Mekim Nogut Long Ol Meri

WANPELA MAN LONG NAIJIRIA I RAITIM DISPELA STORI BILONG KIRAP!

WANPELA ripot bilong Yunaitet Nesen i tok, ol man i save mekim nogut long ol meri, kirap long taim ol i kamap nupela insait long bel bilong mama i go inap long taim ol i dai. (Human Development Report 1995) Ol ripot bilong olgeta hap i kamapim ol dispela samting:

Paslain long mama i karim ol. Long sampela kantri, taim pikinini i gat 3-pela mun samting insait long bel, ol dokta i save skelim pikinini em man o meri. Planti taim ol i save rausim ol pikinini meri long bel.

Taim ol i liklik. Long Babedos, Kanada, Netelan, Nowe, Nu Silan, na Yunaitet Stets, long olgeta 3-pela 3-pela meri, wanpela i tok, ol i bin mekim pasin sem long em taim em i liklik yet o taim em i gat 13 krismas samting. Long olgeta yia, long Esia na ol narapela hap tu, inap olsem 1 milion pikinini​—⁠planti bilong ol em ol meri​—⁠ol i mas kamap pamukmeri. Long olgeta hap, ol i save katim hap skin long sem bilong planti milion liklik meri.

Taim ol i bikpela pinis. Long Meksiko, Papua Niugini, Ripablik Bilong Korea, na Sili, long olgeta 3-pela 3-pela meri marit, 2-pela i save kisim bagarap taim man bilong ol i paitim ol. Long Kanada, Nu Silan, Yunaitet Kingdom, na Yunaitet Stets, long olgeta 6-pela 6-pela meri, ol i bin reipim wanpela.

Taim ol i lapun. Winim 50 pesen bilong ol meri ol i bin kilim ol i dai long Banglades, Brasil, Kenya, Papua Niugini, na Tailan, em poroman bilong ol bilong bipo o bilong nau em i kilim ol i dai. Long Afrika, Saut Amerika, sampela ailan bilong solwara Pasifik, na long Yunaitet Stets, pait insait long marit i bikpela as na ol meri i kilim i dai skin bilong ol yet.

Pasin bilong mekim nogut long ol meri, em wanpela mak bilong wanpela taim Baibel i kolim “taim bilong las de,” na long dispela taim planti manmeri bai “tok kros na tok nogut,” na ol “i no i stap pren bilong ol arapela,” na ol i “pait na bagarapim ol man nabaut.” (2 Timoti 3:​1-5) Yumi ken amamas, long wanem, God Jehova i tok promis olsem, bihain long dispela taim nogut bilong “las de,” em bai kamapim nupela taim na long dispela taim olgeta manmeri bilong graun ‘bai ol i stap gut na i no gat man bai i mekim ol i pret.’ (Esekiel 34:28; 2 Pita 3:​13) Aninit long Kingdom bilong God, Krais Jisas bai ‘helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Sapos ol man nogut i laik daunim ol na bagarapim ol, em bai kisim bek ol.’​—⁠Song 72:​12, 14.