Autim Tok Long Hap Saut Tru Bilong Yurop

OL MAUNTEN Levká bilong ailan Krit i wok long i go liklik taim mipela i ron long bot lusim dispela hap na i go long wanpela liklik ailan bilong solwara Mediterenian. Mipela 13-pela manmeri antap long bot, mipela i amamas long go autim tok long Gavdos, em wanpela liklik ailan tru long hap saut bilong Yurop.

I luk olsem bai i no gat wanpela hevi long raun bilong mipela, long wanem, san i lait gut tru. Tasol i no longtaim na strongpela win i kirapim biksi na sakim nabaut bot bilong mipela. Mi pilim sik na mi tingim stori bilong aposel Pol long Baibel—inap planti handret yia i go pinis em i bin raun long dispela solwara long taim bilong bikpela win na ren. Long dispela taim bipo ol i kolim Gavdos olsem Kauda. (Aposel 27:13-17) Mi laik mipela i mas go kamap gut long Gavdos.

Nau mipela i lukim hap em mipela bai go long en, wanpela ples i gat ol ston na ol bikpela klif i go daun tru long solwara. Dispela ples i stap olsem 300 mita antap long mak bilong solwara na ples i stret na i no gat bikpela maunten. Dispela ailan i bikpela inap 26 skwe kilomita na diwai pain na ol bus i gro long planti hap bilong en. Long sampela hap bilong ailan, ol liklik diwai pain i gro i go inap long arere bilong ol nambis.

Wanpela taim, i gat olsem 8,000 manmeri i bin sindaun long en. Long nau, aninit long 40 manmeri tasol i sindaun long dispela ailan. I luk olsem i no gat ol nupela divelopmen long Gavdos. Maski ol sip bilong karim kago na karim oil i save ron i kam abrusim dispela ailan, i gat wanpela bot tasol i save ron namel long Gavdos na Krit, tasol planti taim ol i save kenselim ron bilong dispela bot, long wanem, weda i no gutpela.

Mipela i bringim tok bilong mekim gut bel bilong ol man long Gavdos, em ol tok bilong helpim ol long wetim ol gutpela samting bai kamap bihain na ol inap wet long kisim laip oltaim na gutpela helt. Taim bot bilong mipela i laik sua, mipela i amamas tru long lusim bot na i go autim gutnius.

Inap 4 na hap aua, mipela i ron long bot em win i sakim nabaut, na pes bilong mipela i soim olsem dispela ron bilong bot i go long Gavdos i no gutpela tumas. Tasol mipela i slip liklik na bihain dring kofi, dispela i mekim na mipela i pilim orait. Bihain long mipela i skelim stori bilong aposel Pol long raun bilong em, mipela i beten na redi long kirapim wok bilong mipela.

Ol manmeri bilong dispela ples, ol i gat gutpela pasin pren na ol i redi long helpim mipela. Ol i singautim mipela i go long haus bilong ol na givim kaikai samting long mipela. Mipela autim gutnius bilong Baibel long ol na mipela i redi long helpim ol long mekim sampela wok bilong ol. Taim mipela i toktok wantaim wanpela meri, wanpela brata i luksave olsem wanpela masin i bagarap i stap long stua bilong dispela meri na em i helpim na stretim. Meri i pilim tru dispela gutpela pasin. Em i kisim sampela buk na nius bilong Baibel mipela i givim na em i tok amamas long mipela na long wok autim tok bilong mipela. Narapela meri i amamas na i tok, “I klia tru olsem wok yupela i mekim i kam long God, i no kam long ol man, long wanem, yupela i kam autim tok long dispela ailan i stap longwe tru.”

Ol manmeri i bin amamas tru long ol nius bilong Baibel em mipela i bin tilim long ol. Wanpela man i kisim nius Wastaua na Kirap! na em i laik kisim sampela moa buk na nius bilong ritim long taim bilong kol. Narapela man i laikim ol buk na nius bilong mipela na em i laik kisim sampela moa bilong putim long stua bilong em na bai ol kastama bilong em i ken ritim. Em i givim atres bilong em bambai long olgeta mun mipela i ken salim ol nius i kam long em long rot bilong pas. Wanpela famili i amamas tru taim mipela i soim ol olsem Baibel i kolim nem bilong dispela liklik ailan bilong ol. Na tu, ol i amamas long kisim ol nius bilong mipela.

Maski pasin bilong ol man long harim gut tok i strongim mipela, dispela visit long Gavdos i mekim na sampela bilong mipela i tingim bek ol samting nogut i bin kamap bipo. Klostu long Sarakíniko Bay, i gat wanpela haus we bipo ol i save putim ol kalabusman bilong lain politik long en. Emmanuel Lionoudakis, em wanpela Witnes Bilong Jehova husat i bin kalabus long dispela hap long 1938, long wanem, em i bin mekim wok autim tok.a Long dispela taim bipo, ol man i bin kolim Gavdos olsem wanpela “ailan i stap nating na i gat ol skopion nogut bilong kilim man, wanpela ples we planti man . . . i dai long hangre, sot long ol samting na kain kain sik i kisim ol, olsem na i stret ol i kolim [dispela ples] olsem ailan bilong dai.” Maski Lionoudakis em i wanpela Witnes tasol long dispela hap na em i bisi long autim tok long ol arapela kalabusman, em i save raun painim pis bilong kaikai. Taim pikinini meri, tambu pikinini man, na tumbuna pikinini meri bilong Lionoudakis i lukim hap em i bin stap long en winim 70 yia i go pinis, ol i pilim tru pasin bilong em long sanap strong. Em i stap gutpela piksa long mipela na dispela i kirapim mipela long stap gut long God na wok strong long autim tok.

Ol man husat i bin kalabus long dispela hap bipo, Gavdos em i wanpela ples nogut tru. Tasol mipela i pilim olsem em i wanpela gutpela ples taim mipela i autim tok long olgeta hap bilong ailan, na mipela i tilim 46 magasin na 9-pela buklet long ol manmeri i gat gutpela pasin pren long dispela hap. Mipela i laik kam bek gen na lukim ol nupela pren bilong mipela!

Orait nau, taim i kamap pinis long mipela i mas go bek. Tasol sori tru weda i no gutpela, olsem na ol i kenselim ron bilong mipela long 5 klok apinun na putim i go bihaintaim. Long 12 klok nait, mipela i redi long ron i go bek long dispela taim nogut. Orait long 3 klok bikmoning, mipela i lusim dispela hap, na inap 5-pela aua biksi i sakim nabaut bot bilong mipela, na mipela i go kamap long Krit. Mipela i taiet nogut tru na lek bilong mipela i no gat strong taim mipela i go sua, tasol mipela i amamas olsem mipela i bin helpim ol man long save long nem bilong Jehova long ailan Gavdos. (Aisaia 42:12) Olgeta i amamas long dispela raun bilong mipela. I no longtaim na mipela bai lusim tingting long ol samting nogut i painim mipela, tasol inap oltaim bihain bai mipela i tingim yet dispela raun bilong mipela.