Ol Wasman i Go Pas Long Wok—Wasman Bilong Stadi Wastaua
1 Wastaua i Tokaut Long Kingdom Bilong Jehova, em i nambawan samting “wokboi i gat gutpela tingting” i save mekim wok long en bilong givim yumi ol kaikai bilong spirit long taim stret bilong en. (Mt 24:45) Elda i lukautim Stadi Wastaua em i gat bikpela wok tru long mekim gut wok tisa na em i stap olsem gutpela piksa long bihainim ol pasin Kristen.—Ro 12:7; Je 3:1.
2 Bilong skulim gut ol man, wasman bilong Stadi Wastaua i mas wok strong long redim gut stadi long olgeta wik. Em i save beten na redim gut ol tok. Em i gat bikpela laik long helpim kongrigesen, na dispela i kamap klia taim yumi lukim em i givim bel tru long helpim yumi long pilim gut ol tok yumi stadi long en. Em i save kamapim ol bikpela tok bilong stadi na em i helpim yumi long save olsem wanem ol dispela tok i stret long as tok bilong stadi.
3 Bilong redi gut, long haus yet em i save lukim olgeta skripsa bambai em i ken save olsem wanem ol i stret long stadi. Em i kamapim klia olsem Tok Bilong God em i bikpela samting, na em i mekim olsem taim em i save kirapim kongrigesen long mekim gut wok long Baibel long taim bilong stadi. Sapos ol brata sista i no kamapim wanpela bikpela tok long bekim bilong ol o sapos ol i no kamapim stret insait bilong wanpela bikpela skripsa bilong stadi, em i mekim wanpela askim moa bambai ol i ken kamapim gut dispela samting. Long dispela rot, em i helpim yumi long kisim stretpela tingting, na save olsem wanem yumi ken bihainim ol tok yumi lainim.
4 Long olgeta taim wasman bilong Stadi Wastaua i save wok strong bambai pasin bilong em yet long mekim wok tisa i kamap gutpela moa. Em i no save mekim planti tok tumas, nogat; em i kirapim yumi long bekim ol tok long toktok bilong yumi yet, na mekim sotpela tasol, na bekim stret askim. Ating wan wan taim em bai kirapim yumi long tingim olsem, namba wan man i bekim tok em i mas mekim sotpela tok bilong bekim askim bilong paragraf. Ol brata sista i bekim sampela tok moa, ol i ken kamapim insait bilong ol skripsa, o mekim sampela tok bilong strongim dispela tok, o olsem wanem yumi ken bihainim ol dispela tok. Wasman bilong Stadi Wastaua i save kirapim yumi wan wan na ol famili long redim Wastaua, na long dispela rot em i kirapim olgeta long bekim sampela tok.
5 Yumi ol lain Jehova i skulim, yumi pilim tru wok bilong ol wasman bilong Stadi Wastaua, em ol i olsem “presen” na ol “i save hatwok . . . long skulim ol manmeri.”—Ais 54:13; Ef 4:8, 11; 1 Ti 5:17.