Ol i No Surik Long Autim Tok
1 Nem yumi holim, em ol Witnes Bilong Jehova, i makim yumi i narapela kain long ol narapela lotu na i kamapim klia wok bilong yumi. Yumi autim tok long ol gutpela pasin bilong God bilong yumi, Jehova. (Ais 43:10, 12) Olgeta wan wan i mas mekim dispela wok bambai ol inap insait long kongrigesen. Nambawan rot bilong mekim wok autim tok, em pasin bilong i go long ol haus na autim tok, na autim tok long rot, na mekim ol gobek na Baibel-stadi. Tok bilong 1 Korin 15:58 i kirapim yumi olgeta long insait tru long dispela wok.
2 Tasol sampela bilong kongrigesen ol i no inap mekim bikpela wok long autim tok. Ating sampela i gat bikpela sik o skin i no strong tumas na ol i mas i stap long haus tasol. Na sampela i surik long autim tok, long wanem, ol wanblut bilong ol, em ol i birua long wok bilong yumi, ol i putim hevi long ol. Na papa o mama i no bilip ating em i pasim pikinini bilong em. Ol brata i stap longwe long kongrigesen na i no gat PMV samting, ating ol i pilim olsem ol i hatwok long autim tok. Sapos sampela i man bilong sem na pret, ating dispela inap mekim na ol i surik long autim tok. Kain pablisa olsem, em ol i no mekim bikpela wok olsem sampela narapela i mekim na ol i no inapim ol wok ol yet ol i laik mekim, ating ol i pilim olsem ol i no mekim tru wok Kristen bilong ol. Tasol i no gat as na ol i mas daunim hatwok bilong ol yet, nogat. (Ga 6:4) Gutpela sapos ol i tingim dispela samting: Sapos ol i givim bel tru long mekim wok bilong Jehova maski ol i stap olsem wanem, orait, Jehova bai amamas long ol na dispela inap mekim gut bel bilong ol.—Lu 21:1-4.
3 Painim Rot Bilong Autim Tok: Kain kain hevi i bin painim planti tausen Witnes, tasol ol i no bin larim ol dispela samting i pasim ol long autim tok, nogat. Ol i kirap na painim kain kain rot bilong ol i ken autim tok long kain kain taim na ples. Ol pablisa i stap long haus tasol ol i bin mekim wok long telefon, na long dispela rot ol i bin mekim bikpela wok long autim tok. Ol i ting, ol man i kam lukim ol, ol bai harim tok. Sapos famili bilong meri marit i birua long tok i tru, ating meri i no inap autim tok long ol man i kam long haus; tasol taim rot i op, em i ken autim tok long ol man i stap long hap bilong em na ol man em i bungim taim em i raun mekim wok bilong em bilong olgeta de.
4 Ating papa o mama i no bilip i tambuim pikinini long autim tok long ol haus na long rot. Tasol pikinini i no ken ting dispela samting inap pasim em olgeta, nogat. Em i ken tingim ol wanklas na ol tisa i olsem “teritori” bilong em na em i ken mekim gutpela wok long autim tok na mekim sampela Baibel-stadi tu. Planti brata sista i stap longwe long kongrigesen ol i bin raitim pas long ol man, na long dispela rot ol i bin insait long wok autim tok. Sapos brata o sista i bihainim pasin Kristen na i givim bel tru long mekim wok, orait, long olgeta taim bai em inap painim sampela rot bambai em “i no inap i stap nating. Nogat. Em bai i karim planti kaikai.”—2 Pi 1:8.
5 Jehova i putim wankain lo long yumi olgeta, olsem: Taim yumi autim tok, yumi “mas wok strong na mekim.” (Kl 3:23) Hap taim yumi lusim long autim tok bai i no wankain, na ol wok yumi kamapim, em tu bai i no wankain. Tasol nambawan samting i kirapim yumi long mekim dispela wok, em pasin bilong laikim tru God na ol man. (1 Sto 28:9; 1 Ko 16:14) Maski ol samting yumi mekim em i liklik tasol, sapos yumi givim bel tru long mekim wok, bai yumi no pilim olsem yumi sot long bilip na yumi no mekim wanpela gutpela wok insait long kongrigesen, nogat. Olsem Pol, bai yumi tu inap tok tru olsem, ‘mipela i no bin surik long autim gutpela tok. Long ol bung na long ol haus bilong ol manmeri, mipela i bin skulim ol.’—Ap 20:20.
[Ol Askim]
1. Nem yumi holim, em ol Witnes Bilong Jehova, i kamapim klia yumi bilong mekim wanem wok?
2. (a) Kolim sampela samting em inap pasim yumi long mekim bikpela wok long autim tok. (b) Ol pablisa i no inap mekim bikpela wok long autim tok, ol i mas kisim wanem tingting long dispela?
3. Kolim sampela samting yumi ken mekim na bai yumi inap winim ol samting i laik pasim yumi long autim gutpela tok bilong Kingdom.
4. Sapos papa o mama i no bilip i tambuim pikinini long autim tok, pikinini i ken mekim wanem na bai em inap insait long wok autim tok?
5. (a) Long ol samting bilong autim tok, Jehova i bin givim wanem tok long yumi olgeta? (b) Maski ol samting yumi inap mekim em i liklik tasol, bilong wanem yumi no ken pilim olsem yumi no mekim wanpela gutpela wok?