapim ol tok bilong Baibel, evolusen, wok bilong lotu insait long wok politik, na pasin bilong autim bilip long ol narapela man. Na planti taim ol i tok pait long ol kain tok olsem: Pasin bilong rausim bel, man i mekim pasin sem wantaim narapela man, na ol man na meri i stap wantaim tasol ol i no marit tru. Olsem na nau yumi lukim planti man i mekim pasin olsem: Ol i larim ol man i bihainim laik bilong ol yet.
Nius Christian Century i stori long wanpela kot bilong lotu Talatala i bin pasim tok olsem ol sios inap “votim wanpela elda bilong i stap long lain bilong bosim sios, maski ol man i save em i man bilong mekim pasin Sodom.” Sampela tisa bilong lotu i tok, bilong God i ken kisim bek ol man i no bikpela samting long ol i bilip long Jisas. Nius The New York Times i tok, ol dispela tisa bilong lotu i bilip olsem ol Juda, ol Muslim, na ol narapela ‘bai i go long heven wankain olsem ol Kristen.’
Sapos inap, tingim dispela samting: Wanpela komyunis i tok olsem gavman kapitalis i gutpela, o wanpela man i tok em laikim gavman demokratik, tasol em i helpim wanpela gavman dikteta, o wanpela man i tok em i man bilong lukautim wara na win na graun samting, tasol em i save orait long wok bilong katim olgeta diwai long wanpela hap. Yu bai tok, “Dispela man i no wanpela komyunis, o em i no man bilong laikim gavman demokratik, o em i no man bilong lukautim wara na win na graun samting.” Na tru tumas, tok bilong yu i stret. Tasol taim yu skelim ol narapela narapela tingting bilong ol manmeri i tok ol i Kristen, yu lukim ol i gat ol bilip i no wanbel liklik na planti taim ol dispela bilip i pait wantaim tok bilong Krais Jisas, em man i bin kamapim lotu Kristen. Dispela i kamapim klia wanem samting long lotu Kristen bilong ol?—1 Korin 1:10.
Pasin bilong senisim bilip Kristen bilong amamasim ol man, dispela pasin i bin i stap long bipo yet. God na Krais Jisas i ting olsem wanem long ol kain senis olsem? Olsem wanem? I stret ol misin i ken tok ol i Kristen sapos ol i lainim ol man long ol bilip Krais i no as bilong en? Bai yumi skelim ol dispela askim long stori i kamap bihain long dispela.