Ol Yanpela i Laik Save . . .

Bilong Wanem Mi Mas Stap Narapela Kain?

WANPELA yangpela Kristen i tok: ‘Em hatwok long i stap narapela kain.’ Sapos yu wanpela Kristen ating yu pilim hevi bilong dispela yangpela. Olsem olgeta yangpela, yu laik bai ol narapela i laikim yu, a? Tasol bilong ol narapela i ken laikim yu, yu mas mekim sampela samting ol tu i save mekim, olsem: Mekim wankain tok na pasin, na pasim kain klos olsem ol i save pasim. Sapos yangpela i no mekim olsem, ating ol narapela i no laikim em na ol bai tok bilas long em.

Olsem na i hatwok long ol yangpela Witnes Bilong Jehova long i stap narapela kain na bihainim pasin Kristen. Ol yangpela Kristen i no winim ol narapela, nogat; tasol ol i bin lain long ol lo bilong Baibel, olsem na sampela samting ol i mekim i no wankain long samting ol narapela yangpela i mekim. Tingting bilong ol i no wankain long tingting bilong ol narapela long maritpasin, na long litimapim nem bilong kantri, na long insait long ol holide bilong lotu, na long pasin bilong yangpela man na meri i wokabaut wantaim.a

Wanpela yangpela Witnes i tok, long i stap narapela kain long ol narapela yangpela, dispela i hatwok tru, winim ol narapela samting wanpela Kristen i mas mekim. Narapela i tok: ‘Ol narapela i tok bilas long mi na daunim mi. Planti taim ol i sutim tok nogut long mi.’ Na ating papamama Kristen i strong long yu mas stap narapela kain na yu mas bihainim ol stretpela pasin, na pasim klos i stret, na no ken harim musik nogut.

Lain Bilong God i Narapela Kain!

Ating yu bai tok: ‘I gat rong long mekim ol samting ol narapela yangpela i mekim?’ Kirap long bipo i kam inap long nau, ol man i save husat i lain bilong God, long wanem, ol i bin i stap narapela kain. Bipo God i bin kisim lain Israel olsem “lain manmeri” bilong em. (Kisim Bek 19:5) Ol i lain bilong God, olsem na ol i mas i stap narapela kain long ol narapela lain. Long Wok Pris 18:3 God i tok: “Yupela i bin i stap long Isip, tasol yupela i no ken bihainim pasin bilong ol. . . . Nau mi laik bringim yupela i go long Kenan, tasol yupela i no ken bihainim pasin bilong ol Kenan. Na yupela i no ken bihainim ol lo bilong ol.”

Ol Isip bipo i save lotuim ol animal. Na ol i bilip strong olsem, taim ol i dai ol i no dai tru, long wanem, tewel i stap laip yet na i no save dai. Na planti bilong ol i save mekim pasin sem wantaim ol wanblut. Na kantri Kenan i gat wankain pasin. Ol i save lotuim ol god giaman, na mekim pasin sem na pamuk, na kilim i dai man, na ol i ofaim pikinini bilong ol long ol god giaman. Baibel i tok: “Yupela i no ken mekim ol dispela pasin nogut. Sapos yupela i mekim, bai yupela i kamap doti long ai bilong mi. . . . Yupela i no ken mekim pasin bilong ol haiden, long wanem, dispela pasin i sting moa yet na mi no laikim tru.”​—Wok Pris 18:​24-26.

Jehova i strongim dispela tok bilong em taim em i givim Lo long lain Israel. Dispela Lo i bosim olgeta samting long sindaun bilong lain Israel, olsem: Samting ol i ken kaikai na samting ol i no ken kaikai (Wok Pris sapta 11); ol samting ol i mas mekim bilong stap klin long skin (Lo 23:​12, 13); ol samting bilong maritpasin (Wok Pris 18:​6-23). Na Lo i tok tu long klos na bilas na mekim gut skin bilong ol! “Yupela i mas kisim ol sotpela hap string na wokim ol liklik mekpas bilong pasim long 4-pela kona bilong klos bilong yupela. Na long ol wan wan mekpas yupela i mas putim wanpela blupela string.” (Namba 15:38) Ol man long lain Israel i no inap katim gras bilong het klostu long yau bilong ol, na ol i mas i gat mausgras. (Wok Pris 19:27; 21:5) Ol i mas bihainim dispela lo, maski wanpela Juda i laik rausim mausgras bilong em, o em i no laik kisim ol hap string na wokim olsem ol liklik mekpas bilong pasim long klos bilong em.

Bai yu pilim olsem wanem sapos i gat lo olsem yu no ken rausim mausgras bilong yu na yu mas pasim wanpela kain klos? Ating yu no amamas long dispela samting, a? Tasol ol lo bilong God i bikpela samting. Jehova i bin tok: “Ol dispela hap string bai i mekim yupela i tingting long bihainim olgeta lo bilong mi na bai yupela i stap ol manmeri tru bilong mi tasol. Mi Bikpela, mi God bilong yupela.” (Namba 15:​38-41) Olsem na dispela lo long klos bilong lain Israel i bin helpim ol long ol i no ken lusim tingting olsem ol i narapela kain long ol narapela lain man, na ol i lain holi bilong Jehova. Ol lo long kaikai samting i save lukautim skin bilong ol, na tu, em i helpim ol Juda long ol i no ken poromanim ol man bilong narapela lain na insait long lotu bilong ol. Lo Bilong Moses i bin stap olsem wanpela “banis” namel long lain bilong God na ol narapela lain. Dispela Lo i bin lukautim lain Israel.​—Efesus 2:14.

Ol Kristen i Mas i Stap Narapela Kain

Long nau ol Kristen i no stap aninit moa long Lo Bilong Moses, olsem na ol inap tingim wanem samting ol i laik pasim o kaikai. (Rom 7:6) Tasol Jisas i bin tokim lain bilong em olsem: “Yupela i no man bilong dispela graun. Nogat. Mi makim yupela pinis bai yupela i lusim pasin bilong dispela graun.” (Jon 15:19) Jisas i tok ol Kristen i mas i stap narapela kain long “pasin bilong dispela graun”​—em ol pasin God i no laikim. Bilong wanem yumi mas i stap longwe long ol pasin bilong graun? Jon i tok: “Dispela graun olgeta em i stap aninit long strong bilong Satan.”​—1 Jon 5:19.

Olsem na tingim sampela yangpela long skul bilong yu. Olsem wanem long tingting bilong ol, pasin bilong ol, toktok bilong ol, musik ol i save laikim, ol klos ol i save pasim? I olsem ol dispela yangpela i bihainim ol lo bilong God, o ol i bihainim ol lo bilong “giaman god bilong dispela graun,” em Satan? (2 Korin 4:4) Sapos ol dispela yangpela i bihainim pasin bilong dispela graun, yu yet bai kisim hevi sapos yu bihainim pasin na toktok bilong ol, na pasin bilong ol long pasim klos na komim gras! Sapos yu bihainim ol i olsem yu no wanpela Witnes tru bilong Jehova. Na sapos yu no stap longwe long ol dispela samting, ating dispela bai pulim yu na bai yu kirap na mekim ol samting i no stret.

Yangpela meri Kim i tok: ‘Mi save ol poroman inap helpim o bagarapim pasin bilong narapela. Taim mi stap long skul mi no wanpela strongpela Kristen, olsem na mi gat planti poroman ol i no Kristen. Tasol dispela i no gutpela long wanem, mi bin kirap na mekim planti samting i no stret.’ Tasol maski yu no bin mekim samting nogut, i no olsem yu no inap bagarapim pasin pren i stap namel long yu na Jehova, nogat. Lukim tok bilong Baibel long Jems 4:​4, em i tok: “Sapos man i laikim pasin bilong graun, em i mekim pasin birua long God. . . . Sapos man i laik pren wantaim ol pasin bilong graun, em bai i kamap birua bilong God.”

Olsem wanem? Yu laik kamap birua bilong God? Ating nogat! Maski yu no kisim ol drak nogut, o pamuk samting, yu mas kamapim tru bel bilong yu olsem yu no insait long pasin bilong dispela graun.

Yu Ken Mekim Wanem Bilong i Stap Narapela Kain?

Tingim ol klos yu laik pasim. Klos bilong yu i kamapim pasin na tingting bilong yu, na samting yu givim bel long en. Long nau ol Kristen inap tingim wanem kain klos samting ol i laik pasim, i no olsem long taim bilong Israel bipo. Stail bilong ol klos i save senis senis, olsem na yu no ken kirap kwik na bihainim nating pasin bilong ol narapela long putim ol nupela nupela kain klos.

Long skul bilong wanpela Kristen planti yangpela i katkatim trasis bilong ol na em tu i laik bihainim dispela pasin. Olgeta yangpela i no laik pasim klos i narapela kain long ol narapela yangpela. Tasol papamama i bihainim savepasin taim ol i pasim yu long putim klos i narapela kain stret, olsem i pas tumas long skin, o i gat nem o i makim olsem yu wanpela hambakman. Sapos yu pasim kain klos olsem, ol narapela man bai ting yu wanem kain man? Yangpela meri Jefi i bin katim gras bilong em long narapela kain stail. Em i tok: ‘Mi ting gras i “narapela kain” stail tasol, tasol bihain ol man i askim mi: “Tru, yu wanpela Witnes Bilong Jehova?” na mi sem pipia long dispela.’

Baibel i tok long 1 Timoti 2:9 olsem: “Putim ol gutpela klos samting, inap tasol long [yu]. [Yu] i no ken hambak na bilasim gras na skin.” Ating taim yu pasim gutpela siot trasis o dres samting, ol narapela yangpela bai tok bilas long yu, tasol bai ol man i save yu narapela kain​—na ating dispela bai mekim na God bai amamas long yu!

Olsem wanem long ol musik yu laikim? Planti yangpela i tromoi bikpela hap taim long harim musik. Yu inap i stap amamas na belgut sapos yu skelim gut ol musik yu laik harim. Long nau planti musik i no gutpela long ol Kristen i harim. Planti musik na singsing i save stori long maritpasin, pasin bikhet, kros pait, na ol samting bilong ol spirit nogut. Olsem wanem? Yu save bihainim planti yangpela long ol musik ol i save laikim, o yu save strongim bel na harim ol gutpela musik tasol?

Tru tumas, bilong i stap narapela kain long ol narapela man, yu mas strongim bel bilong yu. Taim yu no larim ol yangpela i bosim yu long ol samting bilong amamas na toktok na klos, ol bai toktok planti long dispela. Jisas i bin tok: “Yupela i no man bilong dispela graun, Nogat. . . . Olsem na ol manmeri bilong graun i save birua long yupela.” (Jon 15:19) Olsem na long i stap narapela kain em bai hatwok tru, ating winim ol narapela samting yu mas mekim​—tasol yu inap mekim. Em rot bilong bihainim ol lo bilong God. Em rot bilong amamasim yu yet na maus bilong bel bilong yu bai i no gat tok.

[Ol Futnot]

[Ol Piksa long pes 18]

Sapos wanpela yangpela i no stap narapela kain long ol narapela yangpela, ol bai ting em i no wanpela Kristen tru