Mekim Bikpela Wok Moa Long Gutpela Wok Bilong Kingdom
1 Jisas i tok, Kingdom em i gutpela samting tru, olsem wanpela bokis mani ol i haitim. (Mt 13:44-46) Olsem wanem? Yumi mekim pasin olsem ol man long ol tok piksa bilong Jisas i mekim, em ol i baim olgeta samting bilong ol i go long ol man bambai ol inap kisim samting i gutpela moa? Sapos olsem, bai yumi putim Kingdom bilong God i stap olsem nambawan samting, maski dispela i givim hatwok long yumi na yumi mas daunim sampela laik bilong yumi.—Mt 6:19-22.
2 Wok bilong Kingdom em i wanpela gutpela samting tru, olsem na yumi mas i gat laik long mekim bikpela wok moa. Olsem wanem long yumi? Wokabaut bilong yumi i makim olsem yumi mekim bikpela wok moa long wok bilong Kingdom? Yumi inap mekim olsem sapos yumi insait long ol wok bilong autim tok, olsem autim tok long ol haus, na mekim ol gobek na Baibel-stadi, na autim tok long kain kain taim na ples.
3 ‘Olsem Wanem Mi Ken Mekim Bikpela Wok Moa?’ Nupela yia bilong wok i kirap pinis, olsem na gutpela sapos yumi olgeta wan wan i skelim ol wok yumi bin mekim na bai yumi inap save long sampela samting yumi ken mekim bambai yumi inap lusim bikpela hap taim moa long wok autim tok. Askim yu yet: ‘Mi inap stretim ol samting bilong mi na bai mi inap mekim wok painia haptaim long sampela mun o long olgeta mun o kamap painia oltaim?’ Ol brata sista i kamap nupela painia long Septemba 1, bai ol inap go long Skul Bilong Wok Painia long yia antap.
4 Sampela pablisa i laik mekim bikpela wok moa bilong autim tok long kain kain taim na ples, na ol i bin putim dispela olsem wanpela mak bilong ol yet i ken winim. Planti taim dispela wok i kamapim gutpela kaikai. Ating sampela narapela i pilim olsem ol i mas mekim gut moa ol gobek o kirapim sampela nupela Baibel-stadi.
5 Sapos yumi pilim olsem yumi no inap mekim bikpela wok tumas, yumi ken mekim wanem na bai yumi inap mekim sampela wok moa? Sampela pablisa i winim pinis ol mak ol i bin putim long ol yet, ol i tok, nambawan samting yumi mas mekim, em yumi mas strong long putim ol samting bilong Kingdom i stap pastaim, maski yumi mas lusim planti samting. (Mt 6:33) Bilip strong long Jehova na wetim em i helpim yu. (2 Ko 4:7) Givim bel tru long beten na oltaim askim em long helpim yu. (Lu 11:8, 9) Sapos yumi givim bel tru long mekim bikpela wok moa bilong Jehova, yumi ken bilip olsem em bai blesim hatwok bilong yumi.—1 Jo 5:14.
6 Toktok wantaim ol narapela brata na sista i bin mekim bikpela wok moa long autim tok. Askim ol, ol i bin mekim wanem bilong strongim bel na winim ol hevi i laik pasim ol long mekim sampela hap wok moa. Ating stori bilong ol inap strongim yu long bilip olsem, yu tu inap mekim sampela wok moa.
7 Taim yu kaunim sampela tok bilong Wastaua o Wok Kingdom Bilong Yumi i stori long wok bilong autim tok, beten na tingim gut olsem wanem yu inap bihainim ol dispela tok. Mekim wankain pasin taim yu go long ol miting o kibung. Ol tok hia yumi lukim pinis, ol i bin kisim long wanpela hap bilong program bilong kibung sekit bilong dispela yia. Ol narapela hap bilong dispela tok bai i kamap long ol narapela Wok Kingdom bihain—em bilong helpim yumi long bihainim ol tok bilong dispela program.
8 Jisas i tingim wok bilong em long autim tok em i nambawan bikpela samting. Em i tok: “God i bin salim mi na mi kam, na kaikai bilong mi, em long bihainim laik bilong em na long pinisim wok em i bin givim mi.” (Jo 4:34) Olsem wanem? Yumi tu i gat wankain tingting? Sapos olsem, orait, yumi mas wok long painim kain kain rot bilong mekim bikpela wok moa na helpim ol narapela long kisim “planti gutpela tingting.”—Mt 12:35; Lu 6:45.
[Ol Askim]
1. Sapos yumi putim Kingdom bilong God i stap olsem nambawan samting, yumi mas redi long mekim wanem?
2. Yumi ken mekim wanem na bai yumi inap mekim bikpela wok moa long autim tok?
3. (a) Long kirap bilong nupela yia bilong wok, gutpela sapos yumi olgeta wan wan i mekim wanem? (b) Bilong wanem yumi mas mekim olsem?
4. Yumi ken putim wanem ol samting i olsem mak bilong winim? Yumi ken mekim gut moa wanem ol samting?
5. Yumi mas mekim wanem na bai yumi inap mekim sampela wok moa long wok autim tok?
6. Sapos yumi toktok wantaim ol narapela i bin mekim bikpela wok moa long autim tok, olsem wanem dispela inap helpim yumi?
7. Taim yumi kaunim sampela tok long ol magasin i stori long wok bilong autim tok, na yumi go long ol miting na kibung, yumi mas mekim wanem?
8. (a) Jisas i ting olsem wanem long wok bilong em long autim tok? (b) Wanem samting inap kirapim yumi long mekim bikpela wok moa?