Baibel i Tok Wanem?

Stretpela Tingting Long Ol Pasin Bilong Ples

“I NO GAT WANPELA PASIN OL MAN I NOLAIK TRU LONG EN LONG SAMPELA TAIM O LONG SAMPELA HAP, TASOL LONG NARAPELA TAIM O LONG NARAPELA HAP OL I BIN SUBIM OL MAN LONG BIHAINIM DISPELA PASIN.”

EM TOK bilong wanpela saveman, William Lecky, na dispela tok i kamapim pasin bilong ol man long senisim tingting bilong ol. Na tu, ating tok bilong em i makim stret ol pasin bilong ples bilong bipo na i kam inap long nau. Tru tumas, planti pasin em bipo sampela man i ting em i bikpela samting long i stap bilong ol long olgeta de, bihain ol i no orait long en. Yumi no kirap nogut long dispela samting, long wanem, Kristen aposel Pol i tok, “graun wantaim olgeta samting bilong en bai i pinis.”​​—⁠1 Korin 7:​31.

Em nau, ol samting bilong ol manmeri i save senis senis long olgeta taim. Dispela i save kamap ples klia long pasin bilong ol man long senisim tingting na sampela pasin bilong ol. Ol Kristen i “no bilong dispela graun”​—⁠olsem ol i mas klia long ol manmeri i stap longwe long God. Tasol Baibel i kamapim olsem ol Kristen i stap long “dispela graun,” na Baibel i no tokim ol long stap wanpis, olsem stap longwe long ol narapela man, nogat. Olsem na em i bikpela samting long kisim stretpela tingting long ol pasin bilong ples.​​—⁠Jon 17:​11,​14-​16; 2 Korin 6:​14-​17; Efesus 4:​17-​19; 2 Pita 2:​20.

Ol Pasin Bilong Ples i Wanem Samting?

Ol pasin bilong ples em ol samting i stret long sindaun bilong ol man, na ol man bilong wanpela hap o bilong wanpela lain ol i save bihainim. Ating sampela pasin bilong ples​—⁠olsem ol pasin bilong bihainim long taim bilong kaikai​—⁠ol i bin kamap bilong bosim pasin bilong ol man long taim ol i bung wantaim bambai pasin bilong ol i no ken bagarapim tingting na bel bilong narapela. Ol dispela pasin i olsem wel i helpim wil long wok gut, ol kain pasin olsem i helpim ol man long stap gut wantaim.

Ol lotu i bin stiaim tru ol pasin bilong ples. As bilong planti pasin bilong ples em ol bilip giaman o tingting bilong ol lotu em Baibel i no as bilong en. Olsem: Ol i ting bilip giaman bilong lotu em as bilong pasin bilong givim ol plaua long man em wanpela bilong famili bilong em i dai pinis.a Na tu, planti man i ting blu em kala bilong ol liklik pikinini man, tasol bipo ol i bin ting dispela kala em i bilong pretim ol spirit nogut. Blakpela pen bilong penim gras bilong ai i bilong lukautim meri na man nogut i no inap mekim nogut long em, na pen bilong penim maus i bilong pasim ol spirit nogut long go insait long maus bilong meri na bosim em. Na pasin bilong putim han long maus taim man i opim maus olsem em i laik slip, ating dispela i kirap long tingting bilong ol man olsem tewel bilong man bai lusim em long rot bilong maus i op bikpela. Tasol bihain, ol man i no gat dispela kain tingting moa, na nau ol dispela pasin i no samting bilong lotu.

Ol Samting Ol Kristen i Mas Tingting Long En

Taim Kristen i mas skelim bai em i bihainim wanpela pasin bilong ples o nogat, namba wan samting em i mas tingting long en i olsem: Tingting bilong God i stap long Baibel i tok wanem long dispela pasin? Long bipo God i no orait long sampela pasin bilong ples em sampela man i orait long en. Olsem: Pasin bilong kilim i dai pikinini olsem ofa, na mekim nabaut long blut, na kain kain pasin sem. (Wok Pris 17:​13, 14; 18:​1-​30; Lo 18:10) Olsem tasol, sampela pasin bilong ples em planti man i save bihainim long nau, ol i no stret wantaim ol lo bilong Baibel. Sampela bilong ol dispela pasin em Baibel i no as bilong en i olsem: Ol bikpela de bilong lotu olsem Krismas na Ista, na ol bilip giaman em ol spirit nogut i as bilong en.

Tasol olsem wanem long sampela pasin bilong ples em bipo i gat sampela samting i no stret tumas long en, tasol nau ol man i ting em ol pasin i stret yumi bihainim? Olsem: Ating ol haiden i as bilong planti pasin ol man i save mekim long taim ol i marit, olsem narapela i save givim ring long narapela na ol i kaikai kek. Olsem wanem? Dispela i makim olsem ol Kristen i no ken bihainim ol dispela pasin? Ol Kristen i mas skelim skelim olgeta wan wan pasin bilong ples bilong save long wanem hap o long wanem taim dispela pasin i no stret?

Pol i tok, “sapos Spirit bilong Bikpela i stap long wanpela man . . . em i stap fri.” (2 Korin 3:​17; Jems 1:​25) God i laik yumi mekim wok long dispela pasin bilong i stap fri bilong lainim gut tingting bilong yumi long save long ol samting i stret na ol samting i no stret, na i no bilong inapim ol laik nogut bilong skin. (Galesia 5:​13; Hibru 5:​14; 1 Pita 2:​16) Olsem na sapos wanpela pasin bilong ples i no brukim stret wanpela lo bilong Baibel, orait ol Witnes Bilong Jehova i no kamapim wanpela lo long dispela samting. Nogat. Tasol olgeta wan wan Witnes i mas skelim samting i painim em na em yet i mas pasim tok long bel long samting em bai mekim.

Tingting Long Helpim Ol Narapela

Olsem wanem? Dispela i makim olsem, oltaim em i stret long insait long wanpela pasin bilong ples sapos dispela pasin i no kalapim wanpela lo bilong Baibel? Nogat. (Galesia 5:​13) Pol i tok, Kristen i no ken tingting long helpim em yet tasol, em i mas “wok long helpim ol arapela manmeri.” Em i mas mekim “olgeta samting bilong givim biknem long God,” na em i no ken mekim wanpela samting em inap pundaunim ol narapela. (1 Korin 10:​31-​33) Olsem na man i laik God i orait long em, em i mas askim em yet olsem: ‘Ol narapela i gat wanem kain tingting long dispela pasin bilong ples? Ol man bilong ples ol i save ting dispela pasin i no gutpela? Sapos mi insait long dispela pasin, dispela bai makim olsem mi orait long sampela pasin o tingting em God i no orait long en?’​​—⁠1 Korin 9:​19, 23; 10:​23, 24.

Sampela pasin bilong ples i no gat rong, tasol long sampela hap pasin ol man i mekim bilong insait long wanpela pasin, dispela i no stret wantaim ol lo bilong Baibel. Olsem: Sampela taim, pasin bilong givim ol plaua inap makim samting i no stret wantaim tok bilong Baibel. Olsem na Kristen i mas ting olsem wanem long sampela pasin bilong ples? Ating sampela taim i gat as na yumi mas kisim save long as bilong wanpela pasin bilong ples, tasol sampela taim em i bikpela samting moa long tingim ol man bilong nau long dispela hap yumi sindaun long en, ol i ting olsem wanem long dispela pasin bilong ples. Sapos Baibel i no as bilong wanpela pasin bilong ples o samting bilong dispela pasin i no gutpela long wanpela hap taim bilong yia o long taim bilong sampela bung samting, orait ating ol Kristen bai bihainim savepasin na ol i no insait long en long dispela taim.

Pol i beten askim God long ol Kristen i ken bihainim yet pasin bilong laikim tru ol narapela na long kisim save na gutpela tingting. Taim ol Kristen i gat stretpela tingting long ol pasin bilong ples, ol ‘inap long skelim gut olgeta pasin na kisim ol pasin i gutpela tru, na ol i no gat asua long wanpela samting.’ (Filipai 1:​9, 10) Na tu, olgeta man bai ‘lukim dispela gutpela pasin bilong ol.’​​—⁠Filipai 4:⁠5.

[Futnot]

[Ol Piksa long pes 12]

Sampela pasin bilong ples, olsem pasin bilong putim han long maus taim man i opim maus olsem em i laik slip na pasin bilong givim plaua long meri i krai sori, i no gat wankain insait bilong en olsem bipo