Tok Bilong God i Gat Strong
1 Baibel i bin helpim planti milion manmeri long senisim i stap bilong ol. Tok bilong en i save kirapim man, winim olgeta samting man yet i bin wokim. (Hi 4:12) Tingim ol samting Baibel i bin helpim yumi long en. Tru tumas, Baibel em i win tru.
2 Ol Witnes Bilong Jehova i go pas long stadim Baibel na long tokim ol man long ol gutpela samting bilong en. Yumi mas tingim pasin bilong kaunim Baibel em i bikpela samting long sedyul bilong yumi; em i mas stap olsem nambawan samting, winim taim yumi lusim long lukim televisen na long mekim ol narapela samting bilong kisim malolo na painim amamas.
3 Oltaim Yumi Mas Kaunim: Lain bilong Jehova i save pinis olsem pasin bilong kaunim Baibel long olgeta taim em i gat strong. Inap planti yia pinis bikpela rait long wanpela haus faktori bilong yumi long Bruklin i bin kirapim ol man long ol i mas “Kaunim Tok Bilong God Em Baibel Holi Long Olgeta De.” Ol nupela long famili Betel i mas kaunim Baibel olgeta insait long namba wan yia ol i kam stap long Betel.
4 Maski yu gat planti wok bilong mekim, yu save kaunim ol tok bilong Baibel em Sedyul Bilong Skul Bilong Wok Autim Tok i makim bilong kaunim long olgeta wik? Sapos yu bin hatwok long mekim olsem, orait long mun Novemba, gutpela sapos yu wok long stretim sedyul bilong yu. Hap tok bilong Baibel yumi mas kaunim long mun Novemba, em Song 95-109, olsem na long olgeta wik yumi mas kaunim 3-pela o 4-pela pes samting. Sampela brata sista i save lusim liklik hap taim long olgeta wan wan de na kaunim Baibel; ating ol i mekim long moningtaim tru o long apinun paslain long ol i go slip. Tasol maski yu mekim olsem wanem, bikpela samting i olsem: Oltaim yu mas kaunim Tok Bilong God na bai em inap helpim gut yu.
5 Tilim Baibel Long Mun Novemba: Planti man i laikim yet Baibel na ol i redi long putim gut yau taim yumi kaunim ol tok bilong en. Long mun Novemba bai yumi tilim Baibel New World Translation wantaim buk Harim Tok Bilong Bikpela Tisa. Dispela bai opim rot bilong yumi ken helpim ol man i gat gutpela bel long save olsem wanem Baibel inap helpim ol. Yumi mas amamas na givim bel long mekim dispela wok.
6 Redim sampela tok bilong ol hap i stap long baksait bilong Baibel New World Translation, na bai yu inap kirapim tingting bilong man na bai em i gat laik long kisim. Stori gut long olsem wanem dispela Baibel inap helpim em. Yu ken stori long wanpela tok i stap long hap “Bible Topics For Discussion,” na kamapim sampela tok i stret wantaim buk Harim Tok Bilong Bikpela Tisa. O yu ken helpim man long save olsem wanem indeks inap helpim man long painim ol skripsa em i save pinis long en. Dispela indeks i gat 92 pes na i gat ol hap tok bilong Baibel long en. Ating sampela pablisa bai ol i laik stori long olsem wanem “Appendix” o “Table of the Books of the Bible” inap helpim man long stadi long Baibel.
7 Yu mas tokim man olsem, Baibel New World Translation i stap long tok Inglis bilong ol man long nau, olsem na i no hatwok long kisim gut ol tok bilong en. Na Baibel New World Translation i kamapim nem bilong God, em Jehova, inap 7,210 taim.
8 Tru tumas, Baibel em i Tok Bilong God. Sapos yumi kaunim, na bilipim ol tok bilong en, na bihainim, bai dispela i helpim gut yumi. Ol i raitim Baibel bilong skulim yumi na yumi inap wetim gutpela samting i kamap bihain. (Ro 15:4) Bikpela samting, em yumi mas kaunim Baibel long olgeta de na redi long mekim wok long en bilong skulim ol man.