Askim

◼ Bilong wanem yumi mas putim hariap ripot bilong wok autim tok long olgeta wan wan mun?

Yumi olgeta i save amamas taim yumi harim ol gutpela samting i kamap long rot bilong autim tok bilong Kingdom. (Lukim Sindaun 25:25.) Aposel 2:41 i stori olsem, bihain long taim Pita i autim tok long de Pentikos, “samting olsem 3,000 manmeri i kam insait.” Bihain liklik, dispela lain i go bikpela “inap olsem 5,000.” (Ap 4:⁠4) Long taim bilong ol aposel, ol dispela gutpela ripot i bin mekim ol Kristen i amamas tru! Yumi tu i save amamas taim yumi harim ol gutpela ripot long nau. Yumi amamas tru long harim olsem wok ol brata sista i mekim long autim gutnius long olgeta hap i kamap gutpela.

Ol brata i save lusim bikpela hap taim long kisim na bungim ol ripot, olsem na em i bikpela samting long olgeta pablisa bilong Kingdom i mas wok gut wantaim ol. Yu save wok strong long putim hariap ripot long olgeta wan wan mun?

Taim yumi harim ripot bilong ol wok i go bikpela, dispela i save mekim yumi amamas. Na tu, ol ripot i save helpim Sosaiti long skelim wok i go bikpela olsem wanem long olgeta hap. Sosaiti i mas pasim tok long wanem hap ol i mas helpim ol brata sista, o ol i mas wokim wanem kain buk na ol i mas wokim hamas. Ol elda bilong olgeta wan wan kongrigesen i save lukim ripot bilong wok autim tok bambai ol i ken save long wanem ol samting kongrigesen i ken wok strong long en. Ol gutpela ripot i save strongim yumi, na kirapim yumi olgeta long skelim wok autim tok bilong yumi wan wan na wok strong long ol samting yumi slek long en.

Olgeta pablisa i mas save, em wok bilong ol long putim hariap ripot bilong wok autim tok long olgeta wan wan mun. Ol wasman bilong Buk-Stadi i ken kirapim ol pablisa long tingim dispela samting, long wanem, ol i save was i stap bilong helpim ol pablisa i gat hevi long mekim wok autim tok long olgeta mun. Ol i ken mekim toksave long laspela Buk-Stadi long olgeta mun, o long narapela taim i stret. Sapos i no gat rot bilong putim ripot long Haus Kingdom, orait wasman bilong Buk-Stadi i ken kisim ol ripot na givim hariap long kuskus bambai em i ken bungim wantaim ripot kongrigesen i salim i go long Sosaiti long olgeta mun.

Sapos oltaim yumi wok strong long putim hariap ripot bilong wok autim tok, dispela bai helpim ol brata i gat wok bilong lukautim yumi long ol samting bilong spirit.