Sampela Tok i Kam Long Olgeta Hap
Ol Ripot Bilong Ol Pait
Wanpela nius (Psychology Today) i tok: “Long nau i gat 27 pait long olgeta hap.” Wanpela lain (Stockholm International Peace Research Institute) i tok, winim 150,000 manmeri long Laibiria ol i bin dai long pait i kamap insait long kantri bilong ol inap 7-pela yia, na 500,000 manmeri i dai long pait i kamap long Angola insait long 15 yia. Ol pait long Turki i bin kilim i dai 37,000 manmeri kirap long 1984, na pait long Sri Lanka i bin kilim i dai inap 60,000 manmeri kirap long 1983. Nius i tok: “Winim 20 milion manmeri—planti ol i man nating, ol i no ol soldia—ol i bin dai long ol pait bihain long pinis bilong Namba Tu Pait. Ating ol samting bilong mani i mekim . . . na ol pait bai stap yet. Pait em i wanpela bikpela wok bisnis long dispela graun. Ol i save tromoi inap 800 bilion dola long ol samting bilong pait long olgeta yia, na ol i save kisim bikpela winmani tu.” Nius i tok moa: “Yumi ol manmeri i narakain lain tru, long wanem, yumi save mekim nogut long lain bilong yumi yet.” Lain Yunaitet Nesen i tokaut olsem dispela yia em i Intenesenel Yia Bilong Gutaim.
Pasin Bilong Smok na Aipas
Nius Canberra Times i tok: “Pasin bilong smok em i wanpela bikpela as na ol man i kamap aipas.” Ol saveman bilong tupela yunivesiti (Australian National University na Sydney University), ol i tok inap 20 pesen bilong ol aipas long Ostrelia i winim 50 krismas, ol i bin kamap aipas na smok i as bilong dispela. Ol i kisim sampela ripot long Ostrelia, Yunaitet Stets, na Yurop na ol saveman i tok ol dispela ripot i kamapim olsem ol man i save smok ol inap kisim wanpela kain sik long ai (macular degeneration) em ol lapun i save kisim, winim ol man i no save smok inap 2-pela i go inap 5-pela taim. Dokta Wayne Smith bilong Australian National University em i tok, gutpela sapos ol i putim wanpela toksave long ol karamap bilong smok olsem: “Pasin bilong smok em i wanpela bikpela as na ol man i kamap aipas.”
Ol Video-Gem Nogut
Saveman Brent Stafford bilong wanpela yunivesiti (Simon Fraser University) long Britis Kalambia, Kanada, em i tok olsem planti video-gem “i lainim ol pikinini bilong yumi long amamas long pasin bilong pait na bagarapim man.” Nius Maclean’s i tok: “Sampela em ol i givim bel tru long pilai, ol i laikim ol video-gem i gat pasin bilong bagarapim tru man na i olsem ol i mekim tru dispela samting, na ol i save ‘kilim i dai’ 1,000 man (piksa bilong ol man long video-gem) long wanpela nait, na planti taim i olsem ol i kilim i dai tru ol man long pasin i nogut tru.” Save ol i kisim i kamapim olsem ol video-gem nogut ol i bilong kirapim bel bilong man i pilai, na long “pulim tingting bilong ol yangpela bambai bel bilong ol i kamap strong na ol i no ting pasin bilong pait o kilim man i dai em i samting nogut.” Ol kampani bilong wokim ol video-gem ol i save mekim wok long 17 bilion dola long olgeta yia, dispela “i winim mani bilong lain i wokim ol piksa wokabaut na ol program bilong TV.” Stafford i tokim ol papamama long ol i mas save long wanem ol video-gem pikinini bilong ol i save pilai long en, na ol i mas was gut long pasin bilong pikinini, nogut em i kalabus long ol video-gem.
Wanpela Kain Rait Bilong Ol Saina i Laik Pinis
Inap planti handet yia long ol liklik ples bilong provins Hunan, sauten Saina, ol i bin mekim wok long wanpela narapela kain rait ol i kolim Nu Su. Ol meri tasol i save long dispela rait. Ol meri nating bilong ples ol i bin kamapim dispela rait long taim ol i bin tambuim ol pikinini meri long skul. Dispela rait i gat inap 700 leta, tasol tok ples Saina i gat planti tausen leta bilong en. Ol leta bilong Nu Su i raunpela na i olsem ol i slip liklik. Long wanpela nius (The Sunday Times) bilong Landon, Yang Yueqing, em i wanpela meri bilong wokim ol piksa wokabaut na em i bin wokim stori bilong Nu Su, em i tok, dispela rait “em i naispela tru olsem pasin bilong ol meri long rait, . . . na em i olsem piksa samting ol i wokim long laplap na em i olsem samting bilong bilasim laplap.” Long ol singsing na ol sotpela stori ol meri i bin raitim long Nu Su, ol i bin kamapim ol stori bilong ol tumbuna na ol samting i save painim ol long i stap bilong ol. Long 1949, gavman i tokaut olsem ol meri i stap wankain olsem ol man long Saina, na bihain long dispela taim pasin bilong mekim wok long Nu Su i go daun. Long nau, inap 3-pela meri tasol i gat save long dispela olpela rait, na ol i lapun pinis.
Ol i No Tingim Pikinini na Ol i Mekim Nogut Long Ol
Wanpela nius (Asahi Evening News) i tok, long 1998 pasin bilong mekim nogut long ol pikinini i go bikpela long Japan inap 30 pesen. Ol saveman i tok, as bilong dispela pasin em olsem: “Hevi bilong ol mama i wok long kamap bikpela moa, na planti bilong ol i mas mekim olgeta wok bilong mekim bikpela long pikinini na i no gat wanpela i helpim ol,” na tu, “planti manmeri moa ol i save olsem” em wok bilong ol long toksave long polis samting taim ol papamama i mekim nogut long ol pikinini o long ol i no lukautim gut ol pikinini. Nius The Daily Yomiuri i tok, planti liklik pikinini moa ol i dai long Japan, long wanem, papamama i lusim ol i stap wanpis long haus o long ka. Sampela papamama ol i lusim pikinini na ol i go pilai laki ol i kolim pasinko. Long bipo ol i kotim wan wan papamama tasol long dispela kain pasin. Tasol nau ol polis samting i laik kotim olgeta papamama i no mekim gut wok bilong ol.
Ol Nupela Bebi i Gat Binatang Jem HIV
Lain United Press International i tok: “Inap 50 pesen bilong olgeta bebi long Afrika ol i gat binatang jem HIV i kamapim sik AIDS taim mama i karim ol.” Dokta Peter Piot, em dairekta bilong wanpela lain (Joint United Nations Programme on HIV/AIDS), em i tok olsem binatang jem HIV na sik AIDS i mekim na long sampela hap bilong Afrika ol yia ol man inap i stap laip i go daun inap 25 yia. Ripot i tok moa: “Ol 21 kantri em planti man bilong en i gat binatang jem HIV winim olgeta narapela kantri, olgeta i stap long Afrika, na long 10-pela bilong ol dispela kantri, inap 10 pesen bilong ol manmeri i gat binatang jem HIV.” Ol man i dai long sik AIDS long olgeta hap, inap 80 pesen bilong ol i stap long Afrika.
Kikim Wilwil
Ripot bilong wanpela lain i kamapim ol nius (Reuters), em i tok: “Man i raun long wilwil i no inap lusim nating bikpela strong—wanpela as bilong en em wilwil i ran long strong bilong man i kikim ol pedel bilong wilwil, na tu, ol man i wokim gut ol wilwil, olsem na man i no inap lusim nating bikpela strong.” Ol saveman bilong Yunivesiti Johns Hopkins long Baltimo ol i bin mekim wok long wanpela kain kamera i kamapim klia ol samting i hat na ol i skelim ol wilwil. Ol i skelim ol dispela samting long rot bilong kompiuta na ol i kisim save olsem taim ol sen bilong wilwil i mekim wok ol i save kamap hat liklik tasol. Ripot i tok: “Ol saveman i kirap nogut taim ol i kisim save olsem wil i gat tit na sen ol i save mekim gutpela wok long strong bilong man i kikim wilwil (inap 98.6 pesen), na dispela i makim olsem liklik hap strong tasol i lus taim man i kikim wil i gat tit i stap long namel bilong wilwil. Ol i traim ol wilwil long ol kain kain rot samting, na taim planti samting i no gutpela, wilwil i bin mekim wok long strong bilong man inap 81 pesen tasol.” James Spicer i bin go pas long dispela wok, em i tok: “Mi kirap nogut long dispela samting, long wanem, pasin bilong wokim wil i gat tit na sen bilong wilwil em i no bin senis tumas winim 100 yia nau.”
“Ren Nogut”
Wanpela samting ol i kolim olsem ren nogut i save kamap long Turpan, long wanpela hap (Sinkiang Uighur Autonomous Region) bilong Saina. Nius China Today i tok, maski ol blakpela klaut i stap long skai, long graun ples i hat na drai. Man inap lukim ren i pundaun i kam daun long skai, na em inap pilim ren taim em i apim han na meknaisim han long win. Tasol ples Tupan i drai nogut tru na dispela samting i mekim na taim ren i pundaun em i save drai nating na pinis hariap. Olsem na dispela “ren nogut” i pinis paslain long em i pundaun long graun.
Kaikai Ol i Kisim i Kilim Ol i Dai
Nius The Week bilong Kerala, India, i tok wanpela dokta bilong ol animal long distrik Kuts bilong westen India, em i bin rausim inap 45 kilo plastik long bel bilong wanpela bulmakau i sik. Tasol em i no painim ol plastik tasol, nogat, em i painim tu ol laplap, skin bilong kokonas, waia, na wanpela skru. Ol bulmakau i no gat man bilong lukautim ol, ol i save kaikai pipia, na ol plastik ol man i bin tromoi inap bagarapim tru ol bulmakau. Ol bulmakau i gat man bilong lukautim ol, planti taim ol tu i save kaikai pipia i stap long rot taim ol i wokabaut i go long hap bilong ol long kaikai gras. Dokta Jadeja, em dokta bilong ol animal, em i tok olsem namba wan sik i save bagarapim ol bulmakau em bikpela sik long maus na lek, na namba tu samting i save bagarapim ol em pasin bilong kaikai ol plastik. Bel i no inap brukbrukim plastik, olsem na bel bilong ol i pas na bulmakau i no inap trautim kaikai i kam bek long maus bambai em i ken memeim kaikai. Ol man i save lusim planti bulmakau olsem bilong i dai. Dokta Jadeja i kisim save long dispela samting long rot bilong ol man i save wokim ol su samting, em ol i bin painim planti plastik long bel bilong ol bulmakau i dai pinis taim ol i rausim skin bilong ol.