Yu Save Bilip Long Wanpela God Em i Stap Tru?

Long 1906, wanpela man bilong raun na painim ol narapela kantri, Robert E. Peary, i tok em i bin lukim wanpela kantri long hap bilong Aktik, na 7-pela yia bihain, lain bilong wanpela haus tumbuna (American Museum of Natural History) i salim wanpela lain bilong lukim dispela kantri.

PEARY i bin stap long Cape Colgate long hap not-wes bilong Not Amerika taim em i lukim samting i luk olsem wanpela longwe kantri. Em i putim nem Crocker Land long dispela kantri, long wanem, Crocker em nem bilong wanpela man i bin givim mani long em bilong helpim dispela wok. Lain i kam bihain ol i amamas tru taim ol i lukluk i go na ol i lukim wanpela hap i gat ol liklik liklik maunten, na ol gutpela ples daun, na ol maunten i gat ais i karamapim het bilong en! Tasol bihain liklik ol i save olsem samting ol i lukim i no samting tru tru​—⁠em olsem wanpela mak i save kamap nating tasol long kain ples olsem. Dispela samting i bin giamanim Peary, na nau ol i bin lusim bikpela hap taim na strong na mani long painim samting i no stap tru.

Long nau, planti man i givim bel na taim bilong ol long ol god ol i ting ol i stap tru. Long taim bilong ol aposel, ol man i save lotu long ol god olsem Hermes na Sus. (Aposel 14:​11, 12) Long nau, ol man i bihainim lotu Sinto na lotu Hindu na sampela lotu moa, ol i save lotuim planti milion god. Tru tumas, olsem Baibel i tok, “i gat planti samting ol i kolim ‘god,’ na planti samting ol i kolim ‘bikpela.’ ” (1 Korin 8:​5, 6) Yu ting ol dispela god em ol god i stap tru?

Ol God Em Ol “i No Inap Helpim” Ol Man

Orait tingim pasin bilong lotuim ol imis o piksa samting. Ol man i bilip long ol o beten long rot bilong ol, ol i ting ol dispela imis ol i gat bikpela strong na ol inap praisim ol man o helpim ol long abrusim bagarap. Tasol tru ol inap helpim ol man, olsem kisim bek ol? Man bilong raitim song em i stori long ol imis olsem: “Ol arapela lain i bin wokim ol giaman god bilong ol long silva na gol. Han bilong ol man yet i bin wokim ol giaman god. Ol dispela giaman god i gat maus, tasol ol i no inap toktok. Na ol i gat ai, tasol ol i no inap lukim samting. Na ol i gat yau, tasol ol i no inap harim samting, na ol i no inap pulim win.” Tru tumas, ol dispela god “i no inap helpim” ol man.​​—⁠Song 135:​15-​17; Aisaia 45:⁠20.

Tru, ating ol man i wokim ol imis ol i tok ol dispela samting ol i bin wokim long han bilong ol, ol i gat laip na strong. Na ol man i lotu long ol imis ol i bilip long ol. Profet Aisaia i tok: “Ol i save putim dispela giaman god antap long sol bilong ol na karim i go na putim long wanpela ples ol i bin makim bilong sanapim em.” Tasol em i tok moa: “Dispela giaman god i save stap tasol long dispela hap, long wanem, em yet i no inap wokabaut i go long narapela hap. Na em i no inap bekim prea bilong ol man i singaut long em, na em i no inap helpim ol long taim nogut. Nogat tru.” (Aisaia 46:⁠7) Em nau, ol imis i no gat laip na strong, maski man i bilip strong long ol. Ol imis ol i bin wokim long diwai o gol samting, ol “i no inap mekim wanpela samting.”​​—⁠Habakuk 2:​18.

Long nau planti man i save lotuim ol lain politik, na ol hetman bilong lotu, na ol man i gat nem long spot o singsing samting. Na long planti man, mani i olsem wanpela god. Ol dispela god giaman ol i no inap tru long mekim ol samting ol man i tok ol inap mekim. Olsem: I luk olsem mani inap helpim ol man long stretim planti hevi, tasol strong bilong mani inap giamanim ol. (Mak 4:​19) Wanpela man bilong skelim dispela samting i askim olsem: ‘I gat wanem as na taim ol man i kisim pinis dispela samting em planti man i gat laik tru long kisim olsem rot bilong stretim olgeta hevi, dispela i save givim bikpela hevi tru long ol?’ Tru tumas, taim man i wok long painim bikpela mani, ating em i mas lusim sampela samting i nambawan tru​—⁠sik i painim em, famili i bagarap, em i no gat ol gutpela pren moa, na em i no pas gut moa wantaim Man bilong wokim em. Em nau, dispela god bilong em i olsem wanpela “god giaman” tasol!​​—⁠Jona 2:⁠8.

“I No Gat Bekim Long Beten Bilong Ol”

Sapos samting i no stap tru tru, orait em longlong pasin sapos yumi tok em i stap tru. Ol man i lotuim god Bal long taim bilong profet Elaija ol i pilim tru dispela samting taim wanpela bikpela hevi i painim ol. Ol i bilip strong olsem Bal i gat strong long salim paia i kam daun long heven na kukim animal ol i bin kilim bilong mekim ofa. “Ol i beten long god Bal, stat long moningtaim i go inap long belo. Ol i wok long beten na singaut olsem, ‘Bal, mipela i laik bai yu mas harim beten bilong mipela.’ ” Olsem wanem? Bal i gat yau na em inap harim, na em i gat wanpela maus na em inap toktok? Baibel i tok moa: “Tasol i no gat bekim long beten bilong ol, na i no gat wanpela samting i kamap. Nogat tru.” (1 King 18:​26, 29) God Bal i no wanpela god i stap tru; em i no inap mekim wanpela samting.

Em i bikpela samting long yumi mas kisim save long wanpela God i stap tru na lotu long em! Tasol dispela God em i husat? Na sapos yumi bilip long em, olsem wanem dispela inap helpim yumi?

[Ol Piksa long pes 3]

Poroman bilong Peary, em Egingwah, em i lukluk i go bilong painim graun

Robert E. Peary

[Ol Kredit Lain]

Egingwah: From the book The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA

[Ol Piksa long pes 4]

Samting ol man i lotu long en i save giamanim planti man