Pasin Bilong Mekim Wok Long Lata—Yu Save Skelim Ol Dispela Samting Pastaim?
Wanpela man long Aialan i raitim dispela stori bilong Kirap!
PAUL i mas senisim lait-glop bilong wanpela lam i stap ausait long haus bilong em. Em i mas klinim tu ausait bilong ol windo i stap antap long haus; meri bilong em i bin tokim em long mekim olsem inap planti taim pinis. Tasol Paul i no laik mekim hariap ol dispela wok. Bilong wanem? Long wanem, em i mas mekim wok long lata.
I gat as na Paul i tingting planti. Em i save olsem, man i mekim wok long lata em inap kisim bagarap o em inap i dai. Ol dispela bagarap i kamap, long wanem, wokman i no bin tingting gut long stretpela pasin bilong mekim wok long lata.
Taim Paul i no mekim yet ol dispela wok, em i mas tingim wanem ol samting bilong lata? Nau mipela bai stori long 10-pela samting i bin helpim em long mekim wok na bagarap i no bin painim em.
Yu Inap Kisim Bagarap Long Lata?
1 Kisim lata i stret long wok yu laik mekim. Ating yu mas apim han i go antap tru sapos lata i sotpela tumas. Na sapos lata i longpela tumas, ating yu mas putim lata i sanap kranki na yu inap pundaun. I no gutpela long mekim wok long liklik lata i gat 4-pela lek bilong i go insait long liklik rum antap klostu long rup bilong haus. Mekim wok long lata ol i wokim bilong dispela kain rum, o long lata i slip long banis.
2 Skelim gut lata. Olsem wanem? Lata i bin sanap ausait? Lata ol i wokim long diwai i save solap liklik taim wara i holim, na em i go liklik taim lata i drai gen. Taim lata i go olpela, ol hap bilong lata em man i save sanap long en ol inap lus, olsem na lata i no strong. Olsem wanem? Sampela bilong ol wan wan hap bilong putim lek ol i bruk, o ol i sting? Planti lata i gat hap ain i stap aninit long ol wan wan hap bilong putim lek bambai ol i no ken bruk. Olsem wanem? Hap ain i stap long ples stret na i pas strong? Ol skru i pasim ol hap ain long tupela longpela lek bilong lata, ol i bruk o ros pinis? Ol lata yu inap pulim i go longpela, ating ol i gat wil na rop. Olsem wanem? Ol wil i wok gut? Rop i laik bruk, o rop i sotpela tumas? Stretim hariap ol samting i bruk o lus.
Planti lata i gat ol liklik liklik baret long ol wan wan hap bilong putim lek bambai lek bilong man i no ken wel na em i pundaun. Rausim pipia samting i pas long ol dispela liklik baret. Olgeta lata i mas i gat hap raba samting long lek bambai lata i no ken wel na pundaun. Sekim lek bilong lata bilong save ol raba i stap na ol i gutpela yet o nogat.
3 Was gut taim yu kisim lata i go long narapela hap. Taim yu raun long ka, pasim lata long ples stret bilong putim lata, o long liklik trela em ka i save pulim, na pasim lata long en long tupela hap. Longpela lata inap abrusim longpela bilong ka, olsem na pasim laplap long arere bilong lata bambai man i bihainim ka inap lukim lata.
Em i gutpela sapos tupela man i karim longpela lata. Tasol sapos yu wanpela i mas karim lata na yu laik karim lata antap long sol bilong yu, orait long wanpela han holim strong lata na long narapela han helpim lata long sindaun gut antap long sol bambai em i no ken pundaun. Hap bilong lata i stap long ai bilong yu i mas i stap antap long mak bilong het bambai yu no paitim narapela man long lata. Tasol tingim, longpela bilong lata i stap long baksait bilong yu i mas wankain olsem longpela bilong lata i stap long ai bilong yu! Ol piksa wokabaut bilong mekim man i lap, ol i soim olsem lata i paitim man em samting bilong lap long en. Tasol em i no samting bilong lap long en, na ating bai yu no lap sapos lata i paitim yu.
Sapos lata i sanap stret taim yu karim, putim hevi bilong en long bros, na karim lata long wanpela han, na long narapela han i stap antap long mak bilong sol, helpim lata long sanap stret. Was gut long ol lam, na sain, na ol waia i stap antap!
4 Sanapim gut lata. Lata i mas sanap stret na slip liklik long banis.
5 Pasim lata long antap na long daunbilo. Was gut long hap yu putim antap bilong lata long en. Dispela hap i mas strong na lata i no ken seksek o wel. No ken slipim lata long samting ol i wokim long glas o plastik. Taim yu inap, pasim gut lata long samting i pas long banis samting, na antap bilong lata i mas abrusim rup o hap yu laik go long en inap wanpela mita.
Tingting gut olsem taim yu go antap long lata long namba wan taim, yu mas pasim antap bilong lata long wanpela samting. Lata inap pundaun taim yu go antap long en long namba wan taim, na long taim yu kam daun long en long laspela taim, long wanem, yu rausim pinis rop i bin pasim lata. Bilong helpim yu na bagarap i no ken painim yu long namba wan taim yu go antap long lata na long laspela taim yu kam daun long en, askim wanpela man long holim lata long as bilong en. Tasol dispela rot i no gutpela sapos longpela bilong lata i winim 5-pela mita.
Sapos graun long arere bilong haus i go daun, putim samting i hevi long as bilong lata o pasim rop samting long laspela hap bilong putim lek. Sapos graun i no stret tasol i strong, o sapos graun i malumalum, subim liklik hap diwai aninit long lek bilong lata bambai lata i ken sanap stret.
Sapos yu mekim wok long lata i gat 4-pela lek, olgeta lek i mas sanap stret long graun, na tupela sait bilong lata i mas op olgeta, na hap ain i pasim tupela sait i mas stap stret.
Yu Inap Kisim Bagarap?
6 Skelim su bilong yu. Taim yu no go antap long lata yet, skelim aninit bilong su bilong yu—dispela hap i mas drai. Rausim graun malumalum na ol samting em inap mekim na su i wel na yu pundaun.
7 Karim gut ol samting. Sapos yu inap, putim ol tul long paus samting i pas long let bambai tupela han bilong yu i fri long helpim yu long i go antap long lata. Traim long apim ol bikpela samting long ol narapela rot, tasol sapos yu mas mekim wok long lata, orait taim yu go antap long lata, oltaim holim arere bilong lata long han i no karim kago. Wokabaut gut na isi isi taim yu go antap.
Sapos yu mekim wok long ol tul i wok long paua, yu no ken holim tul long tupela han bilong mekim wok long en. Olsem: Dril inap wel o pas long hap yu drilim, na nau yu no inap sanap stret na yu pundaun. Yu no ken mekim na ol tul i wok long paua i wok nating maski yu no holim; nogut tul i pundaun na em i wok yet.
8 Tingim ol narapela. Sapos yu wok long hap i gat planti man long en, putim lata long ples klia, na sapos yu inap, banisim dispela hap long rop samting. Sapos yu mas kisim lata i go long hapsait long kona bilong haus, yu no ken lusim tingting olsem ol man i stap long dispela hap, ol i no save yu bai karim lata i kam. Olsem na singaut bilong toksave long ol, na sekim pastaim, rot i op bilong yu ken wokabaut i go o nogat.
Taim yu kisim ol tul i go wantaim yu long lata, yu no ken lusim tingting olsem wanpela liklik tul olsem skrudraiva em inap bagarapim man taim em i pundaun i go daun long lata. Sapos yu mas i go long wanpela hap na yu no inap pasim lata long wanpela samting, orait askim wanpela man long was long lata, o slipim lata long graun inap long taim yu kam bek. Yu no ken larim lata i stap nating.
9 Tingim skin bilong yu, yu gat sik o nogat. Man i mas wokabaut stret taim em i go antap long lata, olsem na sapos yu sik o yu laik traut o yu gat sik bilong airaun, orait yu no ken go antap long lata.
10 Wokabaut gut i go antap. Was gut long olgeta taim, nogut yu pundaun. No ken larim 2-pela o 3-pela man i sanap long lata long wankain taim. No ken go antap long lata taim win i strong. No ken sanap long hap bilong putim lek i stap antap tru long liklik lata i gat 4-pela lek. No ken go antap tru long lata i longpela, yu mas sanap long namba 4 hap bilong putim lek. Lata yu inap pulim i go longpela, no ken mekim i kamap longpela tru, oltaim larim 3-pela hap bilong putim lek i pas wantaim narapela hap bilong lata. No ken putim han i go longwe tru bilong kisim o bilong wokim samting. Sapos yu putim han i go longwe tru taim yu sanap long lata, yu no inap sanap stret na yu inap pundaun. Olsem na lusim lata na surikim i go long ples yu laik mekim wok long en, maski yu mas lusim hap taim moa bilong mekim wok. Taim yu go antap long lata, lukluk i go stret.
Maski yu mekim wanem samting bilong lukautim yu yet na yu no ken kisim bagarap long lata, bagarap inap painim yu taim yu mekim wok long en. Tasol ating ol dispela tok mipela i bin kamapim i ken helpim yu na bagarap i no ken painim yu planti taim. Dispela tok i bin helpim Paul. Taim em i bihainim dispela tok, em i no bin kisim bagarap taim em i putim nupela lait-glop long lam. Na olsem wanem long windo? Em i wasim ol? Em bai mekim dispela long narapela taim . . . ating!
[Ol Piksa long pes 24, 25]
1 Kisim lata i stret long wok yu laik mekim
2 Skelim gut lata
3 Was gut taim yu kisim lata i go long narapela hap
4 Sanapim gut lata
5 Pasim lata long antap na long daunbilo
6 Skelim su bilong yu
7 Karim gut ol samting
8 Tingim ol narapela
9 Tingim skin bilong yu, yu gat sik o nogat
10 Wokabaut gut i go antap