Mekim Ol Gobek Bilong Kirapim Tingting Bilong Man Long Baibel

¹ Taim yumi autim tok, sampela taim yumi bungim ol man i olsem ol i laik harim tok bilong Kingdom, tasol ol i no gat hap taim bilong toktok long dispela taim yumi lukim ol. Olsem wanem? Yumi wok long go bek long narapela taim bilong toktok wantaim ol long tok bilong Kingdom? O olsem wanem sapos yumi toktok wantaim man i amamas long harim tok, tasol em i no kisim wanpela buk samting? Yumi go bek lukim em na bai yumi inap toktok moa wantaim em long ol tok i tru?

² Bikpela samting em yumi mas autim gut tok long olgeta hap bilong teritori bilong yumi na go bek lukim ol man i laik harim tok. Olsem wanem? Ol man i kisim buk o magasin, yumi save go bek lukim ol dispela man tasol? Sapos olsem, ating bai yumi abrusim sampela man i laik harim tok. Ol man i no kisim wanpela buk samting, yumi no ken skelim ol na ting yumi no ken helpim ol moa long kisim save long Baibel. Nogat. (Lukim Rom 14⁠:⁠4.) Taim yumi lusim pinis man bilong haus, ating em bai tingim ol tok yumi bin mekim o bihain em bai pilim gutpela pasin yumi bin mekim long kam lukim em. Olsem na taim yumi go bek lukim em ating bai em i laik harim sampela tok moa.

³ Taim yu go bek lukim man bipo em i gat wok, yu ken mekim tok olsem:

◼ “Mi amamas long lukim yu gen. Taim mi lukim yu bipo, yumi no inap toktok, long wanem yu no gat taim. Mi save yu gat planti wok, olsem na mi no ken pasim yu longtaim. Ating yu laik bai yu yet na famili bilong yu i stap orait na no gat sik tumas, a? Yu save olsem God i tok promis long pinisim olgeta kain sik? Sapos olsem, bai i gutpela tru, a? [Larim man i bekim tok.] Lukim dispela tok hia long namba 11 paragraf long sapta wan bilong dispela buk, nem bilong en: Yu Inap i Stap Oltaim Long Paradais Long Graun.” Sapos i gat taim, kaunim paragraf na stori long wanpela bilong ol skripsa i stap long pinis bilong paragraf, em skripsa i stori long nupela taim. Na tu, yu ken lukim ol piksa i stap long pes 11, 12, 13. Sapos man bilong haus i amamas long harim tok, ating bai yu inap kirapim Baibel-stadi.

⁴ Taim yu go bek lukim man i kisim wanpela liklik nius, yu ken mekim tok olsem:

◼ “Taim mi lukim yu bipo, yu kisim wanpela liklik nius, nem bilong en, Husat Tru i Bosim Dispela Graun? Olsem wanem? Yu hatwok long bilip olsem Satan em i bos bilong dispela graun? [Larim man i bekim tok.] Lukim namba wan paragraf hia long pes 6.” Kaunim paragraf, na nau mekim askim olsem: “Yu ting bilong wanem Satan i laik giamanim yumi?” Taim man bilong haus i bekim tok pinis, toktok wantaim em long namba 4 paragraf long pes 3. Yu ken stori moa long ol narapela paragraf bilong dispela liklik nius, o yu ken soim buk long em, Yu Inap i Stap Oltaim Long Paradais Long Graun na stori long paragraf 7 i go 9 bilong sapta 2 long pes 18.

⁵ I gat gutpela as na yumi mas i go bek lukim ol man i bin harim tok, maski bipo ol i gat wok o ol i no kisim wanpela buk samting. Yumi mas tingting strong olsem ol bai harim sampela tok moa. Bikpela samting em yumi mas tingim gut ol narapela na dispela i mas kirapim yumi long helpim ol long lainim tok i tru. Oganaisesen bilong Jehova i wokim ol buk na buklet samting na i kamapim sampela tok yumi ken mekim taim yumi autim tok, em ol samting yumi ken mekim wok long en bilong helpim ol narapela long tingim ol samting bilong spirit.​—⁠Mt 5:⁠3.

⁶ Sapos man i no gat bikpela laik tumas long harim tok, tasol yu bin stori gut wantaim em, orait, yu mas i go bek na traim kirapim tingting bilong em na bai em i amamas long harim sampela tok moa. Ating bai yu inap kirapim Baibel-stadi wantaim em na helpim em long bihainim rot i bringim man long laip oltaim. Mipela laik kirapim yupela olgeta long mekim yet wok bilong autim tok na helpim gut ol man long abrusim bagarap na i stap laip.​—⁠1 Ti 4:⁠16.

[Ol Askim]

1. (a) Taim yumi autim tok, bai yumi mekim wanem sapos yumi bungim man i gat wok long dispela taim yumi lukim em? (b) Bai yumi mekim wanem sapos i olsem man i laik harim tok, tasol em i no laik kisim wanpela buk samting?

2. Maski man i no kisim wanpela buk samting, bilong wanem yumi mas wok yet long helpim em long kisim save long Baibel?

5. Bilong wanem yumi mas mekim ol gobek na tingting strong olsem ol bai harim tok?

6. Bai yu inap mekim wanem sapos yu go bek lukim man i no gat bikpela laik tumas long harim tok, tasol yu bin stori gut wantaim em?