Jojia—Ol Pasin Bilong Bipo i Stap Yet

WANPELA MAN I RAITIM DISPELA STORI BILONG KIRAP!

OLSEM WANEM? Yu laik stap long wanpela kantri i gat ol gutpela ples daun namel long ol traipela maunten em ol i go antap inap 4,600 mita na ais i save karamapim ol? Na sampela manmeri i winim 100 krismas na sampela i go lapun moa? Long ol manmeri i stap long Jojia dispela i no wanpela driman nating. Em i samting tru.

Jojia i stap namel long Yurop na Esia. Long bipo tru Jojia em i wanpela bikpela ples i stap long wanpela rot i gat nem, em Rot Slika, em dispela rot Mako Polo i bihainim bilong i go long Saina. Planti lain bilong Is na Wes i save brukim kantri Jojia, na long dispela rot Jojia i kisim planti mani na ol i kisim pasin bilong ol man bilong ol narapela ples, tasol sampela narapela lain i kam pait long dispela ples, olsem na sampela i tok ol narapela lain i bin bagarapim nambawan biktaun bilong Jojia, em Bilisi, inap 29 taim! Long nau Bilisi em i wanpela biktaun i gat planti manmeri ol i go i kam long en, na em i gat tren i save raun aninit long graun, na ol bikpela haus bilong nau i stap namel long ol haus bilong bipo tru.

Bikpela hap graun inap 87 pesen bilong Jojia i gat planti maunten. Kirap long ol ples kol i stap antap na i go long ol ples daun i gat 25,000 wara na ol pis ol i kolim traut ol i pulap long en. Ol bikpela diwai na bus i karamapim bikpela hap bilong kantri. Ol maunten bilong Kokesas i stap long hap not bilong Jojia na ol i pasim kolwin na em i no inap kam insait long kantri. Dispela i mekim na hap wes bilong Jojia i kisim gutpela win i kam long solwara Blaksi na ples i hat liklik, olsem na planti man i laik go malolo long Jojia. Ples i no kol tumas o hat tumas, olsem na long bipo yet na i kam inap long nau ol i wokim gutpela wain long dispela hap. Long Jojia i gat 500 narapela narapela kain rop wain na wain!

Tasol nambawan gutpela samting bilong Jojia em ol manmeri bilong dispela ples. Ol i gat nem olsem ol i lain i gat strongpela bel, gutpela save, na ol i save mekim gut long ol narapela man, na tu ol i save lap na amamas. Ol i lain bilong singsing na danis, na long planti haus long Jojia, taim ol i kaikai pinis ol i save mekim ol singsing bilong tumbuna.

Kirap long yia 400 samting ol manmeri bilong Jojia ol i save raitim na kaunim ol buk. Long bipo yet ol i tanim Baibel long tok ples Jojia, na ol i mekim wok long ol naispela leta i narapela kain. Ol i bungim ol dispela pasin bilong bipo wantaim ol pasin bilong nau​—⁠olsem na pasin bilong ol tumbuna bilong bipo i stap yet long dispela kantri.

[Piksa Kredit Lain long pes 24]

Pat O’Hara/Corbis

[Ol Piksa long pes 25]

1. Baibel Jojia

2. Sampela manmeri i winim 100 krismas na sampela i go lapun moa!

3. Wanpela rot long Bilisi planti manmeri i go i kam long en

[Kredit Lain]

Dean Conger/Corbis