Baibel i Tok Wanem?

Prenim Man o Meri na Tingting Long Marit

Julie na Lee tupela i pren na ol i tingting strong long mekim klinpela pasin.a Tasol wanpela apinun taim ol i stap ol yet, laik bilong mekim maritpasin i kirap. Gutpela tru ol i kisim bek stretpela tingting paslain long ol i mekim bikpela rong.

PASIN bilong lotu tru long God i no makim tasol olsem yumi go lotu long olgeta wik na em tasol, nogat, yumi mas mekim sampela samting moa. Lotu i tru i mas stiaim olgeta wokabaut bilong yumi. Jisas Krais i tok, God i orait tasol long ol man i “bihainim laik” bilong Em. (Matyu 7:21) Bilong God i ken amamas long yumi, yumi na man o meri yumi prenim i mas bihainim klinpela pasin, na yumi inap pren tasol wantaim man o meri sapos yumi tingting long maritim em.

Yupela inap mekim wanem bambai pasin pren bilong yupela i stap klin long ai bilong God, na moa yet long nau we i gat planti samting i kirapim ol manmeri long mekim pasin doti? Namba wan, tingim olsem ol lo God i putim ol i gutpela samting tru bilong helpim yumi. Namba 2, save olsem yumi man i gat sin. Namba 3, putim ol lo long ol stretpela pasin yupela i mas bihainim. Namba 4, tupela wantaim i mas pas gut wantaim God. Orait nau yumi ken skelim ol dispela wan wan samting.

Ol Lo Bilong Helpim Yumi

Aisaia 48:​17, 18 i tok: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut. Sapos yupela i bin harim tok bilong mi, orait nau yupela inap i stap gut na oltaim laip bilong yupela bai i pulap long amamas, olsem wara i ran oltaim na i no save pinis. Na stretpela pasin bilong yupela bai i kamap strong oltaim olsem solwara i save bruk long nambis.”

Tru tumas, ol lo na stiatok bilong Baibel, ol i bilong helpim yumi. (2 Timoti 3:​16, 17) Ol i kamapim long ples klia olsem Man Bilong Wokim yumi i save tingim tru yumi na em i laik bai yumi stap amamas na olgeta samting yumi mekim i kamap gutpela. (Song 19:​7-10) Olsem wanem? Bel bilong yu i pilim tru dispela samting? Sapos olsem, yu soim olsem yu gat gutpela tingting tru.

Save Olsem Bel Inap Giamanim Yu

Olsem wanpela gutpela pren, Jehova i save mekim tok tru long yumi; em i tokim yumi long yumi wanem kain man. Olsem: Baibel i givim tok lukaut long yumi olsem “bel bilong olgeta man i save tingting oltaim long mekim pasin giaman. Tingting bilong man em i nogut tru. Na husat inap save long as tru bilong en?” (Jeremaia 17:⁠9) Na tu, Baibel i tok: “Sapos man [o meri] i ting, save bilong em yet inap helpim em long mekim olgeta samting, orait em i no gat gutpela tingting. Tasol sapos man i bihainim pasin bilong gutpela tingting, em bai i stap gut.”​—⁠Sindaun 28:⁠26.

Olsem wanem man na meri em ol i pren wantaim ol i kamapim olsem ol i bilip long ol yet? Wanpela rot em olsem: Ol yet tasol i stap na dispela i kirapim laik bilong ol long mekim maritpasin, olsem yumi stori pinis long tupela pren long kirap bilong dispela stori. Narapela rot em ol i sakim gutpela tok bilong papamama i aninit long God. Kain papamama olsem i save olsem laik bilong mekim maritpasin i olsem wanpela strongpela masin ol man i mas bosim gut, na moa yet ol yangpela.

Olsem na ol yangpela em ol i laik “bihainim pasin bilong gutpela tingting,” ol i save tingim gut tok bilong papamama bilong stiaim ol. Yes, ol i strong long bihainim tok bilong papamama husat i laikim tru ol na tokim ol long samting ol i no laik harim. Tru, Man i laikim yu moa yet em Papa bilong yu long heven, God Jehova, na em i tokim yu olsem ‘yu no ken tingting planti long ol samting i save givim hevi long yu. Na yu i no ken bihainim pasin i givim pen long bodi bilong yu.’ (Saveman 11:​9, 10) Olsem wanem yu inap mekim olsem? Long rot bilong sakim ol laik nogut.

Tokaut Klia Long Ol Lo Yupela i Mas Bihainim

“Man i larim ol arapela man i givim tingting long em, orait dispela man i gat gutpela tingting na save.” (Sindaun 13:10) Taim man na meri husat i gat savetingting i kirap pren wantaim, ol bai bihainim dispela tok na putim sampela mak i stret wantaim tok bilong Baibel long ol pasin ol inap mekim bilong kamapim pasin laikim bilong ol, na ol bai wok strong long ol i no ken abrusim ol dispela mak. Sapos ol i abrusim mak o ol i ting ol inap sakim ol traim, dispela i olsem man i no was gut taim em i draivim ka. Taim eksiden i kamap pinis, i leit tumas long makim olsem yu bai draivim gut ka!

Baibel i tok: “Man [o meri] i gat gutpela tingting, em i save olsem, hevi i laik kamap long em na em i abrusim. Tasol man i no gat tingting, em i lukim trabel i stap long rot bilong en, na em i go na bungim na karim hevi.” (Sindaun 22:⁠3) Ol man na meri i pren wantaim ol inap abrusim planti hevi sapos sampela narapela o wanpela pren i stap wantaim ol. Sapos ol i no bihainim stretpela pasin long taim ol i pren wantaim, ol samting nogut inap kamap olsem: Bel i gat tok, ol i no inap rispektim ol yet na poroman, na ol pren na famili bai kisim sem long pasin ol i mekim. Olsem na bihainim savetingting; pasim tok long bihainim ol lo bilong Baibel na no ken abrusim!

Putim Jehova i Stap Olsem Namba ‘Tri String’

Marit i olsem wanpela baklain i gat tripela string, na God i olsem nambawan string. Saveman 4:12 i tok: “Sapos ol i tanim tripela string na wokim baklain, orait dispela baklain i no inap bruk kwiktaim.” Dispela stiatok i stret tu long man na meri i pren wantaim. Ol man na meri em ol i laik bai God i blesim pasin pren bilong ol, ol i kisim dispela blesing taim wan wan i stap klostu long God. Song 1:​1-3 i tok: “Man [o meri] i no save bihainim tok bilong ol man nogut, . . . dispela man i ken amamas tru. Dispela man i save laikim tumas lo bilong God, na em i save tingting long dispela lo long san na long nait. . . . Olgeta samting em i mekim i save kamap gutpela.”

Tru tumas, bambai laip bilong yumi i kamap gutpela tru​—⁠na bilong man na meri i pren gut wantaim na marit tu​—⁠yumi mas mekim ol samting long pasin olsem Jehova i laikim. Yumi save, em i Man Bilong Wokim yumi, na pasin bilong laikim tru narapela na marit i wanpela gutpela presen i kam long em. Olsem na yumi mas rispektim tru dispela samting.​—⁠Jems 1:⁠17.

[Futnot]

YU LAIK SAVE?

● Olsem wanem yumi save olsem God i laik bai ol gutpela samting i painim yumi?​​—⁠Aisaia 48:​17, 18.

● Yumi mas save long wanem samting long yumi yet?​​—⁠Jeremaia 17:⁠9.

● Wanem samting inap helpim man na meri long i stap gut long taim ol i pren wantaim, na bihain long taim ol i marit?​​—⁠Song 1:​1-3.

[Piksa long pes 29]

Taim man na meri husat i gat savetingting i kirap pren wantaim, ol i putim sampela mak i stret wantaim tok bilong Baibel long ol pasin ol inap mekim bilong kamapim pasin laikim bilong ol, na ol bai wok strong long ol i no ken abrusim ol dispela mak