Nupela Musik—Em i Bilong Givim Wanem Tingting Long Man?
WANPELA yangpela man i sanap long pes bilong ol man, ai bilong em i kamaut, na em i gat longpela gras, na ol manmeri i ure long em na litimapim nem bilong em. Em i kisim baket i gat blut na bel bilong ol animal i stap insait long en, na em i tromoi ol dispela samting nogut i go long ol man i stap klostu long em. Ol man i lap na rapim ol dispela samting long skin bilong ol na ol i tromoi ol hap bel bilong animal i go long ol narapela narapela. Wanpela nius (St. Petersburg Times) bilong Florida i tok, wanpela ben i bin mekim dispela samting, nem bilong en Deicide, na insait bilong dispela nem i olsem ‘kilim i dai wanpela god.’ Ol i save wokim musik kain olsem rok, tasol em i pairap moa yet. Long nau planti man i laikim dispela kain musik, long wanem, ol i bin harim sampela singsing bilong wanpela ben ol i kolim Dai, na dispela singsing ol i kolim ol samting nogut.
Bos bilong ben Deicide i tok em i givim bel long Satan, na em i no laikim God, long wanem, bipo em i kisim bagarap long taim ka i bam, na mak i stap yet long skin bilong em na i olsem J, na dispela i makim Jisas o Jehova. Em i tok, sampela maus i save tokim em long kilim i dai skin bilong em. Em i putim wanpela mak bilong Satan long pes bilong em.
Pasin na toktok bilong ol narapela ben olsem dispela, em tu i nogut. Wanpela nius (Time) i stori long wanpela ben i wokim planti singsing na ol man i baim wan milion 500 tausen insait long 3-pela de tasol, na ol dispela singsing na musik i samting bilong pait na kros na birua long ol narapela lain na givim pen long man. Na ol i singsing tu long ol samting bilong pasin sem na bilong kilim man i dai na ol narapela pasin nogut. Sampela stua i no laik baim ol dispela singsing i go long ol man.
Sampela ol man bilong lotu na sampela lain politik ol i gat tok long dispela kain singsing. Wanpela lain dokta (American Medical Association) na narapela lain tu (American Academy of Pediatrics) i tok, ol dispela musik na singsing i save bagarapim man. Na wanpela nius (American Health) i tok, ‘Ating ol dispela musik na singsing inap bagarapim skin na tingting na bel bilong ol pikinini na ol yangpela manmeri.’
Olsem wanem? Dispela kain singsing inap mekim nogut long man? As tok bilong ol em ol samting bilong drak, na dring, na man i kilim i dai skin bilong em, na kros pait, na lotuim Satan, na pasin pamuk, na bel nogut long narapela lain. Yu ting singsing olsem em inap strongim man?—Lukim Sindaun 6:27, 28; Filipai 4:8.