Stretpela Save Long Sin

SAPOS sikman i brukim glas bilong skelim hat bilong skin, yu ting long dispela rot em inap kamapim klia olsem em i no gat fiva? Nogat, a? Na olsem tasol, maski planti man i sakim tingting bilong God long sin, dispela i no makim olsem sin i no stap. Baibel i gat planti tok bilong dispela samting. Baibel i skulim yumi long wanem samting tru bilong sin?

Yumi Olgeta i Save Popaia

Inap olsem 2,000 yia i go pinis, aposel Pol i tokaut long bel hevi bilong em, long wanem, ‘gutpela pasin em i laik mekim, em i no save mekim. Na pasin nogut em i no laik mekim, em i save mekim.’ (Rom 7:19) Sapos yumi no giaman, yumi bai tokaut olsem yumi wankain olsem Pol. Ating yumi gat laik long bihainim Tenpela Lo o ol narapela lo bilong bosim wokabaut bilong man, tasol maski yumi laik o yumi no laik, sampela taim yumi olgeta i save popaia na lusim mak. I no long laik bilong yumi yet na yumi brukim wanpela lo, nogat; as bilong dispela, em yumi no gat strong. Bilong wanem i olsem? Pol yet i bekim olsem: “Pasin mi no laikim, dispela mi save mekim. Olsem na i no mi yet mi mekim dispela. Nogat. Sin i stap insait long mi, em tasol i mekim.”​—Rom 7:20.

Olsem Pol, olgeta manmeri bilong graun i gat ol pasin kranki i stap long skin bilong ol​—em mak i soim olsem sin i pas long skin bilong ol. Pol i tok: “Olgeta man i bin mekim sin na ol i sot long kamapim ol gutpela pasin bilong God.” Wanem samting i as bilong dispela sin i stap long yumi? Pol i tok moa: “Wanpela man [Adam] i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.”​—Rom 3:​23, NW; 5:12.

Planti man i sakim dispela tingting olsem tupela tumbuna bilong pastaim i bin brukim lo na dispela i mekim na yumi stap longwe long God na yumi no i stap nambawan olgeta olsem tupela long pastaim tru, tasol maski ol man i sakim dispela tingting, Baibel yet i tok olsem. Jisas i bin kamapim tok bilong sampela sapta bilong Buk Stat long Baibel, na long dispela rot em i soim olsem em i bilip long stori bilong Adam na Iv.​—Stat 1:27; 2:24; 5:2; Matyu 19:​1-5.

Wanpela bikpela tok bilong Baibel i tok long Jisas i bin kam long graun bilong helpim ol man i bilip long em na kisim bek ol long dispela sin i pas long ol. (Jon 3:16) Bilong kisim laip i stap oltaim long bihain, yumi mas bilip long rot bilong Jehova long kisim bek ol gutpela man long wanpela bikpela hevi ol i no inap tekewe. Tasol sapos yumi no kliagut long tingting bilong God long sin, bai yumi no inap pilim tru na tenkyu long dispela rot em i bin putim bilong kisim bek yumi long dispela sin.

Ofa Bilong Jisas na As Bilong En

Jehova i bin givim rot long namba wan man long i stap oltaim oltaim. Tasol sapos Adam i bikhet long God, em bai lus long kisim dispela gutpela samting tru. Adam i bin bikhet na taim em i mekim olsem, em i kamap sinman. (Stat 2:​15-17; 3:6) Adam i mekim pasin i narapela kain long laik bilong God na em i no stap nambawan moa, na dispela i mekim na em i no pas gut moa wantaim God. Taim em i brukim lo bilong God na mekim sin, em i kirap long i go lapun na bihain em i dai. Sori tru, olgeta tumbuna pikinini bilong Adam​—yumi tu​—i gat sin long taim mama i karim yumi, na dispela sin i mekim na dai i mas painim yumi. Bilong wanem i olsem?

As bilong dispela i no hatwok long kisim. Em i olsem: Ol papamama em ol i no gutpela olgeta ol i no inap kamapim ol pikinini i gutpela olgeta. Olgeta pikinini bilong Adam ol i gat sin long taim mama i karim ol, na olsem aposel Pol i tok, “sin i save givim pe long ol wokboi bilong en. Dispela pe em dai tasol.” (Rom 6:23) Tasol namba tu hap bilong dispela ves i helpim yumi long wetim gutpela samting bai kamap, em i tok: “Tasol God i save givim nating presen long yumi, em laip i stap oltaim. Dispela laip yumi kisim long wok bilong Jisas Krais, Bikpela bilong yumi.” Em i olsem: Jisas i bin i dai olsem ofa, na long dispela rot ol manmeri i bihainim tok na tenkyu long dispela samting, ol inap lusim ol samting nogut bilong dispela sin Adam i bin mekim.a (Matyu 20:28; 1 Pita 1:​18, 19) Dispela i mas mekim wanem long yu?

Pasin Laikim Bilong Krais i “Kirapim Mipela”

Aposel Pol i kamapim bekim bilong God long dispela askim. Em i tok: “Krais i bin givim bel bilong en long mipela, na dispela i save kirapim mipela long wok, long wanem, mipela i save pinis olsem, wanpela man i bin kisim ples bilong yumi olgeta na i dai, na . . . [em] i mekim olsem bilong helpim yumi ol man i stap laip, bai yumi no ken tingting moa long yumi yet na wokabaut. Nogat. Yumi ken tingting long dispela man i kisim ples bilong yumi na i dai pinis, na i kirap bek tu.” (2 Korin 5:​14, 15) Sapos man i pilim olsem ofa bilong Jisas inap mekim em i kamap fri long ol samting nogut bilong sin​—na em i laik soim tenkyu bilong em long dispela​—em i mas wok strong long bihainim ol pasin i stret wantaim laik bilong God. Sampela samting i olsem: Em i mas kisim save long ol samting God i laik bai em i mas mekim, na skulim maus bilong bel long ol lo na stiatok bilong Baibel, na bihainim ol dispela lo long i stap na wokabaut bilong em.​—Jon 17:​3, 17.

Taim yumi mekim rong, dispela i save bagarapim pasin bilong yumi long pas gut wantaim God Jehova. Taim King Devit i luksave long rong bilong em long mekim pasin pamuk wantaim Batseba na kilim i dai man bilong em, ating em i sem nogut tru. Tasol samting em i gat bikpela tingting tru long en​—na i stret em i tingim​—em God yet i no amamas long sin em i bin mekim. Em i bel hevi na i tokaut long Jehova: “Mi mekim sin long yu wanpela tasol. Mi mekim pasin nogut long ai bilong yu.” (Song 51:4) Na tu, taim traim i painim Josep long mekim pasin pamuk, maus bilong bel i kirapim em long tok: “Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God.”​—Stat 39:9.

Olsem na sin i no olsem yumi pilim nogut, long wanem, ating rong bilong yumi i kamap ples klia na yumi sem. Na i no olsem ol man i gat tok long yumi, long wanem, ating yumi no bin winim mak. Taim yumi brukim lo bilong God long ol samting bilong maritpasin, mekim tok tru, rispek, lotu, na ol samting olsem, dispela i nogutim pasin bilong yumi long pas gut wantaim God. Sapos long laik bilong yumi yet yumi wok long mekim sin, yumi mekim yumi yet i kamap birua bilong God. Dispela em i wanpela tok tru yumi mas tingim gut.​—1 Jon 3:​4, 8.

Orait wanem samting i bin kamap long sin? I no gat wanpela samting i kamap long en. Ol man i givim ol narapela nem long en na bai i luk olsem sin i no bikpela samting yumi mas tingim. Planti ol i daunim o sakim maus bilong bel taim em i kotim ol. Olgeta man i laik bai God i orait long ol, ol i mas sakim dispela pasin. Olsem yumi lukim pinis, pe sin i givim long yumi em i no makim pasin bilong sem o kain samting olsem, nogat; dispela pe em indai. Em nau, sin em samting bilong laip o bilong i dai.

Gutpela samting i olsem: Pe bilong ofa bilong Jisas em i rot bilong God i ken lusim ol sin bilong yumi sapos yumi tanim bel na lusim ol dispela sin. Pol i tok: “Sapos God i lusim pinis rong bilong ol man na rausim sin bilong ol, ol dispela man i ken amamas. Sapos Bikpela i no tingim moa sin bilong wanpela man, dispela man i ken amamas.”​—Rom 4:​7, 8.

[Futnot]

[Blok/Piksa long pes 10]

Misin i Senisim Wanpela Tok Bilong En

Planti Katolik i save go long lotu ol i no klia tumas long tok bilong Limbo. Long nau, inap olsem 20 yia samting, isi isi ol i rausim dispela tok na nau em i no stap moa long ol buk katekismo. Long 2007, Misin Katolik i pinisim dispela bilip long Limbo. Long wanpela pepa ol i raitim, em i tok long “sampela as na misin inap tingting olsem ol bebi i dai na ol i no bin kisim baptais yet, God inap kisim bek ol na ol i stap amamas oltaim oltaim.”​—International Theological Commission.

Bilong wanem misin i senisim dispela tok? Long wanem, nau em i gat rot long lusim wanpela bilip em Henri Tincq, wanpela niusman bilong Frans, i tok “i olsem wanpela hevipela samting bilong karim, em Misin i bin sambai long en kirap long 500 yia samting i go pinis na i kam inap long taim bilong yumi, na Misin i bin amamas long mekim wok long Limbo bilong pretim ol papamama na kirapim ol long baptaisim ol pikinini bilong ol hariap.” Tasol pasin bilong misin long pinisim bilip bilong Limbo i kamapim sampela bikpela askim moa.

Em tok bilong ol man o bilong Baibel? Dispela bilip long Limbo i bin kamap long taim ol tisa bilong misin i bin paitim toktok i go i kam long bilip bilong klinpaia bihain long yia 1100 C.E. Misin Katolik i tok, taim man i dai, tewel bilong em i stap laip yet, olsem na misin i mas painim wanpela ples bilong tewel bilong ol pikinini em ol i no inap i go long heven, long wanem, ol i no bin baptais yet tasol ol i no bin mekim wanpela pasin nogut inap long ol i mas i go long helpaia. Em nau, misin i kamapim dispela bilip long Limbo.

Tasol Baibel i no tok man i gat tewel na taim em i dai tewel i stap laip yet, nogat. Em i tok klia olsem, ol man i mekim sin God bai “kilim ol i dai,” na ol “i mas i dai.” (Aposel 3:23; Esekiel 18:4) Taim man i dai, i no gat wanpela hap bilong em i stap yet, olsem na kain ples olsem Limbo i no inap i stap. Na tu, Baibel i tok dai i olsem man i slip indai, olsem em i no gat tingting moa.​—Saveman 9:​4, 5, 10; Jon 11:​11-14.

Baibel i makim olsem God i save tingim ol liklik pikinini bilong ol papamama Kristen olsem ol i holi. (1 Korin 7:14) Dispela tok bilong Baibel bai i no gat as bilong en sapos ol liklik pikinini i mas kisim baptais bambai God i ken kisim bek ol na ol i stap laip oltaim.

Em nau, tok bilong Limbo i semim God, long wanem, em i mekim olsem God em man nogut tru i save givim strafe long ol pikinini i no gat asua, tasol em i no olsem​—em i gat stretpela pasin na em i Papa bilong pasin laikim. (Lo 32:4; Matyu 5:45; 1 Jon 4:8) Olsem na dispela tok bilong Limbo em Baibel i no as bilong en, em i no stret liklik long tingting bilong ol Kristen i gat gutpela bel!

[Ol Piksa long pes 9]

Sapos yumi bihainim pasin i stret wantaim Tok Bilong God, bai yumi stap gut wantaim God na ol man