Sampela Tok i Kam Long Olgeta Hap
Luksave Hariap Long Sik Kensa Long Susu
Wanpela nius long Brasil (Medicina Conselho Federal) i tok, sik kensa long susu em i namba wan sik kensa bilong ol meri long Brasil—long olgeta 12-pela 12-pela meri wanpela meri i save kisim sik kensa long susu. Dispela nius i strongim olgeta meri i winim 25 krismas long sekim susu bilong ol yet long olgeta taim. Nius Medicina i tok tu olsem, em i gutpela sapos ol meri i go long dokta long namba wan taim bilong kisim piksa bilong susu (mamogram) taim ol i gat 35 i go inap 40 krismas, na taim ol i gat 40 i go inap 50 krismas ol i kisim mamogram long olgeta tupela tupela yia, na taim ol i winim 50 krismas ol i kisim mamogram long olgeta yia. Tru, taim ol meri i kaikai planti gris, na sampela wanblut bilong ol i gat sik kensa long susu, dispela inap mekim na ol i kisim sik kensa long susu. Tasol inap 70 pesen bilong ol meri i gat sik kensa long susu ol i no insait long wanpela lain em planti bilong ol i save kisim sik kensa long susu. Nius Medicina i tok, “dispela i kamapim long ples klia olsem em i bikpela samting long luksave long dispela sik taim em i no go bikpela yet.”
Wanpela Meri i Lapun Tru Em i Dai
Wanpela nius long Frans (Le Figaro) i tok, Jeanne Louise Calment, em i dai long Ogas 4, 1997, taim em i gat 122 krismas. Buk Guinness Book of World Records i tok, krismas bilong em i winim krismas bilong olgeta narapela manmeri bilong dispela graun. Mama i karim Jeanne long Februeri 21, 1875, long Arl, long saut-is bilong Frans—em paslain long taim ol man i wokim lam i wok long paua, na masin bilong pilai musik, na ka. Em i marit long 1896, na em i gat wanpela pikinini meri na dispela pikinini i dai 63 yia paslain long em, na Jeanne i gat wanpela tumbuna pikinini man na em i dai long 1963. Em i tingim taim em i bungim wanpela man bilong wokim piksa, em Vincent van Gogh, long yia 1888 taim em i yangpela meri. Na em i kamap pren bilong wanpela man bilong raitim ol stori, em Frédéric Mistral, dispela man i bin kisim Prais Nobel long 1904. Jeanne i tok pasin bilong lap, na mekim wok, na kisim kain kain kaikai i helpim em long stap longpela taim.
Ol Skulmeri i Gat Strong
Nius The Daily Yomiuri i kamapim wanpela ripot i tok, ol yangpela long haiskul long Japan, ol i save makim ol samting ol manmeri i mas kisim. Taim ol yangpela meri i stori long ol nupela stail long ol narapela yangpela, wantu planti i kisim save long dispela—sampela taim winim 1,000. Ol narapela manmeri tu i kisim save long ol dispela stail taim ol yangpela i stori long papamama na long ol brata susa bilong ol. Nius i tok: “Ol dispela yangpela meri ol i gutpela lain bilong baim ol samting, long wanem, ol i gat mani, na ol i laik save long ol nupela stail, na ol i gat taim bilong inapim ol laik bilong ol.” Inap 68 pesen bilong ol yangpela long Japan ol i save kisim 300 kina (averes) long olgeta mun long papamama bilong ol, na tu, planti i save kisim mani long tumbuna papamama na long wok haptaim ol i save mekim. Ol saveman i tingting planti, long wanem, ol yangpela meri i save tingim i stap bilong ol bilong nau tasol, na ol i no laik winim sampela gutpela mak i gat as bilong en. Ol saveman i kisim save olsem ol yangpela meri long haiskul long nau “ol i les, long wanem, ol i save kisim nating ol samting na ol i no hatwok long kisim.”
Namba Wan Birua Bilong Ol Sak
Planti man i save pret long ol sak. Tasol i luk olsem i gat as na ol sak i mas pret moa yet long ol man. Wanpela nius long Frans (Le Monde) i tok: “Long olgeta wan wan yia ol sak i save kilim i dai inap 100 manmeri samting, tasol long olgeta wan wan yia ol man bilong kisim pis i save kilim i dai inap 100,000,000 sak.” Ol saveman bilong ol samting i stap long solwara i tingting planti long dispela, long wanem, ol i ting dispela pasin bilong bagarapim ol sak inap paulim i stap bilong ol samting i stap long solwara. Ol sak i save mekim bikpela wok bambai ol narapela pis samting i stap long solwara i no ken kamap planti tumas. Ol sak i no save karim ol pikinini hariap na ol i gat bel inap longpela taim na ol i karim sampela pikinini tasol, olsem na taim ol man i kilim planti sak, sampela lain sak inap pinis olgeta. Wanpela samting ol saveman bilong ol samting i stap long solwara i no laik tru long en em pasin bilong rausim pul bilong ol sak bilong kisim kaikai long en, na bihain ol i tromoi sak i go bek long solwara na larim em i dai.
Pasin Bilong Kaunim Baibel i Helpim Ol Man
Ripot bilong wanpela lain (Associated Press) i tok, ol manmeri bilong Amerika em ol i save kaunim Baibel wanpela taim long olgeta wik, ol i amamas na bel isi na ol i pilim olsem i stap bilong ol i gat as bilong en, winim ol manmeri i no save kaunim Baibel planti taim. Wanpela lain (Market Facts, Inc.) long Ilinoi i skelim sampela manmeri bilong Amerika i bikpela pinis, na ol i kisim save olsem inap 90 pesen bilong ol manmeri i save kaunim Baibel planti taim, ol i tok klostu olgeta taim ol i save stap bel isi, tasol 58 pesen bilong ol manmeri i no save kaunim Baibel long olgeta mun ol i no save pilim olsem. Na tu, inap 15 pesen bilong ol manmeri i save kaunim Baibel long olgeta taim ol i save tingting planti olsem, ol man i laikim ol o nogat, tasol 28 pesen bilong ol manmeri i save kaunim Baibel long wan wan taim tasol ol i tingting planti long dispela samting. Inap 12 pesen tasol bilong ol manmeri i save kaunim Baibel planti taim ol i tok sampela taim o planti taim ol i save tingting planti long indai, tasol 22 pesen bilong ol manmeri i save kaunim Baibel wan wan taim tasol ol i save pret long indai.
Samting Ol Bebi i Harim
Nius The New York Times i tok, ol saveman i kisim save olsem pasin bilong ol man long toktok long bebi na sapos ol man i toktok long em planti taim dispela bai helpim bebi long tingting gut, stretim ol hevi, na skelim gut ol samting. Ol saveman long Yunivesiti Bilong Aiowa i skelim dispela samting na ol i kisim save olsem, ol pikinini em papamama bilong ol i gat gutpela wok mani ol i save harim 2,100 tok long olgeta aua, na ol pikinini em papamama bilong ol i no gat gutpela wok mani tumas ol i save harim 1,200 tok, na ol pikinini em papamama bilong ol i no wok mani ol i save harim 600 tok tasol. Ol i skelim tu pasin bilong papamama long toktok—olsem toktok i save strongim bel bilong pikinini, o stretim pikinini, o mekim gut bel bilong pikinini, o i olsem ol givim lo long pikinini. Ol i skelim dispela samting inap 2-pela yia na hap na ol i kisim save olsem, “ol samting pikinini i harim i mekim bikpela samting long helpim pikinini long wokim tingting na skelim ol samting taim em i gat 4-pela krismas.” Wanpela savemeri, Dokta Betty Hart i tok, taim man i gat wanpela i go inap 3-pela krismas dispela hap taim i bikpela samting long i stap bilong em, long wanem, em i no inap lukautim em yet, na ol man i bikpela pinis ol i mas mekim bikpela long em na lainim em long toktok.
Ol i Raun Antap Bilong Bungim Ol Animal
Wanpela nius (The Sunday Mail) bilong Brisben, long Ostrelia, i tok, sampela fama long Ostrelia i mekim wok long wanpela kain balus i no hevi na i save flai isi isi bilong bungim ol bulmakau na sipsip i raun long ol bikpela hap graun bilong ol. Wanpela fama long Kwinslan i tok, long olgeta taim em i mekim wok long dispela kain balus bilong bungim ol animal, em i no gat wok long givim fotnait long sampela man bilong mekim dispela wok. Em i tok: “Motabaik i kisim ples bilong hos, na nau dispela balus i kisim ples bilong motabaik.” Ol dispela balus i no hevi tumas, ol i gat ol strongpela masin bilong pilai kaset, na ol kaset i gat singaut bilong ol dok long en. Nius i tok, taim ol i harim dispela, “ol bulmakau na sipsip i kirap nogut na ran, na wanem banis bilong ol i stap klostu, orait, ol i ran i go long en.”
Ol Yangpela Long Brasil i Kaunim Buk
Nius Exame i tok, pasin bilong save long rit rait na namba bilong ol yia ol sumatin i stap long skul i go antap long Brasil. Wanpela lain (Brazilian Institute of Geography and Statistics) i tok, tru ol i mas wok strong yet long dispela samting, tasol namel long yia 1991 na 1995 namba bilong ol yangpela i gat 7-pela krismas i go inap long 14 krismas na ol i no save long rit rait i go daun inap 36 pesen. Namba bilong ol yia (averes) ol sumatin i stap long skul i go antap inap 10 pesen namel long yia 1990 na 1995. Long Rio de Janero ol i wokim wanpela so bilong ol buk na namba bilong ol sumatin i go long dispela so i go antap inap 40 pesen, ating dispela i kamapim olsem laik long kaunim buk namel long ol yangpela long Brasil i wok long go bikpela. Nius O Estado de S. Paulo i tok, ol buk ol i salim planti—inap olsem 24 pesen bilong olgeta buk ol i bin salim—em ol buk ol i raitim long ol yangpela.
Ol Manmeri Long Panjab na Ol Ston Long Kidni
Nius India Today International i tok, ol manmeri long provins Panjab na ol hap i stap klostu long en long India, planti bilong ol i save kisim ol liklik ston long kidni, winim ol manmeri i stap long ol narapela hap bilong dispela graun. Dispela ripot i tok, ol manmeri long Panjab i gat nem olsem ol i lain bilong wok strong na ol i amamas long kaikai, tasol ol i no save dring planti wara long taim bilong bikpela san. Olsem na long wanpela bung bilong ol dokta, ol i tok dispela hap i gat nem olsem planti manmeri moa ol i gat ol ston long kidni. Bikpela bilong ol ston long kidni long dispela hap i olsem 2-pela o 3-pela sentimita, tasol long Yurop na long Yunaitet Stets bikpela bilong ol ston i olsem wanpela sentimita. Dispela ripot i tok, planti India i no save tingim ol liklik pen ol i save kisim long skin o ol i no laik kisim marasin hariap, olsem na planti i kisim dispela sik. Ol dokta i tok, ol manmeri i no gat sik ol i mas dring inap 2-pela lita wara long olgeta de.