“Nupela Taim”—Kirap Bilong En i Gat Planti Hevi
WANPELA MAN LONG JEMANI I RAITIM DISPELA STORI BILONG KIRAP!
TAIM 1991 i kirap, ol man i ting gutpela samting inap kamap. Pasin birua namel long lain Is na Wes i pinis. Tru, i gat hevi long Kuwet, long wanem, ami bilong Irak i go insait long Kuwet na kisim kantri long Ogas, 1990. Tasol Yunaitet Nesen i mekim wok long strong bilong en na tokim Irak long lusim Kuwet paslain long Janueri 15. Yunaitet Nesen i no tok tasol, kwiktaim ol i bin redim wanpela ami, em ol soldia bilong 28 kantri i memba bilong Yunaitet Nesen bilong rausim Irak sapos Irak i no lusim Kuwet. Ol lain long olgeta hap i wok gut wantaim long dispela hevi wantaim Irak, olsem na planti man i ting, nupela taim bilong wok gut wantaim i kirap pinis.
George Bush, em presiden bilong Yunaitet Stets long dispela taim, em i tok: “Yumi na ol lain i kam bihain, yumi olgeta inap kamapim nupela taim, em wanpela taim stretpela lo bai bosim olgeta man, na hatpela pasin nogat.”
Irak i no bihainim tok na lusim Kuwet paslain long Janueri 15, olsem na ol i kirap na sutim planti planti roket-bom i go long ol samting bilong ami bilong Irak. Em nau, Irak i save ol lain long olgeta hap i no tok giaman. Long Epril 11, klostu 3-pela mun bihain, Yunaitet Nesen i tok, Pait Bilong Galf i pinis. Dispela tok promis long nupela taim i gat pasin sekan, na ol man i gat gutpela sindaun, na ol gavman i wok gut, i olsem em bai kamap.
Ol Pait i No Laik Pinis
Namel long 1991, tupela ripablik, em Slovenia na Kroesia, i tok ol i no stap aninit moa long kantri bipo ol i kolim Yugoslavia. Em nau, pait i kirap insait long kantri yet na bihain ol liklik kantri i kamap. Klostu wanpela yia bihain, wanpela saveman bilong ol samting bilong wok politik, em Pierre Hassner bilong Frans, em i tok: “Olsem nupela taim bilong Yurop paslain long 1914 i pinis long dispela yia, nupela taim bilong George Bush i pinis long Sarayevo.” Tasol long Novemba 1995, i olsem pasin birua i laik pinis taim ol bikman i bung long Deton, Ohaio, Yunaitet Stets, na ol i toktok long stap isi, na long Disemba 14 long Paris, ol i sainim kontrak long ol i no ken pait moa. Olsem na klostu long pinis bilong 1995 ol man i ting, tru nupela taim inap kamap.
Isi isi ol ripablik bilong Soviet Yunion i wok long bruk na i stap narapela narapela. Long 1991, Lituenia, Estonia, Latvia, ol i namba wan kantri bilong mekim olsem, na bihain ol narapela i mekim. Long Disemba ol i kamapim lain Commonwealth of Independent States, tasol sampela kantri em bipo ol i stap insait long Soviet Yunion, ol i no laik insait long dispela lain. Long Disemba 25, Gorbachev em i lusim wok olsem presiden bilong Soviet Yunion.
Tasol ol wan wan ripablik i no stap gut wantaim. Long Sesnia long hap not bilong Kokesas long Rasia, ol man i bilong lotu Muslim na ol i laik kisim independens. Long Disemba 1994, ol i mekim traim long ol i no ken stap moa aninit long wok bos bilong Rasia, tasol dispela i kirapim ol soldia bilong Rasia long pait long ol. Maski inap 30,000 manmeri i bin kisim bagarap taim dispela hevi i kirap long 1990 samting, dispela pait i stap inap long nau.
Kirap long Oktoba 1995, i gat planti (27 i go 46) liklik na bikpela pait i kamap long olgeta hap.
Bikpela Hevi Long Mani
Kirap long 1990 samting nupela taim i no gat planti hevi long ol wok politik tasol, nogat; long mani tu.
Long 1991, Nikaragua i daunim strong bilong mani bilong kantri, tasol maski gavman i mekim olsem, 25 milion kordobas i gat wankain strong tasol olsem 1 dola bilong Yunaitet Stets. Na long Saier pe bilong ol samting i go antap inap 850 pesen, olsem na sindaun bilong ol man long dispela kantri i bagarap stret; i no gat planti kantri olsem. Rasia tu i gat hevi long mani. Long 1992, pe bilong ol samting i save go antap tru inap 2,200 pesen long olgeta wan wan yia. Olsem na mani bilong Rasia i samting nating. Bihain ol samting i bin kamap orait liklik, tasol long 1995 ol i gat hevi yet long ol samting bilong mani.
Long taim bilong yumi i no gat narapela bikpela rong i bin kamap long mani olsem i bin kamap long 1991 long wanpela beng (Bank of Credit & Commerce International). Beng i bagarap, long wanem, sampela lain i giaman na paulim mani. Olsem na sampela bilion dola i lus, em mani bilong sampela man bilong 62 kantri em ol i bin putim mani bilong ol long dispela beng.
I no ol kantri i gat hevi long mani tasol ol i tingting planti, nogat; strongpela kantri Jemani tu i gat hevi, long wanem, Is na Wes Jemani i kamap wanpela kantri na dispela i gat bikpela pe. Wok mani i go sot taim ol man i strong long ol i mas kisim sampela de moa bilong malolo na ol i mas kisim sampela mani moa bilong lukautim skin bilong ol. Na planti man i no go olgeta de long wok, na planti i mekim nabaut long welfe—olgeta dispela samting i putim sampela hevi moa long mani bilong gavman.
Long Yunaitet Stets, planti bikpela bagarap i bin kamap na dispela i putim bikpela hevi long ol insurens-kampani, ol i hatwok long bekim mani long ol man i singaut long en. Long 1993 wanpela buk (Bankruptcy 1995: The Coming Collapse of America and How to Stop It) i tokaut olsem, ol samting gavman i mekim i winim mani ol i holim, na ol dinau bilong gavman i wok long i go bikpela moa. Na wanpela bikpela sosaiti insurens i gat nem, em Lloyd’s of London, Briten, em tu i gat hevi. Planti hevi i kamap, olsem na kampani i mas tromoi bikpela mani, dispela i mekim na i olsem kampani i mas tingim wanpela samting ol i no laik tingim—pasim bisnis, long wanem, mani i laik pinis.
Lotu i Gat Strong?
Long 1991 wanpela nius bilong Jemani (Frankfurter Allgemeine Zeitung) i tok: “Dispela tingting long nupela taim bai kisim olgeta hap graun i wanpela tingting bilong ol Amerika bilong bipo i kam inap nau, em lotu i wanpela as bilong dispela tingting na tok, na ol i mekim long kain tok olsem tok Kristen.”
Ating yumi ting, lotu i as bilong dispela kain tingting, olsem na dispela i mas strongim wok bilong kamapim nupela taim. Tasol nogat; ol lotu i insait long ol pait na hevi, olsem na ol man i no stap isi long sindaun bilong ol. Sampela gavman, na Aljiria na Isip i tupela bilong ol, ol i no wanbel wantaim strongpela tingting bilong sampela man bilong lotu Islam. Lotu i as bilong pasin birua na bagarapim man i bin kamap long dispela tupela kantri. Long 1993, lotu i as bilong ol pait i kirap long India, na inap 9-pela de ol man i kros pait long Bombe, na winim 550 man i dai.
Long 1994, wok bilong ol misin long kamap wanbel i no kamap gut taim Misin Angliken i makim 32 meri i kamap pris. Pop John Paul Namba 2 i tok, dispela i “wanpela bikpela samting i pasim wok bilong Misin Katolik na bilip Angliken long kamap wanpela.”
Long Epril 19, 1993, gavman bilong Yunaitet Stets na wanpela lotu i bihainim man (Branch Davidians), ol i no stap isi. Long kompaun bilong dispela lotu long Weko, Teksas, polis bilong gavman na lain bilong dispela lotu ol i pait. Fopela polis i dai na inap olsem 75 manmeri bilong dispela lotu ol i dai. Tupela yia bihain polis i wok long painim as na ol birua i bin haitim bom insait long wanpela bikpela haus bilong gavman long Biktaun Oklahoma na 168 manmeri i dai. Ol i ting ol birua i laik bekim bek samting polis i bin mekim long Weko.
Long Mas 1995, olgeta man i kirap nogut taim ol paitman i haitim wanpela kain ges nogut long ples bilong ol tren long Tokyo. Tenpela man i dai na planti tausen i kisim sik. Na olgeta man i kirap nogut tru long save em wok bilong wanpela lotu i save tok profet olgeta taim long ol samting bai kamap bihain, em lotu Aum Sinriko, o narapela nem bilong en, Bikpela Tok Tru Aum.
Ol Bikpela De i No Gat Amamas
Long yia 1492, Kolambas i painim ol kantri long hap not na saut bilong Amerika. Long 1992, ol man i laik amamas long dispela taim i bin kamap 500 yia bipo, tasol sampela i no amamas na tok pait i kamap. Inap 40 milion manmeri, em ol i tumbuna pikinini bilong ol Indian bilong Amerika, ol i no amamas ol man i tok, wanpela waitskin bilong Yurop i bin “painim” ol kantri lain tumbuna bilong ol i bin sindaun long en na stap gutpela paslain tru long mama i karim dispela man. Sampela i kolim Kolambas olsem “namba wan man i bin mekim nogut long ol narapela man na daunim ol.” Na tru tumas, taim Kolambas i kam sua long ol dispela kantri, ol asples i no kisim blesing, ol i kisim bikpela hevi. Ol dispela man i kam long kantri bilong ol na ol i tok ol i Kristen, ol i stilim graun bilong ol, na ol i tekewe wok bilong ol asples long bosim kantri bilong ol yet na mekim ol i kamap olsem man nating, na ol i kilim ol i dai.
Long Septemba 1995, Israel i makim 16 mun ol bai amamas bilong tingim taim King Devit i daunim ol birua na kisim Jerusalem inap 3,000 yia i go pinis. Tasol taim ol i kirap na amamas, wanpela bagarap i kamap long Novemba 4. Wanpela man i sutim long gan na kilim i dai Praim-Minista Yitzhak Rabin sampela minit bihain long em i bin tokaut long bel isi long wanpela bung. Dispela i mekim na hevi i kamap long ol bikpela toktok bilong kamapim bel isi long hap bilong Midel-Is. Dispela i makim olsem bikpela hevi i stap namel long lotu bilong ol Juda na ol Palestain, na namel long ol Juda yet.
Namel long 1991 na 1995, ol man i tingim sampela bikpela de i bin kamap inap 50 yia i go pinis long taim bilong Namba 2 Pait. Olsem: Japan i tromoi bom long Pel Haba, olsem na Yunaitet Stets i go insait long pait, na ami bilong Briten na Amerika na ol kantri i helpim ol, ol i go insait long sampela kantri bilong Yurop, na ol man insait long ol banis kalabus nogut bilong ol Natsi ol i kamap fri, na ami bilong ol dispela kantri i winim pait long Yurop, na ol i tromoi namba wan bom long Japan. Long dispela taim blut na aiwara i pulap long planti hap, olsem na sampela man i gat askim—i stret yumi amamas long tingim ol dispela kain taim?
Ol dispela samting i bin kamap bipo i mekim na ol man i tingim narapela bikpela de—de ol i kamapim Yunaitet Nesen long Oktoba 1945. Ol man i amamas, long wanem, ol i ting nau ol i painim pinis rot bilong kamapim pasin sekan long graun.
I no longtaim i go pinis na seketeri-jeneral bilong Yunaitet Nesen, em Boutros Boutros-Ghali, em i litimapim nem bilong Yunaitet Nesen na em i tok, dispela oganaisesen i bin mekim planti gutpela wok. Tasol em i no bin mekim wanpela samting sata bilong en i tok em bai mekim—“kamapim bel isi na gutpela sindaun long graun.” Planti taim ol soldia bilong en i stap long ol kantri bilong helpim ol man long i stap isi, tasol ol i no stap isi—ol i pait. Em nau, i kam inap long 1995 wok bilong Yunaitet Nesen i lus, em i no inap pinisim ol hevi na kamapim nupela taim.
Wok King Bilong God i Kamap Gutpela!
Planti hevi i kamap long wok politik, na mani, na lotu, olsem na nau ol man i no stori moa long nupela taim, ol i stori long taim bilong mekim nabaut. Taim ol dispela samting i kamap, ol Witnes Bilong Jehova i save em narapela samting i makim olsem God tasol inap kamapim wanpela nupela taim long graun na ol man i ken stap gut long en.
Taim pasin birua namel long lain Is na Wes i pinis, long sampela kantri, ol i no gat tambu moa long wok bilong ol Witnes Bilong Jehova. Olsem na ol inap bung na wokim ol bikpela kibung intenesenel long Budapes, Kiev, Mosko, Prak, Sen Pitasbek, Woso, na long sampela hap moa. Ol dispela kibung i mekim na wok bilong ol Witnes Bilong Jehova long olgeta hap i kamap strong moa na hariapim wok bilong ol long autim tok. Olsem na yumi no kirap nogut long save, long wanpela kantri long dispela hap, namba bilong ol Witnes i save autim tok i go antap. Long 1991 ol Witnes i olsem 49,171 tasol long 1995, ol i olsem 153,361. Insait long dispela 4-pela yia namba bilong ol Witnes long olgeta hap i go bikpela. Pastaim ol i 4,278,820, tasol nau ol i 5,199,895! Tru tumas, wok king bilong God i kamap gutpela, winim ol narapela taim!
Yes, long nau planti milion manmeri i bilip na wetim gutpela samting em bai kamap bihain. God Jehova i tok promis long wokim “nupela skai na nupela graun na stretpela pasin tasol bai i stap long en.” (2 Pita 3:10, 13) Gutpela tru ol i bilip long tok promis bilong God na ol i no bilip long nupela taim ol man i toktok long kamapim—em dispela nupela taim kirap bilong en i gat planti hevi, na liklik taim bihain em bai pinis olgeta!—Daniel 2:44.