Kamapim Moa Tok Bilong Baibel!
1 Long Oktoba 1, 1919, ol i kirap wokim nius The Golden Age. Em i nambawan gutpela nius tru bilong autim tok long ol man. Bilong wanem i olsem? Long wanem, ol i wokim dispela nius bilong olgeta manmeri. Tasol nius Wastaua i no olsem, long wanem, inap planti yia ol i tingim nius Wastaua i bilong ol “liklik lain sipsip” tasol. (Lu. 12:32) Ol pablisa bilong Kingdom i givim bel tru long tilim dispela nupela nius The Golden Age olsem na inap planti yia namba bilong nius The Golden Age ol i wokim i winim bilong Wastaua.
2 Ol i wokim nius The Golden Age bilong soim ol manmeri olsem wok king bilong Krais tasol i rot bilong stretim olgeta hevi bilong ol man, na em bai kamapim gutaim long graun. Long ol yia i kamap bihain ol i bin mekim sampela senis long nius The Golden Age bambai i stret long i stap bilong ol man. Long 1937 ol i senisim nem bilong en na kolim Consolation. Long 1946 ol i senisim nem gen na kolim Awake!, em dispela nem yumi save long en long nau.
3 Kirap long taim ol i wokim dispela nius, em i bin helpim gut tru bikpela wok bilong autim tok kirap long yia 1919 na i kam inap nau. (Mt. 24:14) Tasol taim bilong yumi i sot pinis, olsem na i stret long mekim sampela senis moa long Awake!
4 Planti milion manmeri i save amamas long ritim Awake!, long wanem, em i save stori long ol samting i no bilong lotu na ol man i laik long ritim. Olsem na yumi ken ting olsem planti bilong ol man i save kam long Memorial long olgeta yia em ol man i save ritim Awake! Tasol man i laik abrusim bagarap long “taim Bikpela i belhat na bekim pe nogut long ol manmeri,” em i mas kisim helpim long mekim sampela samting moa na i no ritim tasol ol nius bilong yumi.—Sef. 2:3; KTH 14:6, 7.
5 Olsem na kirap long Janueri 2006, Awake! bai tokaut strong moa long Kingdom Bilong God. Em bai kirapim ol man long skelim tok bilong Baibel bilong kisim tok bilong helpim ol long stretim ol hevi bilong ol na em bai stori moa long ol tok Baibel i mekim long ol samting i wok long kamap nau. Long dispela rot ol man bai kliagut long ol samting i wok long kamap long nau na ating dispela bai kirapim ol long kisim save moa long Jehova.—Sek. 8:23.
6 Awake! bai stori yet long ol narapela samting ol man i gat laik long en. Tasol bikpela samting moa em bai stori moa long Baibel. (1 Te. 2:13) Wastaua i kamapim ol strongpela tok bilong Baibel na Awake! bai kamapim planti stori moa em Baibel i as bilong en, olsem na i no gat wok long wokim tupela Awake! long wanpela mun. Olsem na kirap long Janueri 2006, ol bai wokim wanpela Awake! long wanpela mun. Dispela bai mekim na bai i isi moa long redim, tanim tok, na salim ol nius bilong yumi.
7 Long nau 40 pesen bilong ol tok ples ol i save wokim Awake! long en, ol i save wokim tupela insait long wanpela mun. Tasol bihain ol bai wokim wanpela tasol insait long wanpela mun. Long ol narapela tok ples we ol i save wokim wanpela Awake! long wanpela mun o 4-pela Awake! long wanpela yia, ol bai i no gat senis. Ol bai wokim yet 4-pela Kirap! insait long wanpela yia. Bai i no gat senis long pasin bilong wokim Wastaua.
8 Kirap long namba wan taim ol i wokim dispela nius long 1919, em pastaim ol i kolim The Golden Age, Consolation, na nau ol i kolim Awake! em i bin helpim tru wok bilong autim tok. Mipela i beten olsem Jehova bai wok yet long blesim wok bilong tilim dispela nius, em nau ol i senisim, na em bai helpim planti manmeri moa bilong “olgeta lain man na bilong olgeta kantri na bilong olgeta kain skin na bilong olgeta tok ples” long save olsem Kingdom Bilong God tasol inap long helpim ol.—KTH 7:9.
[Askim Bilong Stadi]
1. Pastaim ol i wokim nius Wastaua bilong husat? Ol i wokim nius The Golden Age bilong husat?
2. Long nau wanem nem bilong nius The Golden Age? Wanem wok bilong en long taim ol i wokim nupela na i kam inap long nau?
3. Nius Awake! i strongpela tul na i helpim truim bilong wanem tok profet?
4. (a) Man i mas mekim wanem bambai em i ken abrusim bagarap long “taim Bikpela i belhat na bekim pe nogut long ol manmeri”? (b) Olsem Kamapim Tok Hait 14:6, 7 i tok, “ensel i flai i go namel long skai” i tokim olgeta man long mekim wanem?
5. (a) Kirap long Janueri 2006, Awake! bai stori moa long wanem samting? (b) Dispela bai kirapim planti man long mekim wanem? Dispela bai truim wanem tok profet?
6, 7. (a) Olsem wanem Awake! bai helpim ol man long bihainim tok bilong 1 Tesalonaika 2:13? (b) Ol bai wokim hamas Awake! insait long wanpela mun? Dispela senis bai kamap long hamas tok ples?
8. Awake! bai wok yet long mekim wanem?