Tupela “Mirakel” Long Wanpela Kibung Long Jojia

LONG 2006, bikpela samting i bin kamap long kantri Jojia em ol manmeri i no inap lusim tingting long en. Tupela samting olsem mirakel i bin kamap long dispela taim. Inap 3-pela de, long Julai 7 i go 9, ol i wokim Kibung Distrik bilong ol Witnes Bilong Jehova, long 6-pela ples insait long kantri. Nem bilong dispela kibung em “De Bilong Kisim Bek Yumi i Klostu!” Winim 17,000 i bung long ol dispela kibung na ol i kisim planti gutpela kaikai bilong spirit.

Long Janueri 2006, ol i kirap painim wanpela gutpela ples we planti tausen manmeri i ken bung long en long nambawan biktaun bilong Jojia, em Tbilisi, em taun ol i makim bilong kibung bai kamap long en. Long ol narapela taun ol bai wokim kibung long en, ol bai harim ol tok long rot bilong telefon.

Isi isi insait long sampela yia, gavman bilong Jojia i orait long ol man i stap fri long mekim lotu bilong ol. Olsem na maski bipo ol man i birua long ol Witnes long planti hap bilong Jojia, ol Witnes i wok strong i go, na ol i bilip strong olsem ol bai painim wanpela ples bilong wokim kibung long nambawan biktaun. Ol lain bilong Jojia ol i man bilong mekim gut long ol man. Tasol sampela bikman bilong gavman i bel nogut long ol narapela lotu. Olsem wanem? Ol inap daunim dispela bel nogut bilong ol na larim ol Witnes i rentim wanpela haus bung?

Ol brata long Komiti Bilong Kibung ol i go lukim sampela haus stediam na ol bikpela haus spot. Ol maneja i orait long ol Witnes i ken mekim kibung long haus bung bilong ol, tasol taim ol brata i askim ol long makim de stret bilong rentim, ol i no orait long en. Olsem na komiti i kirap nogut taim wanpela lain bilong bosim haus bung bilong mekim musik (Tbilisi Philharmonic) i orait long ol Witnes Bilong Jehova i ken rentim haus bung bilong ol. Dispela haus bung i stap long namel bilong taun, we planti bikpela bung i gat nem ol i bin kamap long en.

Komiti Bilong Kibung i lukim olsem hatwok bilong ol i kamapim gutpela samting, olsem na ol i kirap stretim wok bilong kamapim kibung long Tbilisi, na long ol liklik na bikpela taun insait long Jojia, olsem Tsnori, Kutaisi, Zugdidi, Kaspi, na Gori. Ol i mekim bikpela wok tru bambai program bilong kibung i ken kamap long ol dispela ples kibung tu long rot bilong telefon. Ol i redim pinis olgeta samting bilong kibung. Orait wantu tasol, inap wanpela wik paslain long kibung i kirap, ol lain bilong bosim dispela haus bung bilong musik long Tbilisi ol i senisim tingting na tok nogat long ol brata i rentim dispela haus. Ol i no toksave long as na ol i mekim olsem.

Namba Wan “Mirakel”

Em klostu tru long taim bilong mekim kibung na ol brata bai mekim wanem nau? Ol i gat wanpela rot tasol, em bilong mekim kibung long taun Marneuli, em hap bilong ol fam i stap ausait long Tbilisi inap olsem 40 kilomita. Ol i bin wokim planti kibung long dispela hap, long graun bilong wanpela famili em ol i Witnes Bilong Jehova. Bipo em i wanpela bikpela gaden. Inap 10-pela yia pinis, ol kongrigesen long Tbilisi ol i bin mekim ol kibung long dispela ples tasol. Tasol long dispela taun Marneuli yet ol man i bin bung na mekim nogut tru long ol Witnes Bilong Jehova.

Wanpela taim ol i bin mekim olsem, em long Septemba 16, 2000. Ol polis bilong taun Marneuli i bin putim ol rotblok bilong pasim ol Witnes na bai ol i no ken i go long ples kibung. Orait nau planti bas i kam, em ol bikhetlain olsem raskol i pulap long en, na wanpela pris Otodoks, em Vasili Mkalavishvili, i bosim ol. Ol i pasim ol ka na bas i laik go long kibung long Marneuli, na ol i holimpas sampela Witnes i stap insait long ka na pulim ol i kam ausait na paitim ol nogut tru, na ol i kisim olgeta samting bilong sampela pasindia, na ol Baibel na ol buk na nius wantaim.

Inap olsem 60 man i bung na kam bilong mekim pait long ol Witnes long ples kibung yet long Marneuli, na olsem 40 Witnes i bin kisim bagarap. Ol i holim naip na sutim wanpela brata long bros. Sampela ol i holim gan na sut nating i go antap. Wanpela i makim gan long mama bilong dispela hap graun na i tok em i mas givim mani na ol gutpela bilas gol samting long em. Ol i go insait long haus i stap long arere bilong graun, na ol i wok long painim ol samting i gat bikpela pe na ol i stilim. Ol i brukim olgeta windo long haus bilong em, na bihain ol i kukim long paia ol buk na nius bilong Baibel na ol fom ol i bin wokim bilong sindaun long en long kibung. Ol i bagarapim planti buk samting, inap olsem wan na hap ton. Ol polis i no pasim ol liklik; ol yet i helpim ol dispela bikhetlain long mekim nogut long ol Witnes.a

Komiti Bilong Kibung i hatwok, nogut hevi i kamap gen long taim bilong kibung, na tu, ol i gat hevi long olsem wanem ol inap sindaunim 5,000 manmeri long ples em 2,500 tasol inap sindaun long en. Olsem wanem ol inap stretim dispela hevi insait long dispela sotpela taim tasol? I olsem wanpela mirakel i kamap taim ol papa bilong tupela hap graun i stap klostu ol i kam na tok ol Witnes i ken rentim graun bilong ol em ol i save wokim gaden long en.

Tasol i gat bikpela wok tru bilong mekim dispela tupela hap graun i kamap gutpela ples bilong wokim kibung. Ren i kam daun long olgeta de long wik paslain long kibung na dispela i givim hatwok long ol. Long gaden bilong ol dispela neiba ol i bin planim poteto na ol i redi long kamautim. Pastaim, ol brata i bung long bikpela ren na kamautim ol poteto. Orait nau ol i rausim ol banis na ol i sanapim bun bilong haus na bihain ol i karamapim bilong pasim san na ren. Ol i mas wokim sampela fom moa, na ol i putim sampela moa masin bikmaus. Ol volantia i mekim save katim ol plang long so na nilim na mekim ol narapela wok, na ol i wok long san na nait na sampela i no slip liklik.

Olgeta i tingting: “Olsem wanem sapos ren i kam daun yet long taim bilong kibung? Nogut olgeta bai bagarap long graun malumalum.” Ol i baim ol kunai i drai pinis na karamapim graun. Bihain san i lait! Long 3-pela de olgeta bilong kibung, san i lait gutpela tru na hatim graun.

Taim ol Witnes i kam kamap, ol i lukim gutpela ples tru. Long hap bilong ol fam ol samting i stap isi na i olsem ol i stap long nupela taim. Ol i sindaun gut long ol sia na i gat ol diwai fik na ol narapela diwai prut na ol bikpela gaden kon na tomato long arere bilong haus bung. Long baksait bilong pletfom i gat ol rop grep i stap. Taim ol i wok long harim ol tok bilong program, sampela taim ol inap harim ol kakaruk man i krai na ol kakaruk meri i pairap taim mama bilong fam i wok long kisim ol kiau. I gat ol narapela liklik pairap bilong bus i kamap, tasol long yau bilong ol manmeri i sindaun long kibung, em i olsem gutpela krai bilong musik. Dispela ol nois i no pulim nabaut tingting bilong ol, nogat; ol i putim gut yau long ol gutpela tok bilong Baibel i kamap. Tasol i no ol dispela samting tasol bilong dispela kibung ol i no inap lusim tingting long en.

Namba Tu “Mirakel”

Long pinis bilong program bilong Fraide long moningtaim, ol lain bilong kibung i kirap nogut taim wanpela bilong Gavening Bodi Bilong Ol Witnes Bilong Jehova, em Geoffrey Jackson, i tokaut long ol inap kisim Baibel New World Translation of the Holy Scriptures long tok ples Jojia.b Aiwara i pulap long ai bilong planti bratasista, em ol i kirap nogut tru long dispela samting. Wanpela famili em bel bilong ol i kirap tru na ol i tok: “Mipela i no ken pinis long tok tenkyu long dispela mirakel i kamap​—em mirakel bilong Jehova. Em wanpela bikpela wok tru ol i bin mekim insait long sotpela taim tasol!”

Wanpela sista bilong taun Tsalendjikha i bin harim program long telefon na em i tok: “Bel bilong mi i amamas tru taim mipela i kisim Baibel olgeta. Mi laik tok tenkyu tru long dispela 3-pela de kibung i nambawan tru. Em wanpela bikpela samting tru i bin kamap.” Wanpela famili long wanpela kongrigesen long wes Jojia long boda bilong solwara Blaksi, ol i tok: “Bipo mipela i gat wanpela Baibel tasol bilong famili, tasol nau mipela 4-pela olgeta i gat wanpela Baibel New World Translation bilong mipela wan wan yet. Nau mipela olgeta wan wan inap mekim stadi bilong mipela yet long Baibel.”

Tasol i no olgeta samting i wok gut tasol. Ol i wokim Baibel New World Translation na salim i go long Jojia paslain long taim bilong kibung, tasol ol lain long Dipatmen Bilong Kastam ol i no larim ol dispela Baibel i brukim boda na go insait long Jojia. Ol brata i go long Ofis Bilong Ombutsman na toktok wantaim komisina. Em i mekim na kastam i larim ol dispela Baibel i kam na ol i kamap long kibung distrik long taim stret. Na em i salim helpim bilong em i go long kibung bilong kisim sampela bilong ol dispela Baibel bilong putim long ofis bilong ol.

Ol Jojia i Mekim Gut Long Ol

I gat narapela as na dispela kibung distrik bilong Marneuli em i wanpela bikpela samting bilong ol Witnes Bilong Jehova long Jojia. Wanpela bilong Gavening Bodi Bilong Ol Witnes Bilong Jehova i mekim wanpela tok long program. Olgeta bratasista long kibung ol i amamas tru na ol yet i laik bungim em na tok amamas long em i kam. Brata Jackson i mas sanap na sekanim ol bratasista inap sampela aua paslain long taim kibung i kirap, na long taim bilong kibung, na bihain long en, tasol em i amamas long mekim olsem.

Bipo, long yia 1903 long pinis bilong narapela kibung, wanpela brata i bin tok: “Sapos man i laik givim wan tausen dola long mi na bai mi givim em ol gutpela samting mi bin kisim long dispela kibung, bai mi no inap mekim olsem, maski mi rabisman tasol.” Winim wan handet yia bihain, ol Witnes i bin kam long dispela kibung bilong 2006 long kantri Jojia, ol i gat wankain tingting olsem dispela brata.

[Ol Futnot]

[Blok long pes 19]

“Lain i Liklik” i Go Bikpela

Tok bilong Aisaia 60:22 i kamap tru long Jojia: “Ol lain i liklik tru bai ol i kamap planti moa olsem ol manmeri bilong ol bikpela na strongpela kantri. Mi Bikpela, mi tok, ol dispela samting bai i kamap hariap long taim mi makim pinis.” Insait long 20 yia lain bilong autim tok bilong Kingdom long Jojia i go bikpela tru​—pastaim i gat 100 tasol na nau i gat 16,000 samting. Ol dispela lain i wok strong na ol i mekim klostu 8,000 Baibel stadi wantaim ol man long olgeta wik, na dispela i makim olsem ol lain bilong autim tok bilong Kingdom long Jojia bai go bikpela moa yet.

[Sat/Ol Mep long pes 16]

(Bilong save ol dispela rait i stap we long pes, lukim buk o magasin)

FEDERESEN BILONG RASIA

JOJIA

⇨ Zugdidi

⇨ Kutaisi

Marneuli ⇨ Gori

⇨ Kaspi

⇨ Tsnori

TBILISI

TEKI

AMENIA

ASEBAIJAN

[Kredit Lain]

Globe: Based on NASA/Visible Earth imagery

[Piksa long pes 16]

Piksa ol i sanapim long Tbilisi

[Ol Piksa long pes 17]

Long rot bilong telefon, ol tok bilong kibung long Marneuli i kamap long 5-pela narapela ples kibung

[Ol Piksa long pes 18]

Ol lain long kibung i kirap nogut na i amamas tru long kisim Baibel “New World Translation” long tok ples Jojia