Kaunim Ol Buk Samting na Kisim Save

ATING sampela taim yu bin tingting long raun i go long sampela longwe hap, o bungim ol man bilong ol narapela hap; o yu laik lukim ol bikpela wara o maunten o bikpela bus i stap long narapela hap, o kisim save long kain kain pisin o animal o diwai na plaua samting. O ating yu gat laik long go daunbilo tru long as bilong bikpela solwara, o lukluk long ol binatang long rot bilong glas samting; o yu laik stadi long ol samting em kru o ai o bel bilong yumi i save mekim, o lukim wanpela nupela pikinini i kamap. Na ating yu laik kisim save long samting i bin painim ol man long bipo.

Yu inap mekim olgeta dispela samting long rot bilong ol buk o nius samting. Yu inap sindaun tasol long haus bilong yu na kaunim ol kain kain buk na nius, em ol i stori long ol dispela samting. Olsem na Baibel i tok: “Ol man i save raitim planti buk, na dispela kain wok i no gat pinis bilong en.” (Saveman 12:12) Sapos yu kaunim ol gutpela buk, bai yu kisim planti gutpela save.

Winim Dispela Hevi na Kisim Amamas

Tasol sori tumas, inap olsem 800 milion manmeri em ol i winim pinis 15 krismas, ol i no save rit rait. Dispela i pasim ol na ol i no lain gut long ol samting, na ol i no inap toktok gut long ol man. Ol i no inap wokim gut tingting, na ol i mas harim tasol narapela man i kaunim ol samting i stap long ol buk o nius, tasol ol dispela narapela man inap long senisim tok na giamanim ol.

Sapos man i no inap rit rait, ol liklik wok bai givim hevi long em. Tingim, sapos dispela kain man i raun i go long narapela hap, em bai paul tru sapos em i no inap kaunim ol toksave i stap long arere bilong rot o long bas stop na long ples balus samting. Na em bai sem liklik sapos em i askim narapela man long kaunim o raitim ol pas bilong em o raitim tok long pepa bilong gavman na ol narapela pepa samting i no hatwok long raitim tok long en sapos yumi save long rit rait. Dispela tu bai pulim taim bilong narapela man. Sapos ol mama i no save long kaunim gut ol toksave i stap long skin bilong ol botol o tin kaikai na marasin samting, ol inap baim ol kaikai o marasin em inap bagarapim pikinini bilong ol.

Olsem na sapos man i no inap rit rait, dispela bai pasim em long mekim planti samting. Tasol i gat sampela samting em inap mekim, na em i no ken hevi moa long dispela samting. Dispela i wankain long stori bilong Marthe. Em i gat 70 krismas, tasol winim 20 yia samting em i stap aipas. Bihain dokta i katim na stretim ai bilong em, na em inap lukluk gen. Em i save kisim bikpela amamas tru long kaunim buk. Na i gat wanpela man nem bilong em Kalu, nau em i gat 70 krismas. Taim em i yangpela yet em i no inap kaunim buk samting. Tasol em i go long wanpela skul bilong lain long rit rait, na nau em inap kaunim buk long tripela tok ples.

Wan wan man tasol i wankain olsem Marthe, tasol i gat planti tausen moa i wankain olsem Kalu, em ol i lain pinis long kaunim buk. Tasol ol i no inap lain wantu tasol, nogat. Ol i mas lusim bikpela taim na strong bilong ol, na ol man i mas strongim na helpim ol tu. Olsem wanem? Yu inap helpim wanpela man long mekim olsem? Long planti kantri, ol Witnes Bilong Jehova i save skulim ol man i wankain olsem dispela man Kalu, long pasin bilong rit rait, na dispela samting i helpim tru ol Witnes long lain gut long rit rait. Long Naijiria planti Witnes i save gut long rit rait, winim ol narapela lain long dispela hap em ol i save rit rait.

Lain Long Kaunim Gut

Ating yu no gat dispela kain hevi bilong rit rait. Tasol olsem wanem? Yu save gut long kaunim buk? Ating yu hatwok long kaunim ol tok, na ating taim yu kaunim wanpela buk samting, yu gat pasin bilong pinis namel long wanpela sentens, na yu go bek long kirap bilong dispela sentens na kaunim gen dispela tok. O ating yu no kolim gut wanpela tok, o yu no kisim gut insait bilong wanpela tok yu kaunim. Yu inap mekim wanem bilong stretim ol dispela hevi?

Bitris i gat 13-pela krismas, na em i gat hevi long kolim gut sampela ol tok em i save kaunim. Taim em i lukim dispela tok “wanpela man,” em i save kolim olsem “narapela man.” Nau wanpela man i lainim em long kolim gut tok long maus​—na olsem wanem em inap bungim ol wan wan leta olsem a, e, i, o, u wantaim ol narapela leta bilong kolim gut ol wan wan tok samting​—na olsem wanem em inap brukim wanpela longpela tok long planti liklik hap, na long dispela rot em inap lain gut long kolim stret dispela tok. Dispela man i kirapim Bitris long harim ol stori bilong dispela buk, Baibel Stori Buk Bilong Mi long kaset na kaunim wantaim long buk bilong em.a Nau em inap kisim gut insait bilong ol tok na kolim gut ol dispela tok, na em i kisim bikpela amamas taim em i mekim olsem.

Ating yu tu yu mas lain moa long kolim gut ol wan wan tok. Taim yu kaunim dispela stori, ating yu lukim pinis sampela tok i longpela tumas. Traim long brukbrukim ol dispela tok i go long ol liklik liklik hap, na bihain yu traim long kolim wan wan liklik hap i stap insait long dispela longpela tok. (Olsem: o-ga-nai-se-sen) Bihain yu ken bungim ol dispela liklik tok wantaim na kolim stret dispela longpela tok olsem wanpela tok tasol. Traim long bihainim dispela pasin long kolim stret ol longpela tok. Yu mas lain gut long lukim ol wan wan tok na kolim stret na no ken popaia.

Ol man i save gut long kaunim buk, ai bilong ol i no lukim wanpela hap tok tasol, nogat. Ai i lukim hap tok i kamap bihain tu, olsem na ol i no malolo namel long ol wan wan tok​—ol i skruim i go na kaunim bilong ol i no bruk bruk. Sapos yu traim traim bai yu inap mekim olsem. Tasol yu mas was gut, nogut yu no pinis long kaunim wanpela tok yet na yu go bek na kaunim gen dispela tok. Sapos yu mekim olsem, bai yu no inap tingim gut ol tok yu bin kaunim pastaim, na bai yu no inap kolim stret ol tok. Olsem na yu mas lain gut long kaunim tok i go tasol.

Maski yu save gut long kaunim tok, tasol i gat ol narapela samting yu mas tingim tu. Pasin bilong kisim gut tok na kolim gen long tingting bilong yu yet long bihain, na kisim gutpela save long insait bilong ol tok​—ol dispela samting i olsem gutpela samting yumi ken wok long kisim. Bilong helpim yu long mekim olsem, lukim ol tok i stap insait long blok long han sut na skelim pasin bilong yu yet. Yu save bihainim wankain pasin, o nogat?

Kaunim Ol Buk na Nius i Givim Gutpela Save na Tingting Long Yu

Sapos yu lain gut long kaunim buk, yu inap kisim kain kain gutpela save. Tru, yu inap kisim sampela save long rot bilong televisen na video samting, tasol sapos yu kaunim stori i stap long buk samting, em bai helpim yu long tingim gut ol samting na bai yu ken wokim piksa long tingting bilong yu taim yu kaunim wanpela stori, na dispela inap kirapim yu long mekim ol gutpela toktok long ol narapela man. Bai yu inap tingim ol tok yu bin kaunim, na yu inap stori long ol dispela samting o raitim stori bilong ol samting yu kaunim pinis. Ol man bai amamas long stori wantaim yu, long wanem, yu gat save long stori long kain kain samting.

Tasol i gat kain kain save i stap long ol buk, olsem na bai yumi kirap long kaunim wanem samting? Baibel i tok: “Ol man i save raitim planti buk, na dispela kain wok i no gat pinis bilong en.” Tasol dispela ves i tok moa olsem: “Na sapos yu wok oltaim long stadi, bai skin bilong yu i les olgeta.” (Saveman 12:12) Yumi no inap kaunim olgeta buk​—na sampela stori i no inap helpim yumi long bihainim gutpela pasin, na planti ol i stori nating tasol. Olsem na yumi mas skelim gut ol samting yumi laik kaunim. Kaunim ol buk samting em bai helpim yu long mekim ol gutpela pasin, na ol samting em bai helpim yu taim yu stap long wok, o long skul, o taim yu stap wantaim famili. Yu inap kisim planti gutpela save sapos yu kaunim ol nius olsem Kirap! Ol stori i stap insait long dispela nius i kam long olgeta hap bilong graun.

Sapos yu skelim gut ol samting yu laik kaunim, yu no inap lusim nating taim, na ol samting yu kaunim inap helpim yu long mekim gut ol wok, na kisim gutpela save, na helpim yu long ol samting bilong spirit. Olsem na kaunim ol gutpela buk na mekim olsem long taim yu stap long haus, o taim yu malolo long ples wok, o taim yu wetim bas samting, na ol narapela taim tu. Kaunim ol buk samting​—bai yu kisim save long planti gutpela samting.

[Ol Futnot]

[Blok long pes 27]

Pasin Bilong Kisim Save

● Taim yu kaunim buk, mekim ol askim long yu yet, olsem bilong wanem, o olsem wanem.

● Tingim as tok na ol het-tok.

● Skelim tok bilong ol paragraf wantaim as tok.

● Skelim nupela save yu wok long kisim wantaim save yu kisim pinis.

● Mekim wok long dispela save yu kisim pinis.

Lain Long Ol Nupela Tok

● Makim ol tok yu no save gut long en.

● Skelim dispela tok wantaim stori yu kaunim.

● Painim insait bilong dispela tok long buk diksenari.

● Lain long kolim stret ol tok.

● Mekim wok long ol nupela tok taim yu toktok wantaim man.