Kirapim Ol Man Long Laikim Buk Stap Oltaim
1 Taim yumi go long ol haus na autim tok, yumi save bungim planti man em oltaim ol i wok long “tingting planti long ol samting bilong graun.” (Mk 4:19) Olsem na yumi mas kamapim sampela tok bilong kirapim tingting bilong ol na bai ol i laik harim tok. Ating pastaim planti man i no gat bikpela laik tumas long harim ol tok yumi laik autim. Tasol sapos yumi inap kamapim sampela tok bilong ol bikpela samting long i stap bilong ol, ating dispela inap kirapim tingting bilong ol na bai ol i amamas long harim tok bilong Kingdom. Em hia wanpela rot yumi ken mekim wok long en bilong kirapim tok: Makim sampela hap tok long buk Stap Oltaim yu ken stori long en, na ol man bai i amamas long harim. Bai yu tok wanem?
2 Yu ken tok olsem:
◼ “Sapos yu gat strong inap long stretim ol hevi bilong nau, bai yu laik stretim wanem hevi? [Larim man i bekim tok, na sapos i stret long yu long tok olsem, yu ken tok, planti man i gat wankain tingting olsem em.] Ol bikman bilong graun i bin wok long painim rot bilong stretim ol hevi, tasol inap long nau, ol i no bin mekim olsem. Tasol i gat wanpela Man i stap, em inap pinisim ol hevi bilong ol manmeri, na em bai mekim. Lukim ol tok bilong Song 145:16. [Kaunim skripsa, na lukim ol piksa i stap long pes 11-13 bilong buk Stap Oltaim.] Paragraf 14 long pes 14 i kamapim dispela askim yumi toktok pinis long en, na i kamapim narapela askim, olsem: ‘Tasol wanem taim bai dispela samting i kamap?’ ” Tokim em, dispela buk bai bekim dispela askim, na sapos em i laik kisim sampela save moa, orait, tilim buk long em.
3 O yu ken mekim tok olsem:
◼ “Taim wanpela man yumi laikim tumas em i dai, yumi save bel hevi, a? Ating yumi pilim olsem i no gat wanpela samting yumi inap mekim bilong helpim em. Olsem na ating yu bin tingim ol dispela askim: [Kaunim ol askim i stap long paragraf 1 long pes 76.] Sapos yumi save long bekim bilong ol dispela askim, bai dispela i mekim gut bel bilong yumi, a? Baibel i tok, ol man i dai pinis bai ol i stap laip gen. [Kaunim Jon 5:28, 29.] Dispela buk bai helpim yu long save, ol man i dai pinis ol i stap olsem wanem, na wanem samting bai painim ol long bihain.” Soim sapta 8 na 20 long em—mekim liklik tok tasol. Sapos yu pilim olsem man i laikim ol tok yu bin kamapim long em, orait givim buk long man, na em yet i ken lukim.
4 Ating planti taim bai rot i op long yu ken autim tok long kain kain taim na ples. Sapos olsem, orait long toktok bilong yu yet, yu ken mekim tok olsem:
◼ “Long nau kain kain hevi i pulap long graun, na ating hevi i bin painim yu tu, a? Tasol sori tru, planti taim ol man i no gat asua ol i bin kisim bikpela hevi. Yu ting wanpela taim bai kamap na God bai pinisim pen na hevi? [Larim man i bekim tok.] Mi laik soim yu wanpela samting God i tok promis long mekim bilong helpim ol wokboi bilong em. [Kaunim Song 37:40 na nau opim buk Stap Oltaim long pes 99.] Dispela buk bai helpim yu long save, bilong wanem God i bin larim pasin nogut i stap na em bai pinisim olsem wanem.”
5 Sapos yu wanpela yangpela pablisa, yu ken mekim wok long ol piksa i stap long pes 156-158. Bilong kirapim tok yu ken kamapim dispela askim:
◼ “Yu laik stap long kain ples olsem? [Larim man i bekim tok.] Tok bilong Baibel i as bilong ol dispela gutpela piksa yu lukim hia. [Makim long pinga ol skripsa.] Dispela buk inap helpim yu long kisim sampela save moa long tok promis God i bin mekim long kamapim Paradais long olgeta hap bilong graun. Ol tok bilong en inap helpim yu long abrusim bagarap na i stap laip, na maski yu mas lusim sampela hap taim long kaunim, dispela taim bai i no lus nating, nogat.”—Jo 17:3.
6 Taim yu laik tilim buk, kolim pe bilong buk, na tokim man, em bilong baim pepa na ing samting.
This article is repeated in km 8/95.