“Yupela i No ken Tingting Planti”
“Mani long beng akaun bilong mipela i pinis, na mani long ol narapela akaun i stap long nem bilong ol pikinini em tu i pinis. Inap planti mun mipela i no kisim sampela mani.”
● Mi lukautim wanpela skul long wanpela ples kanaka long India, na skul i ron gut. Wanpela taim inap olsem 500 sumatin i bin kam long dispela skul. Bihain, wanpela skul i gat nem long siti i kirap long salim ol bas i kam long hap bilong mipela. Olsem na em i isi long ol sumatin i go long skul bilong ol. Planti sumatin bilong mi i lusim skul bilong ples na go skul long siti. Pastaim namba bilong ol sumatin long skul bilong mi em inap olsem 500, tasol bihain namba i go daun long 60. Samting i nogut moa em, long dispela taim wanpela bikman bilong skul i no laik bekim mani em i bin dinau long mi long en. I gat planti wokman bilong skul mi mas baim ol tasol mi no gat mani.
Mipela famili i sindaun na toktok long dispela hevi. Mipela i daunim sampela laik bilong mipela na strong long bihainim tok bilong Jisas long ‘ai i lukluk long wanpela samting tasol’—olsem, mipela i no ken kisim ol samting em mipela i no gat mani long baim. (Matyu 6:22, 25, NW ) Inap sampela taim mipela i no bin yusim ka bilong mipela, long wanem, mani bilong petrol na bilong lukautim ka em i antap tumas. Mipela i save go long stua long nait taim pe bilong ol hap kaikai i stap yet i go daun, olsem na mipela i no tromoi bikpela mani moa long kaikai. Na tu, mipela i lusim sampela kaikai em pastaim mipela i save kisim.
Mipela i Witnes Bilong Jehova, olsem na mipela i save em i bikpela samting long bung wantaim ol wanlotu bilong mipela long ol miting Kristen. (Hibru 10:25) Olsem na maski mipela i gat bikpela hevi long mani, mipela i wok strong long no ken lusim ol miting na ol kibung—maski sapos mipela i mas i go longwe long insait long ol dispela bung. Wok bilong mipela long autim tok na skulim ol man long Baibel, i makim olsem sampela taim mipela i mas raun long ol hap longwe. Mipela i yusim wanpela kain motobaik ol i kolim skuta, bilong mekim dispela wok na mipela i no yusim ka. Tasol skuta i save karim tupela man tasol.
Tasol mipela i no autim tok wan wan taim tasol, nogat. Meri na pikinini meri bilong mipela, i kirap lusim bikpela hap taim moa long toktok wantaim ol man long Baibel. Sampela taim, ol i wokabaut i go inap 6 o 8 kilomita bilong mekim Baibel stadi wantaim ol man i laikim tok bilong Baibel. Na tu, mi na pikinini man i wok strong long lusim bikpela hap taim moa long skulim ol man long Baibel.
Long sait bilong mani, nau mipela i orait liklik. Dispela hevi i skulim mipela famili long no ken tingim mani kago i olsem nambawan bikpela samting. Mipela i kisim save tu olsem mipela i no ken tingting planti tumas long ol samting em mipela i no inap long bosim. Tok bilong Song 55:22 i strongim tru mipela. Em i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.” Dispela tok i kamap tru long mipela long dispela taim mipela i gat hevi long mani!—Wanpela man i salim dispela stori i kam.