Pas Bilong Ol Man

Kalabusman i Abrusim Bagarap  Mi laik tok tenkyu tru long stori “God i Bin Helpim Mipela.” (Julai 8, 1999) Aiwara bilong amamas i kamap long ai bilong mi, taim mi ritim stori long olsem wanem Francisco Coana i kisim save long tok i tru na putim wok bilong Jehova i stap olsem nambawan samting long i stap bilong em. Taim mi ritim stori bilong ol brata Kristen i bin karim ol hevi long Mosambik, dispela i strongim tru bilip bilong mi.

J. H., long Yunaitet Stets

Pasin Man i Bihainim i Laik Bagarapim Em  Insait long sampela mun i go pinis mi sik planti taim, olsem na mi amamas long kisim save olsem yumi no ken sik tumas sapos yumi senisim pasin yumi save bihainim. Taim mi ritim ol stori “Pasin Yu Bihainim Em i Laik Bagarapim Yu?” (Julai 8, 1999), dispela i helpim mi long save olsem sampela kain kaikai mi no ken kaikai planti long en, na mi mas kaikai planti prut na kumu samting i save strongim skin.

E. P. M., long Brasil

Bipo Em i Raskol  Mi mas rait bilong tokim yupela olsem mi pilim tru dispela stori bilong Enrique Torres, Jr., nem bilong en “Bipo Mi Olsem Laion​—⁠Nau Mi Olsem Sipsip.” (Ogas 8, 1999) Dispela stori i kamapim klia pasin marimari na sori bilong God bilong yumi, em Jehova, na pasin bilong em long stap isi na em i no save les kwik long yumi. Stori i kamapim tu olsem, yumi ol papamama i no ken les long helpim ol pikinini, maski ol i lusim ol lo bilong God na mekim ol pasin nogut tru.

J. F., long Inglan

Mi go bikpela insait long wanpela famili Kristen, tasol mi bung wantaim ol poroman nogut, olsem na mi kisim ol drak na mi pait na bagarapim ol samting. Taim mi gat 18 krismas, ol i makim mi long kalabus inap 25 yia. Maski kongrigesen i bin kisim mi bek, planti taim mi save pilim olsem mi no gutpela man. Tasol taim mi ritim pinis dispela stori, mi inap pilim tru olsem Jehova i no stap longwe long ol man i wok long painim em. Mi stap yet long kalabus, tasol dispela stori i helpim mi long sanap strong.

R. B., long Yunaitet Stets

Ol Lata  Tenkyu tru long stori “Pasin Bilong Mekim Wok Long Lata​—⁠Yu Save Skelim Ol Dispela Samting Pastaim?” (Septemba 8, 1999) I no longtaim i go pinis mi pundaun long lata, olsem na mi mas i go long haus sik na ol i katim skru bilong lek bilong mi. Mi amamas long 10-pela pasin bilong mekim wok long lata em yupela i stori long en, na bai mi tingim ol dispela tok taim mi mekim wok long lata long narapela taim.

D. N., long Meksiko

Sanap Strong Taim Ol i Mekim Nogut Long Em  Nau tasol mi ritim stori, “Mi Lotuim God Maski Ol i Laik Kilim Mi i Dai.” (Septemba 8, 1999) Ol brata long Angola i bin sanap strong na karim ol hevi inap 17 yia, olsem na Jehova i blesim wok bilong ol na planti gutpela kaikai i kamap, maski long bipo dispela hap i luk olsem em i no gat ol gutpela samting bilong spirit long en.

R. Y., long Japan

Ol i No Mekim Wok Long Blut  Mi gat 11-pela krismas, na mi laikim stori “Olsem Wanem? Ol i Mas Givim Blut Long Man?” (Septemba 8, 1999) Inap tupela taim ol dokta i bin katim sista bilong mi bilong stretim sik bilong klok. Papamama bilong mi ol i bin tokim ol dokta long ol i no ken mekim wok long blut. Mi bin ting olsem sista bilong mi bai i dai, tasol inap 3-pela yia i go pinis na em i stap orait yet.

C. S., long Yunaitet Stets