Askim

◼ Sapos kongrigesen i mas pasim tok long wanpela samting olsem wanpela tokaut, ol i mas mekim olsem wanem?

¹ Kongrigesen i mas mekim wanpela tokaut long taim ol i laik mekim ol bikpela samting olsem baim sampela hap graun, stretim o wokim wanpela Haus Kingdom, salim sampela mani i go long Sosaiti olsem kontribusen, o givim mani long helpim wasman sekit. Gutpela long olgeta taim ol elda i laik mekim sampela wok long mani bilong kongrigesen ol i mekim tokaut long kongrigesen.

² Tasol ating sampela taim ol elda inap mekim wok long mani bilong kongrigesen long mekim sampela bikpela wok, tasol ol i no gat wok long askim ol brata sista gen. Olsem: Ating wanpela taim tasol kongrigesen i pasim tok long givim mani long olgeta mun long Sosaiti bilong helpim wok bilong Sosaiti long mekim wok bilong Kingdom long olgeta hap bilong graun. Na long narapela samting kongrigesen i mas baim, olsem paua na wara samting na ol samting bilong klinim Haus Kingdom, long ol dispela samting kongrigesen i no gat wok long pasim tok.

³ Taim kongrigesen i mas mekim wanpela samting, lain elda i mas toktok gut long dispela. Na sapos klostu olgeta elda i orait long mekim dispela samting, wanpela bilong ol dispela elda, olsem wanpela brata bilong Komiti Bilong Lukautim Wok Bilong Kongrigesen, i ken raitim wanpela pepa bilong tokaut long ol samting ol i pasim tok long mekim. Ol i ken kamapim dispela tokaut long Miting Bilong Wok Autim Tok.

⁴ Elda i mekim wok olsem siaman i ken stori liklik na kamapim klia wanem samting kongrigesen i mas mekim na lain elda i ting wanem samting i gutpela long mekim. Nau kongrigesen i ken kamapim sampela askim long dispela. Sapos em i bikpela samting na i hatwok long ol brata i pasim tok long en, i gutpela sapos kongrigesen i wet na pasim tok long Miting Bilong Wok Autim Tok long wik bihain, na bai olgeta brata sista i gat taim long tingting gut long dispela samting. Long taim bilong vot long dispela tokaut ol brata sista i putim han i go antap.

⁵ Ol brata i dediket na baptais, ol tasol inap insait long pasim tok long mekim wanpela samting. Tasol sapos lo bilong gavman i tok ol narapela tu i mas insait long pasim tok, olsem long ol samting bilong gavman o taim kongrigesen i laik dinau long wokim Haus Kingdom, ol narapela man tu i ken insait long pasim tok. I no stret brata bilong narapela kongrigesen i insait long pasim tok.

⁶ Taim kongrigesen i pasim tok pinis na ol i orait long dispela tokaut, ol elda i mas raitim det, na sainim pepa, na putim long fail bilong kongrigesen.

[Ol Askim]

1. Kongrigesen i mas mekim wanpela tokaut long wanem ol samting?

2. (a) Long wanem taim lain elda i mas mekim tokaut bilong samting ol i pasim tok long mekim? (b) Olsem wanem? Ol i mas mekim wanpela tokaut long olgeta taim ol i laik kisim mani bilong baim samting ol i bin pasim tok pinis long baim? (c) Long wanem ol samting kongrigesen i no gat wok long pasim tok?

3. (a) Sapos kongrigesen i mas mekim wanpela samting lain elda i mas mekim wanem? (b) Ol i mas kamapim wanem kain tokaut long kongrigesen? (c) Long wanem miting ol i mas kamapim dispela tokaut long kongrigesen?

4. (a) Elda i mekim wok olsem siaman i mas mekim wanem samting? (b) Kongrigesen inap mekim wanem samting? (c) Sapos em i bikpela samting na i hatwok long ol brata i pasim tok, ol i mas mekim wanem? (d) Kongrigesen i mas vot long dispela tokaut olsem wanem?

5. Husat tasol inap insait long pasim tok?

6. Taim ol brata sista i orait long wanpela tokaut ol elda mas mekim wanem long pepa bilong tokaut?