Kirapim Ol Baibel-Stadi Long Buk Stap Oltaim
1 Pasin bilong laikim ol man i mas kirapim yumi long go bek kwik na helpim ol man i hangre long harim tok i tru. (Mt 5:6) Sapos yumi save olsem man i gat laik long harim tok, yumi mas go bek lukim em na wok long kirapim tingting bilong em na bai em i gat laik long harim sampela tok moa—nogut dispela laik i dai pinis. Pasin bilong redi gut pastaim em rot bilong mekim gut dispela wok.
2 Yumi gat wok bilong kirapim ol Baibel-stadi. (Mt 28:20) Long tok i go pas long buk Stap Oltaim ol i wokim pastaim, i gat tok olsem: “Dispela em i wanpela gutpela buk tru bilong yumi ken stadi wantaim olgeta man long en; ol yangpela na lapun, na maski ol i bin kisim bikpela skul o nogat.” Ol i wokim gut dispela buk bilong helpim yumi na bai yumi no hatwok tumas long stadi wantaim ol man long en, na i helpim ol nupela pablisa tu na bai ol i ken insait long dispela wok. Tasol bilong kirapim sampela nupela stadi, yumi mas mekim gut ol gobek.
3 Olsem Wanem Yumi Ken Kirapim Ol Stadi? Taim yumi mekim ol gobek, gutpela sapos yumi kamapim sampela tok i stret wantaim wanpela tok o askim yumi bin kamapim long namba wan taim yumi bin lukim man. Ating yu bin stori long man i dai pinis i stap olsem wanem, na yu bin kamapim askim, “I gat gutpela samting bai painim ol man i dai pinis?” Yu ken stori: Tok bilong kirap bek i gat as bilong en—Baibel i tok, bipo planti man i dai pinis ol i bin kirap bek. Lukim gen ol piksa i stap long pes 167-169. Orait nau stori long ol tok bilong paragraf 1 na 2 long pes 166. Sapos man i laik harim tok, orait tokim em, yu laik kam bek bilong toktok moa wantaim em long ol dispela samting.
4 Sapos yu bin toktok wantaim wanpela papa o mama i kamapim sampela tok i makim olsem em i tingting planti long ol hevi ol papamama i kisim long mekim bikpela long ol pikinini, orait, long toktok bilong yu yet, mekim tok olsem:
◼ “Olgeta papamama i laik bai ol gutpela samting tasol i painim ol pikinini bilong ol. Baibel i gat ol tok bilong helpim papamama long skulim ol pikinini bilong ol na bai i stap bilong ol i gat as bilong en. Long dispela as, mipela i strong long kirapim ol famili long stadi wantaim long ol tok bilong Baibel. [Lukim paragraf 23 long pes 246.] Ol save yu kisim inap helpim famili olgeta long kisim laip oltaim.” Kaunim Jon 17:3. Tokim em bai yu amamas long kam bek na helpim famili long save long pasin bilong kirapim stadi bilong ol.
5 Sapos yu pikinini o yu nupela pablisa na yu bin stori liklik long Paradais long namba wan taim yu bin lukim man, orait, opim buk long pes 3, na mekim liklik tok olsem:
◼ “Baibel i tok promis, ol man i bihainim laik bilong God ol i ken wet long kisim laip long kain ples olsem yu lukim long piksa hia—ol man i stap amamas na bel isi. Dispela buk i kamapim klia ol samting yumi mas mekim na bai yumi inap kisim dispela gutpela samting.” Stori liklik long pasin bilong yumi long mekim stadi, na tokim em, yu laik soim dispela pasin long em.
6 Yumi ol disaipel bilong Jisas, olsem na yumi gat wok bilong helpim ol man. (Ro 10:14) Sapos yumi bin tilim magasin o buk samting long ol o yumi bin toktok gut wantaim ol, yumi gat wok bilong kirapim ol long kisim sampela save moa. (Mt 9:37, 38) Sapos yumi inapim tru dispela wok, bai yumi olgeta inap kisim ol blesing i kamap long dispela wok.—1 Ti 4:16.
This article is repeated in km 8/95.