Helpim Ol Man Long “Lusim Slip na Kirap”
“Yupela i save long dispela taim nau yumi stap long en. Nau em taim bilong yupela long lusim slip na kirap.”—ROM 13:11.
YU INAP STORI LONG DISPELA?
Bilong wanem ol Kristen i mas tingim laik bilong God na no ken larim tingting bilong ol i slip?
Bilong wanem yumi mas tingting gut na putim gut yau taim yumi autim tok?
Bilong wanem yumi mas mekim gutpela pasin taim yumi autim tok?
1, 2. Olsem wanem planti manmeri i gat wok long kirap lusim slip?
LONG olgeta yia, planti tausen man i dai, long wanem, ol i aislip taim ol i draivim kar. Wok mani bilong sampela arapela i lus, long wanem, ol i no kirap kwik long moning na ol i go leit long wok o ol i slip long taim bilong wok. Tasol i gat narapela kain slip em inap givim bikpela hevi moa long man. Em we tingting bilong man i slip na em i no tingim laik bilong God. Baibel i tok lukaut long dispela kain slip olsem: “Man i no slip . . . i ken amamas.”—Rev. 16:14-16.
2 Armagedon i wok long kam klostu na bikpela lain manmeri i no tingim laik bilong God na i olsem tingting bilong ol i slip. Sampela bikman bilong Kristendom i tok ol memba bilong lotu bilong ol i slip i stap. Dispela em wanem kain slip? Bilong wanem em i bikpela samting long ol Kristen tru i no ken slip olsem? Yumi ken mekim wanem bilong helpim ol arapela long kirap na lusim dispela kain slip?
EM WANEM KAIN SLIP?
3. Ol man husat tingting bilong ol i slip na ol i no tingim laik bilong God, ol i save mekim wanem?
3 Ol manmeri i slip tru tru, ol i save stap isi tasol. Tasol ol manmeri em tingting bilong ol i slip na ol i no tingim laik bilong God, ol i save bisi tru. Ol i no bisi long mekim ol samting we bai God i ken amamas long ol, nogat. Ating ol i tingting long ol wok bilong ol wan wan de, o long kisim amamas, biknem, o mani. Ol i bisi tru long ol dispela samting na ol i no tingting tumas long ol samting ol i mas mekim bilong pas gut wantaim God. Tasol ol manmeri husat tingting bilong ol i no slip na ol i tingim laik bilong God ol i luksave olsem yumi stap long “taim bilong las de,” olsem na ol i givim bel tru long mekim laik bilong God.—2 Pita 3:3, 4; Luk 21:34-36.
4. Wanem mining bilong tok Pol i mekim olsem: “Yumi no ken slip i stap olsem ol arapela”?
4 Ritim 1 Tesalonaika 5:4-8. Long dispela ves Pol i tokim ol Kristen olsem ol i “no ken slip i stap olsem ol arapela.” Wanem mining bilong tok bilong Pol? Yumi “slip i stap” taim yumi no mekim ol samting em Jehova i tok i stret long mekim, o yumi mekim ol samting em i tok i no stret long mekim. Na tu, yumi “slip i stap” sapos yumi mekim ol samting long laip bilong yumi we i soim olsem yumi ting taim bilong Jehova long bagarapim ol man nogut i stap longwe. Yumi mas wok strong tru na bai ol man nogut i no ken pulim yumi long bihainim pasin na tingting bilong ol.
5. Ol man em tingting bilong ol i slip na ol i no tingim laik bilong God, ol i gat wanem tingting?
5 Sampela manmeri i ting i no gat God i stap bilong skelim ol samting ol i mekim. (Sng. 53:1) Sampela i ting God i no tingim yumi, olsem na i no gat as yumi tingim em. Na sampela i ting sapos ol i bilong wanpela lotu, ol bai stap pren bilong God. Olgeta lain husat i bilipim kain tok olsem, tingting bilong ol i slip na ol i no tingim laik bilong God. Ol i mas kirap long slip. Yumi ken mekim wanem bilong helpim ol?
YUMI YET I NO KEN SLIP
6. Bilong wanem yumi no ken slip?
6 Sapos yumi yet i slip i stap, yumi no inap kirapim narapela husat i slip. So olsem wanem yumi inap was i stap na no ken slip? Yumi mas abrusim pasin bilong ol man i no tingim laik bilong God. Baibel i tok ol man em tingting bilong ol i slip, ol i save mekim ol “pasin bilong tudak.” Olsem insait long ol pati i gat planti pairap, dring spak, pasin pamuk, pasin bikhet na i no sem, tok pait, na pasin jeles. (Ritim Rom 13:11-14.) Em hatwok tru long i stap narapela kain long ol manmeri yumi stap namel long ol. Yumi mas was i stap. Man i draivim kar i mas tingim, sapos em i slip taim em i draivim kar, em inap dai. Na moa yet Kristen i mas tingim, sapos tingting bilong em i slip na em i no tingim laik bilong God, em inap dai!
7. Wanem samting inap painim yumi, sapos yumi no gat stretpela tingting long ol manmeri long teritori?
7 Nogut yumi kirap ting olsem olgeta man long teritori i les long harim gutnius na ol i no inap senis. (Snd. 6:10, 11) O nogut yumi ting olsem, “Sapos i no gat wanpela i laik harim gutnius, orait bilong wanem yumi mas wok strong long helpim ol man?” Em tru, long nau planti i no laik harim, tasol sampela senis inap kamap long laip bilong ol na tingting bilong ol i senis. Sampela i kirap long slip na harim gutnius. Na yumi inap helpim ol sapos yumi yet i no slip. Yumi ken mekim olsem taim yumi traim ol nupela rot bilong kirapim ol man long amamas long harim tok bilong Kingdom. Bilong helpim yumi long was i stap, yumi mas tingim as na wok autim tok em i bikpela samting.
WOK AUTIM TOK I BIKPELA SAMTING
8. Bilong wanem wok autim tok bilong yumi i bikpela samting tru?
8 Tingim, maski sapos ol manmeri i no laik harim, wok autim tok bilong yumi i givim biknem long Jehova. Na tu, long rot bilong autim tok, Jehova inapim ol samting em i tingting pinis long mekim nau long dispela taim we pinis i klostu. I no longtaim na God bai skelim ol man long pasin ol i mekim taim yumi autim tok long ol. Ol man i no bihainim tok bilong gutnius ol bai bagarap. (2 Tes. 1:8, 9) Em kranki tingting long ting olsem yumi no gat wok long givim bel long autim tok, long wanem, “bai i gat kirap bek bilong . . . ol stretpela man na ol man nogut wantaim.” (Apo. 24:15) Tok Bilong God i skulim yumi pinis olsem ol lain em God i skelim ol olsem “meme,” ol bai pinis olgeta. Wok autim tok em wanpela rot we God i soim marimari bilong em, long wanem, dispela i opim rot long ol manmeri i ken senisim pasin bilong ol na kisim laip oltaim. (Mat. 25:32, 41, 46; Rom 10:13-15) Sapos yumi no autim tok, orait olsem wanem bai ol manmeri i harim dispela tok we inap helpim ol long abrusim bagarap?
9. Olsem wanem wok autim tok i bin helpim yu yet na ol arapela?
9 Wok autim tok yumi mekim i save helpim yumi tu. (Ritim 1 Timoti 4:16.) Ating yu wanbel olsem wok bilong autim tok bilong Jehova na long Kingdom i strongim bilip na pasin bilong yu long laikim God. Na tu, dispela i bin helpim yu long bihainim moa yet ol pasin Kristen. Na ating amamas bilong yu i go bikpela moa taim yu autim tok bilong soim olsem yu laikim God. Planti husat i bin skulim ol arapela long tok i tru i kisim amamas taim ol i luksave olsem spirit bilong God i helpim laip bilong ol sumatin i kamap gutpela moa.
TINGTING GUT LONG WOK AUTIM TOK
10, 11. (a) Olsem wanem Jisas na Pol i tingim gut ol samting ol arapela i nidim? (b) Olsem wanem yumi ken tingim gut wok autim tok bilong yumi?
10 I gat kain kain rot yumi ken bihainim bilong autim gutnius na ol man bai amamas long harim. So yumi mas tingting gut long wok autim tok yumi mekim. Jisas i stap olsem eksampel bilong yumi. Em i gutpela olgeta, olsem na em i luksave taim wanpela Farisi i kros, maski dispela Farisi i no mekim wanpela tok. Na tu, Jisas i save olsem wanpela meri husat i gat nem olsem sinmeri i bin tanim bel, na wanpela wido, i bin givim olgeta samting em i holim. (Luk 7:37-50; 21:1-4) Jisas inap helpim ol manmeri bikos em i save long ol samting ol i nidim. Tasol dispela i no makim olsem yumi mas gutpela olgeta bilong luksave long ol samting ol arapela i nidim. Eksampel bilong aposel Pol i kamapim dispela samting. Em i bin autim tok long kain kain rot bilong helpim ol manmeri.—Apo. 17:22, 23, 34; 1 Kor. 9:19-23.
11 Sapos yumi tingting gut na luksave long ol samting ol man i nidim, olsem Jisas na Pol i bin mekim, orait yumi inap save long tok yumi ken mekim bilong kirapim tingting bilong ol. Olsem, taim yumi autim tok long man, skelim ol samting we inap helpim yumi long save long pasin bilong ples bilong em, laik bilong em, na em i singel, marit, o i gat pikinini. Luksave long samting man i mekim taim yu bungim em na mekim gutpela tok long dispela samting taim yu kirap toktok wantaim em.
12. Taim yumi mekim wok autim tok na yumi toktok wantaim pablisa yumi poroman wantaim, yumi mas tingim wanem samting?
12 Sapos yumi tingting gut long wok yumi mekim long autim tok, bai yumi no inap larim ol arapela samting i pulim nabaut tingting bilong yumi. Ating yumi na pablisa yumi poroman wantaim i toktok long ol samting bilong strongim bel, tasol yumi no ken lusim tingting olsem as na yumi raun em bilong autim tok long ol arapela. (Sav. 3:1, 7) Olsem na yumi mas was gut, nogut yumi toktok namel long yumi yet na yumi no mekim gut wok autim tok. Sapos yumi stori long ol tok yumi bai mekim long ol man yumi bungim, dispela bai helpim yumi long tingim wok autim tok yumi mekim. Na i tru olsem mobail fon inap helpim yumi long mekim wok autim tok, tasol yumi no ken larim fon i krai taim yumi autim tok long ol man.
SOIM OLSEM YU TINGIM OL
13, 14. (a) Olsem wanem yumi inap kliagut long ol samting man i gat laik long save long en? (b) Olsem wanem yumi inap kirapim tok wantaim ol man?
13 Em bikpela samting long putim gut yau long ol man yumi autim tok long ol. Yu ken kamapim wanem ol askim long ol man long teritori bilong yu, na bai ol i kamapim tingting bilong ol long yu? Ol i tingting planti olsem i gat planti narapela narapela lotu i stap, o pasin bilong kros pait, o gavman i no wok gut? Yu inap helpim sampela long kisim save long God, olsem stori long ol long gutpela wei God i wokim ol samting, o olsem wanem tok bilong Baibel i ken helpim man? Klostu olgeta manmeri i laik save moa long beten, maski ol i bilip long God o nogat. Planti i laik save, i gat man i harim beten o nogat. Sampela i laik save: God i save harim olgeta beten? Sapos nogat, yumi mas mekim wanem na bai God i harim beten bilong yumi?
14 Ol lain i mekim wok autim tok inap planti yia inap givim skul long yumi long pasin bilong kirapim tok. Tingim olsem wanem ol i kamapim ol askim we i no semim man. Skelim olsem wanem nek na pes bilong ol i soim olsem ol i laik kliagut long tingting bilong man bilong haus.—Snd. 15:13.
MEKIM GUTPELA PASIN NA BIHAINIM GUTPELA TINGTING
15. Bilong wanem yumi mas mekim gutpela pasin taim yumi autim tok?
15 Yu save amamas taim yu slip gut na narapela i kam kirapim yu? Planti i no amamas taim narapela i kam kirapim ol hariap. Ol i laik bai narapela i kirapim ol long pasin isi. I wankain taim yu laik kirapim ol man we tingting bilong ol i slip na ol i no tingim laik bilong God. Olsem, taim yu autim tok na yu bungim man i kros, yu mas mekim wanem? Yu mas mekim gutpela pasin na soim olsem yu rispektim tingting bilong em. Tok tenkyu olsem em i kamapim tingting bilong em na long pasin isi, lusim em. (Snd. 15:1; 17:14; 2 Tim. 2:24) Sapos yu mekim gutpela pasin long em long nau, orait ating bihain em bai i no kros taim ol Witnes i kam lukim em long narapela taim.
16, 17. Taim yumi autim tok, olsem wanem yumi ken mekim gutpela pasin long ol man na bihainim gutpela tingting?
16 Sampela taim yu inap toktok yet wantaim man maski em i tok em i no laik o em i gat lotu pinis. Ating em inap tok olsem, long wanem, em i laik pinisim tok. Tasol sapos yu mekim gutpela pasin na bihainim gutpela tingting, ating yu inap kamapim wanpela gutpela askim, dispela inap kirapim man long putim yau long tok bilong Baibel yu laik autim.—Ritim Kolosi 4:6.
17 Sampela taim yumi bungim ol man husat i tok ol i bisi, olsem na em gutpela yumi soim rispek na lusim ol. Tasol sampela taim ating yumi inap kamapim sampela sotpela tok em man inap pilim. Olsem, sampela brata ol inap kamapim tok bilong Baibel insait long wanpela minit. Ol i ritim wanpela skripsa na givim wanpela askim long man em bihain ol bai kam bek na bekim. Sampela taim dispela pasin bilong sotim tok i mekim na man i pilim olsem em i gat taim long toktok. Ating yu ken traim dispela taim rot i op.
18. Yumi ken mekim wanem na bai wok autim tok bilong yumi long kain kain taim na ples i kamap gutpela moa?
18 Sapos yumi redi long autim tok long kain kain taim na ples, yumi inap helpim ol man yumi bungim long olgeta de long tingim God. Planti bratasista i save karim sampela nius long poket o beg bilong ol. Na ating ol i redi long ritim wanpela skripsa bilong Baibel taim rot i op. Yu ken askim wasman autim tok o wanpela painia long kongrigesen long skulim yu long pasin bilong autim tok long kain kain taim na ples.
HELPIM OL WANBLUT LONG LUSIM SLIP
19. Bilong wanem yumi mas wok yet long helpim ol wanblut?
19 Yumi olgeta i laik helpim ol wanblut long kisim gutnius. (Jos. 2:13; Apo. 10:24, 48; 16:31, 32) Sapos long namba 1 taim yumi autim tok long ol na ol i no laik harim, ating bai yumi no strong long autim tok gen long ol. Ating yumi pilim olsem tok na pasin yumi mekim i no inap senisim tingting bilong ol. Tasol ating bihain sampela senis i kamap long laip o tingting bilong ol. O ating pasin bilong yu long stori long tok i tru i kamap gutpela moa, na nau tok bilong yu inap karim kaikai.
20. Olsem wanem yumi ken soim olsem yumi rispektim tingting bilong ol wanblut taim yumi toktok wantaim ol?
20 Yumi mas rispektim tingting bilong ol wanblut. (Rom 2:4) Toktok wantaim ol long gutpela pasin, wankain olsem yu save mekim long ol man yu bungim taim yu autim tok. Bihainim pasin isi na pasin rispek. Na i no olsem olgeta taim yu mas toktok wantaim ol wanblut long tok i tru. Pasin bilong yu inap soim ol olsem wanem tok i tru i bin helpim yu. (Efe. 4:23, 24) Mekim ol samting na em bai isi long ol long luksave olsem laip bilong yu i gutpela, long wanem, Jehova i skulim yu. (Ais. 48:17) Long rot bilong pasin bilong yu, helpim ol wanblut long luksave olsem ol Kristen i save stap olsem wanem.
21, 22. Kamapim wanpela eksampel i soim olsem em i bikpela samting long yumi mas wok yet long helpim ol wanblut long kisim save long Jehova.
21 Wanpela sista i tok, long rot bilong pasin na toktok bilong en, oltaim em i traim long autim tok long 13 bratasusa bilong en. Long olgeta yia em i save raitim pas long olgeta wan wan. Inap 30 yia em tasol i Witnes insait long famili.
22 Wanpela de dispela sista i ringim wanpela susa bilong en husat i stap longwe. Susa i tok em i bin askim pasto bilong em long stadi Baibel wantaim em, tasol pasto i no mekim olsem. Taim sista bilong yumi i tokim em olsem em bai amamas long stadi Baibel wantaim em, susa i tok: “Em orait, tasol mi tokim yu nau: Mi no inap tru kamap wanpela Witnes Bilong Jehova.” Sista i salim buk Tru Tru Baibel i Tok Wanem? long susa na sista i wok long ringim em insait long sampela de, tasol susa i no opim buk yet. Sista i tok moa olsem: “Bihain, mi askim em long kisim buk bilong en, na long fon mipela lusim 15 minit long ritim na stori long sampela skripsa i stap long buk. Inap sotpela taim mipela i mekim olsem, na bihain em i laik stadi moa, winim 15 minit. Na bihain em i kirap ringim mi, sampela taim em i ring taim mi no kirap yet long moning, na sampela taim em ring 2-pela taim long de. Long yia bihain, em i kisim baptais, na narapela yia bihain em kirap mekim wok painia.”
23. Bilong wanem yumi mas wok yet long kirapim ol manmeri em tingting bilong ol i slip?
23 Yumi mas wok yet long bihainim gutpela tingting na kirapim ol manmeri em tingting bilong ol i slip na ol i no tingim laik bilong God. Planti i wok long kisim yet gutnius. Long olgeta wan wan mun, winim 20,000 manmeri i kisim baptais. So yumi mas bihainim tok aposel Pol i givim long Arkipus: “Lukautim gut dispela wok yu bin kisim long Bikpela, na bai yu ken inapim tru.” (Kol. 4:17) Stadi i kamap bihain long dispela bai helpim yumi long save long olsem wanem yumi ken givim bel tru long autim tok olsem taim i sot pinis.
[Blok long pes 13]
NA BAI YU NO KEN SLIP
▪ Bisi long mekim laik bilong God
▪ Abrusim ol pasin bilong tudak
▪ Tingim hevi inap kamap sapos tingting i slip
▪ Holim gutpela tingting long ol man long teritori
▪ Traim ol nupela wei long autim tok long ol man
▪ Tingim wok autim tok em i bikpela samting