Olsem Wanem Long Wok Bilong Helpim Ol Man?
BIHAIN long ol teroris i bin kamapim bagarap long New York City na Washington, D.C., long Septemba 11, 2001, pasin bilong ol manmeri long helpim ol man i kisim bagarap i bikpela tru. Ol lain bilong helpim ol man i kisim olsem 2.7 bilion dola bilong helpim ol famili bilong ol man i kisim bagarap. Ol manmeri long olgeta hap i sori tru long dispela bikpela bagarap i bin kamap, olsem na ol i gat laik long helpim ol man.
Tasol ol manmeri i no amamas taim ol i harim olsem sampela lain bilong helpim ol man ol i paulim mani. Ol i belhat tru taim ol i harim olsem wanpela lain i gat nem i bin kisim 546 milion dola na ol i tingting long holim yet 250 milion dola samting bilong dispela mani na yusim long ol narapela samting. Maski bihain dispela lain i senisim tingting bilong ol na ol i tok sori, wanpela niusmeri i tok: “Ol man bilong skelim dispela kain lain i ting olsem samting ol i bin mekim i no stret na ol man i no inap bilip moa long wok bilong ol” olsem ol i bin bilip long ol paslain long bagarap i kamap. Olsem wanem long yu? Bilip bilong yu long ol lain bilong helpim ol man i strong yet?
I Gutpela Yu Givim o Yu Tromoi Nating?
Planti man i ting pasin bilong givim ol samting long ol lain bilong helpim ol man i gutpela. Tasol i no olgeta man i wanbel long dispela tingting. Inap 200 yia bipo, Samuel Johnson, em wanpela man bilong Inglan i save raitim ol stori, em i tok: “Bai yu pilim olsem yu mekim gutpela wok taim yu givim mani long ol man i wok—olsem baim ol long wok ol i bin mekim—na i no taim yu givim mani olsem presen.” Long nau sampela i gat wankain tingting, na ol stori i kamap long ol dispela lain i paulim mani i mekim na ol man i no bilip moa long ol. Orait tingim tupela samting i bin kamap.
Long San Francisco, ol i rausim wanpela dairekta bilong wanpela lain lotu i save helpim ol man, long wanem, em i bin sasim dispela lain long baim haus sik we dokta i bin stretim pes bilong em na baim ol haus kaikai we em i bin tromoi 1,700 kina samting long olgeta wan wan wik inap tupela yia. Long Briten, wanpela lain bilong TV em ol i go pas long singaut long mani bilong helpim ol man, ol i sem taim ol i kisim save olsem long 6.5 milion paun (olsem 35 milion kina) ol i bin kisim na salim i go long Romenia bilong wokim ol nupela haus bilong ol pikinini i no gat papamama, ol i bin wokim 12-pela haus tasol, na planti handet tausen kina i bin lus. Ol dispela kain stori i mekim na sampela man i save skelim gut hamas mani ol bai givim na long wanem lain stret ol bai givim.
Givim o No Ken Givim
Tasol i no gutpela sapos yu larim ol dispela stori bilong sampela man o sampela lain i daunim pasin bilong yu long tingim tru narapela na sori long ol. Baibel i tok: “Pasin bilong Kristen i stap stret olgeta na i no gat asua long ai bilong God Papa bilong yumi, em i olsem. Yumi mas tingting long ol pikinini, papamama bilong ol i dai pinis, na long ol meri, man bilong ol i dai pinis, na yumi mas helpim ol long karim ol hevi bilong ol.” (Jems 1:27) Yes, pasin bilong helpim ol man i stap rabis na i no gat nem em i wanpela bikpela wok bilong lotu Kristen.
Tasol ating yu laik save, ‘I gutpela mi wok yet long givim mani long ol lain bilong helpim ol man, o mi yet i ken helpim narapela long rot bilong givim presen samting?’ God i laikim wanem kain pasin bilong givim? Stori i kamap bihain long dispela bai toktok long ol dispela askim.